«Эйкакштнень улест кузонтень билетэст, улест од иень казнест. Вейкеяк семиясь илязо кадово минек ванновтомо», – мерсь Мордовиянь Прявтось.
Кода пачтясь васенце вице-премьерэсь Галина Лотванова, театратнесэ, музейтнесэ, библиотекатнесэ од иень мероприятиятнес СВО-нь участниктнень эйкакштненень явозь 700 седе ламо билетт.
Раськень драмтеатрасонть карми важодеме Якшаматянь резиденциясь. Эйкакштнень ды покштнень туртов анокставить интерактивной программат. Коенть коряс ламот бажить понгомс И.М. Яушев лемсэ музыкань театрантень «Щелкунчик» балетэнтень – те спектаклянтень сакшныть ваныцят натой лия оштнестэяк.
И.Д. Воронин лемсэ Мордовиянь краеведениянь музейсэнть ютавтовить «Тайны музейных часов» од иень интерактивной программат ды мастер-класст. С.Д. Эрьзянь лемсэ изобразительной искусствань музейсэнть од иень кенярксчитнестэ ютавтовить «Волшебная история Деда Мороза» интерактивной экскурсият ды мастер-класст.
А.С. Пушкинэнь лемсэ Национальной библиотекасонть ютавтовить «Новогодняя мастерская в Пушкинке» сувениртнэнь теемань коряс мастер-класст.
13 иеде седе вишкине 75,6 тежат эйкакштненень максовить поздоров марто ламбамо казнеть Артём Здуновонь пельде. Казнетне пачтявить Херсонской областень Каланчакской муниципальной округонь эйкакштненень – ледстясынек, Мордовиясь сайсь шефства те тарканть лангсо.
Советской площадьсэ прявт кузось панжови ацамковонь 24-це чистэ. Площаденть мазылгавтсызь од иень од конструкциятне. Тедеде Саранскоень эрицятнень ды инжетнень туртов ацамковонь 31-це чистэ нолдави кенярксчинь салют.
Мордовиянь Прявтонть кармавтоманзо коряс покш мель явови эень катоктнень (весемезэ республикасонть эйстэст 94, Саранскойсэ – 22) ды соксонь базатнень важодемантень. Кода пачтясь Саранск ошонь округонь прявтось Игорь Асабин, якшамковонь 5-це чистэ Саранскойсэ ютавтови ошонь Шумбрачинь чи. Спортонь пелькстамотне ютавтовить ниле площадкатнесэ: Пролетарской ды Ленинской районтнэнь парктнесэ, экопарксо ды «Саранск» стадионсонть. Тосо кармить важодеме каша ды пси чай марто паксянь кухнят.
Саранскойсэ ды республикань районтнэсэ од иень афишатне пек келейть. Од иень кенярксчитнес – вадря ежо марто!
Мордовия Республикань Прявтонь пресс-службась