Ацамковонь 16-це чистэ Екатерина Константиновна тешксты 100 иень юбилеенть. Те редявикс чинть кувалма сонензэ поздоровонь евтамо сась Артём Здунов. Мордовиянь Прявтонть пельде поздоровонь валтнэнь ветеранось кунсолынзе лембе мизолкс марто, букетэсь тусь мелезэнзэ: «Пек мазый!» Чаень симемстэ евтнесь региононь руководителентень, кода эрясть ды важодсть войнань иень ломантне. Екатерина Ныркова – тылэнь важодиця, казезь «За доблестный труд в Великой Отечественной войне 1941-1945 годов» медальсэ. Сон ульнесь Сурань оборонань рубежень строямосо. Стака важодеманть ледстни нусманясто. Мейле войнань иетнестэ Екатерина Константиновна кармась тиринь велесэ Куйбышевень чугункань кинь узловой станциясонть кинь бригадирэкс. Те ульнесь сонензэ виень коряс, эдь мольсь война...
Уш сэтьме шкасто авась важодсь Саранскоень пеньковой комбинатсонть. 42 иеть Екатерина Ныркова алтась штердемань тевентень, конасонть кармась алкуксонь профессионалокс.
Екатерина Константиновна ледстни икелень шкатнень, ансяк истя жо ваны масторлангсонть молиця неень шкань тевтнень мельга. Республикань Прявтось казсь од телевизор – уш течи бабинесь карми ваномо эсь юбилеензэ коряс сюжетэнть покш экрансто.
Мордовия Республикань Прявтонь пресс-службась