Россиянь Просвещениянь министрань васенце полавтыцясь Дмитрий Глушко, республикасонть важодемань коряс улемстэ, Мордовиянь Прявтонть Владимир Волковонь, МР-нь Правительствань Председателень полавтыцянть Галина Лотвановань, МР-нь Образованиянь министранть Галина Явкинань марто вейсэ ваннынзе Саранскоень тонавтнемань зярыя учреждениятнень.
24№ школань прявтось Сергей Сурайкин ёвтнесь покш инжетненень сень коряс, сэтьмечинь кодат тевть кемекстазь тонавтнемань учреждениясонть коронавирусонь инфекциянть ды педиця орматнень а нолдамонть коряс. Тесэ, кода лия школатнесэяк, онкстневи температурась, нупальтне сеедьстэ шлявить, нолдави ванькс кокшт, тонавтыцятне ды персоналось якить маскасо, истя жо тетятне-аватнеяк, бути сыть школав.
Тешкстасынек, Мордовиясь топавты вишка классо тонавтницятнень питневтеме ярсамопельсэ андомань коряс проектэнть, конань яволявтызе Россиянь Президентэсь Владимир Путин. Кода сон топавтови 24№ школасонть, Дмитрий Глушко ваннызе столовойсэ. Тесэ тешкстызь, менюнть анокстамсто топавтовить СаПиНэнь весе вешематне.
2009 ды 2018 иетнестэ школась кармась «Лучшая школьная столовая» пелькстамонь изницякс, 2010 иестэ – республикань общеобразовательной учреждениятнесэ школасо ярсамопелень анокстамонь вадрялгавтоманть коряс эксперименттнэнь топавтомань коряс региононь стажировкань площадка.
Неень шкане тесэ панжозь республикань экспериментэнь площадка: шумбрачинь ванстомань ды эрямонь сэтьме лувонь ресурсонь куншкакуро.
Теде мейле делегациясь мольсь Саранскоень электромеханической колледжентень, косо Россиянь Просвещениянь министрань васенце полавтыцясь Дмитрий Глушко ваннынзе тонавтнемань нупальтнень ды лабораториятнень, кортась тонавтыцятнень ды студенттнэнь марто.
Колледжсэнть компьютерэнь 7 класст, конат вейсэндязь локальной сетентень ды 5 мастерскойть, 4 учебно-производственной мастерскойть, 3 учебно-производственной полигонт, актовой ды спортонь зал, ловномань зал марто библиотека. Весемезэ тесэ тонавтнить 867 ломанть.
Тешкстазель, колледжсэнть анокстыть 13 профессиянь ды специальностень. Специальностень коряс важодема муить колледжень 75% прядыцятне.
Неень шкане топавтови вейсэнь важодема республикань предприятиятнень ды организациятненьт марто, тешкстазь 50 договорт.
Колледжесь прими участия СПО-нь енкссо покш программатнесэ ды проекттнэсэ, совась «Молодые Профессионалы» движениянь Россиянь «ТОП-100» тонавтомань сехте вадря организациятнень юткс.
Теде башка, колледжесь изнясь федеральной бюджетстэ 2018, 2019 ды 2021 иетнестэ гранттнэнь явомань коряс пелькстамосонть, ярмактне ютавтовить материально-технической базань одктсомтомантень, сынь ладявольть WorldSkills стандартнэнень. Колледжесь примась участия WorldSkills Russia движениясонть.
2015 иестэнть саезь колледжесь топавты республикань промышленной 18 предприятиятнень туртов профессиональной тонавтомань 27 программат. Те шкастонть саезь анокстазь 1057 ломанть.
Истя жо Мордовиянь Прявтось Владимир Волков тешкстызе, колледжсэ тонавтнемадо мейле, предприятиятнес сыть вадрясто анокстазь специалистт.
Инжетне истя жо ваннызь «Мира» тонавтомань куншкакуронть. Тесэ педагогонь важодицятнень профессиональной ёрокчист свалшкань кастомань куншкакуросонть – «Педагог 13.ру», конась теезь 2019 иестэнть, топавтовить 90 дополнительной профессиональной программат. Ансяк 2019 иестэнть квалификацияст кепедизь Мордовиянь ды Россиянь регионтнэнь 9000 ламо тонавтыцят.
Васенце этажсонть важоди «Мира» эйкакштнень ды од ломантнень ёрокчист редямонь ды кастомань-кепетемань региононь куншкакурось, конась теезь «Образование» нацпроектэнь «Успех каждого ребенка» федеральной проектэнть лувсо.
Тесэ теезь неень шкань лабораторият ды аудиторият: «Цифровое производство и дизайн»; «Медиатека», «Сенсорная комната», «Робототехника», «Инженерные системы», «Коворкинг», «Физика и астрономия», «Агротехнологии», «Студия национальных культур», «Студия литературного творчества», «Студия театрального искусства», «Биотехнологии», шахматань зона, спортивной зал, Планетарий, ульцянь тренажерт, теплицат, спортонь площадка.
Иень перть куншкакуросонть тонавтнить 1000 ломанть.
Дмитрий Глушконень ёвтнесть, тей понгомга, эйкакштне ютыть пелькстамонь кавто эскелькст – заочной ды очной.
Омбоце этажсонть «Образование» нацпроектэнь «Учитель будущего» федеральной проектэнть лувсо теезь инфраструктура педагогонь кадратнень квалификацияст кастоманть туртов.