Ноябрянь 28-це чистэ ютавтовсь Мордовия Республикань Правительстванть промксось. Россиянь Федерациянь Президентэнть Федеральной Собраниянтень ды Мордовия Республикань Прявтонть Государственной Собраниянтень 2016 иень кучоматнень топавтомадост пачтясь Правительствань Председателень Полавтыцясь - МР-нь Экономикань министрась Владимир Мазов.
Кучоматне топавтовить вадрясто. Те редяви республикань социально-экономической невтевкстнэсэ. 2016 иень январьстэ-сентябрясто ютазь иень теке шкантень кассть промышленностень, велень хозяйствань, строительствань производствань покшолматне, вадрят невтевкстнэ важодемань рынкасонтькак. Покшолгавтовсь зарплатаськак.
Вадрят промышленной производствань невтевкстнэ. Чувтонь обработкась ды чувтосто теевкстнэнь нолдамось кармась 118,1%, транспортонь средствань ды оборудованиянь теемась - 114,4%, ярсамопелень теемась - 112,1 процент.
Кенярдовтыть лия невтевкстнэяк. Промышленной тевдеемань коряс груздязь товарт, топавтозь тевть ды услугат 110,4 млрд целковоень покшолмасо, те 106,6% 2015 иень январенть-сентябрянть коряс.
Вадрят невтевксэст истят предприятиятнень, кода «Рузхиммаш» АО-сь, «ЭМ-КАБЕЛЬ» ООО-сь, «Биохимик» ОАО-сь, «Электровыпрямитель» ОАО-сь, «Сарансккабель-оптика» ООО-сь, «Саранский завод «Резинотехника» ОАО-сь.
ПФО-нь регионтнэнь ютксто 2016 иень январень-августонь невтевкстнэнь коряс минек республикась саизе васенце тарканть строямонь материалтнэнь, электрооборудованиянь, электронной ды оптической оборудованиянь, ярсамопелень, симемапелень нолдамост коряс.
Мордовиясь, кода икеле иетнестэяк, сови вейке ломаненть лангс сывелень, ловсонь ды алонь нолдамонь коряс ПФО-нь ды Россиянь васенце регионтнэнь юткс.
Вадря невтевкстнэнь удалась саемс инновациянь предприятиятнес путозь инвестициятнень вельде, сынст покшолмаст кармасть 270 млн целковойть.
Промкссонть ветясь Мордовия Республикань Правительствань Председателесь Владимир Сушков.