2022 иестэ тесэ ютавтовсь сюкпрянь евтамонь молебен храмонтень 220 иетнень топодеманть кувалма, тосо ульнесть Мордовиянь Прявтось Артём Здунов, Саранскоень ды Мордовиянь митрополитэсь Зиновий, велень ды райононь эрицятне.
Ней храмонть ули эсензэ баягань чавома тарказо, целанек вельмевтезь латось, прядозь фасадонь важодематне, моли потмонь отделкась. Республикань Прявтось макссь зярыя кармавтомат подрядчикентень, сынь токшить тевтнень топавтомань шканть. Артём Здунов истя жо евтась сюкпря весенень, кие лезды кезэрень церьковань вельмевтемантень, тешкстызе, те пек паро тев.
Мордовия Республикань Прявтонь пресс-службась