Те чистэнть Мордовиянь Прявтось Артём Здунов ульнесь Саранскоень промышленно-экономической колледжсэнть. Тедеде тонавтомань учреждениясь целанек одкстомтовсь СПО-нь учреждениятнень педе-пев витнемань коряс федеральной программасонть улеманть лувсо.
Ней колледжсэнть тонавтнить малав 1200 студентт, топавтовить 16 программат, конат сюлмавозь информационной систематнень ды программированиянть, логистиканть, сварямонь ды металлургической производстватнень марто. Тесэ анокставить специалистт региононь ламот промышленной предприятиятнень туртов - ВКМ-Сталь, Рузхиммаш, Электровыпрямитель, Саранскоень приборостроительной заводось ды лият.
Республикань Прявтось ваннынзе одкстомтозь аудиториятнень ды лабораториятнень. Тесэ весемесь малавгавтозь производствань площадкатненень. Теде башка - неень шкань оборудования ды обстановка. Тень тешкстыть кода тонавтыцятне, истя жо студенттнэ. Колледжсэнть теезь авань ды эйкакшонь вадря нупаль.
Студенттнэнь ды тонавтыцятнень марто кортамодонть мейле Артём Здунов вастовсь сисем кластертнэнь представительтнень марто, конат теезь Мордовиясо «Профессионалитет» федеральной проектэнть лувсо. Те колледжтнень ды техникумтнень прявтт, преподавательть ды производственной тонавтомань мастерт, студентт ды важодема таркань максыцят.
«Те зданиянтень 84 иеть. Ваннынк, мезе мереви теемс, бути путомс кедь – максомс яволявтома программантень совамга, предприятиятнень марто вейсэ примамс участия федеральной проекттнэсэ. Бизнесэсь - тесэ прявт кармавтыця. А вана анокстамс специалистт - те государстванть тевезэ, - тешкстызе Артём Здунов. - СПО-нь системасонть минек ней 1200 педагогт, наставникть, производственной тонавтомань мастерт ды малав 18 тёжат студентт. Те покш армия, конась лезды тенек топавтомс минек предприятиятнень вешемаст».
Тешкстазель, течинь чинтень важодемань рынкасонть эрьва омбоце вакансиясь – те средней профобразования марто специалистт. Текень пингстэ отраслянть важодемань профессиятнень анокстамонь ды топавтомань коряс важодемась ветяви весе ёнкстнэнь коряс. Бюджетэнть вельде СПО-сэ явови финансирования 70% таркатнень лангс. Эрьва ие ламолгавтови саемань цифрась эрявикс ёнкстнэнь коряс. Важодемань таркатнень максыцятнень марто вейсэ «Профессионалитет» проектэнть лувсо отраслянь сисем кластертнэнь туртов инфраструктурань теемантень явозь малав 850 млн целковойть.
Промышленниктнень, преподавательтнень ды студенттнэнь марто вастовоманть лувсо кортасть «Профессионалитет» программань сехте лезэв практикатнеде ды кевкстематнеде, конат токшить важодемань рынкань ды СПО-нь системань одкстомтоманть. Тешкстазель предприятиятнень ды тонавтнемань учреждениятнень вейсэнь тевдеемань, студенттнэнь производствас совавтомань ды тонавтнемстэ практической ёрокчитнень получамонь, сы шкань специалисттнэнень корпоративной лезксэнь явомань эрявиксчись.
Мероприятиянть прядовомга Артём Здунов явшесь Мордовия Республикань Прявтонь премият «Профессионалы» профессиональной ёрокчинь коряс Чемпионатонь регионъютконь пельксэнь невтевкстнэнь коряс.
Мордовия Республикань Прявтонь Пресс-службась