Мордовиянь ЦИК-сь ёвтынзе Россиянь Конституцияс полавтоматнень совавтомань коряс Весероссиянь кочкамонь итогтнень. Масторонь прявт закононтень полавтоматнень кирдизь республикань ламот эрицятне. Весемезэ республикасонть 601 293 кочкицят. Участкатнес якасть 478 642 ломанть, те 79,6%. Полавтоматнень кисэ вайгелест максызь 85,6%, полавтоматнень каршо – 13,82%. Масторонь келес жо РФ-нь Конституцияс полавтоматнень кисэ вайгелест максызь 77,9% кочкицятне, явкась кармась 65%.
– Мордовиясо кочкамотне ютасть вадрясто. Минек региононь эрицятне эсь олясо ёвтызь мелест-арсемаст. Кочкамотне ульнесть неявицякс, те невти сынст видечинть. Питнеель эрьва вайгелесь, весе вейсэ минь теинек историянть, – мерсь МР-нь ЦИК-нь председателесь Александр Косов.
Участкатнес ламо ломантнень а пурнавомга, кочкамотне ушодовсть аштемковонь 25-це чистэ. Александр Косов тешкстызе, кочкамонь прявт чинтень – медьковонь 1-це чинтень Мордовиясо эсь вайгелест максызь 70% ламо эрицятне. Те 424 087 ломанть. 100 тёжатне вайгелест максызь кудосо. Малав 8 тёжат ломантне кочкизь «Мобильный избиратель» лувонть ды максызь вайгелест улемань-аштемань таркасо.
Масторонть туртов аволь шожда шкастонть, зярдо ламот пелить коронавирустонть, кочкамонть туртов теезельть башка условият.
– 13 тёжадо ламо ломатне максызь вайгелест васоло аштиця эрямонь пунктнэсэ, косо арасельть кочкамонь туртов нупальть. Од ёнксокс, конась вечкевсь Саранскоень ды Рузаевкань эрицятненень, кармась кудотнень маласо кочкамось. Тень вельде вайгелест максызь 14 тёжат ломанть, – толковизе Александр Косов.
Кочкамонь читнень перть явкань коряс васенцекс ульнесть Атюрьевань – 91%, Инсаронь – 91,1%, Дубенкань – 90,9%, Краснослободскоень – 90,3%, Отяжбуень ёнкстнэ – 90,3%. Россиянь Конституцияс полавтоматнень кисэ Краснослободской ёнкссо максозь 93,4% вайгельтне, Дубенкань – 92,7%, Теньгушевань – 92,52%, Ташто Шайговань – 92,2%.
Мордовиясо кочкамонь участкатнесэ важодсть 6 тёжадо ламо ваныцят (наблюдательть). Кочкамотнень ютавтоманть ды сонзэ итогтнень коряс пеняцямот МР-нь ЦИК-с эзть пачтяво. Минек республикасонть арасть учаскат, косо кочкамотне яволявтозь аволь алкуксонь.
– Ёвтан сюкпря участковой комиссиятнес совицятненень, сыненст савсь топавтомс покш важодема. Коронавирусонь пандемиянть шкасто сынь важодсть 7 чить, апак оймсе, 14-15 часонь перть. Те аволь шожда. Сынст марто вейсэ участкатнесэ ульнесть правань ванстомань органонь, Росгвардиянь важодицятне. Сюкпрянь валт ёвтан ваныцятненень, волонтертнэнень ды медицинань важодицятненень, – мерсь Александр Косов.
Ирина Злобина ("Известия Мордовии")