Февралень 3-це чистэ Саранскойсэ ютавтовсь «Россиясь монь седейсэ» митингесь-концертэсь, конась алтазель Доброволецтнэнь ды волонтёртнэнь иенть панжомантень. Мероприятиясонть ульнесть 5 тёжат участникть.
Митингесь-концертэсь кармась алкуксонь варчамокс: якшамось, виев вармась киненьгак эзть максо оймсемс. Тень лангс апак вано, 13 частнэс Эень Дворецэнть икеле площадесь пешксесль. Виень варчамонь флешмобось пурнынзе од ломанень ды общественной организациянь активисттнэнь, конатнень туртов волонтерствась кармась эрямонь лувокс.
Мордовиянь од ломантнень туртов волонтёронь движениясь весе сонзэ ёнкстнэсэ кармась визитной карточкатнестэ вейкекс. 2017 иестэ минек доброволецтнэ вадря ёндо невтизь эсь пряст Сочисэ Од ломанень ды студентэнь фестивальсэнть. Кизна волонтертнэнь учи покш тев – Футболонь коряс масторлангонь чемпионатось, конань матчтне ютавтовить Саранскойсэ. Вахтас лисить эрьва кодамо ёнксонь малав 10000 доброволецт.
Сень коряс, добровольчествась – аволь ве шкань тев, а эрямонь лув, ёвтнесть волонтёртнэ. Сынст кирдизь од артисттнэ, весе пурнавозетне. «Россиясь монь седейсэ» – те чистэнть девизэсь гайгсь кода тевдеемас ветямо.