Мордовиясь сови 20 сехте вадря регионтнэнь юткс те иень вете ковтнень перть ловсонь производстванть коряс. Росстатонь невтевкстнэнь коряс, вишка, средней ды покш предприятиятнесэ ловсонь производствань покшолматне кармасть 137,6 тёжат тоннат. Те 4,2 проценттэ седе ламо ютазь иень теке шканть коряс.
Васенце колмо таркатнень саить Татарстанось, Краснодарской краесь ды Удмуртия республикась.
«Минь бажатано ванстомс велень хозяйствань производствань касоманть. Те иень аравтлувсонть арсеви потявтомс 415 тёжат тоннат ловсо ды саемс вейке скалонть пельде 6000 кг. 2022 иентень минь бажатано печтемс 7-тёжань тешксэнть», – тешкстызе Мордовиянь Прявтонь тевтнень нурька шкас топавтыцясь Владимир Волков.
5 иетнень перть Мордовиянь веленть виевгавтомс путозь 40 млрд ламо целковойть. Мордовиясь сови масторонь васенце вете регионтнэнь юткс вейке ломаненть лангс сывелень, алонь ды ловсонь нолдамонть коряс. Вейке ломаненть лангс нолдавить 506 литрат ловсо, 345 кг сывель ды 1760 алт. Продукциянть 60% ламось пачтяви республиканть томбалев – Россиянь 68 регионтнэст ды омбо мастортнэс.