Апрелень 9-це чистэ Мордовиясо важодемань содавтома марто ульнесь «РЖД» ОАО-нь чугункань кинь вокзалтнэнь Дирекциянь прявтось Виталий Вотолевский. Сон, истя жо Мордовиянь Правительствань Председателесь Владимир Сушков ды Куйбышевань чугункань кинь прявтонть полавтыцясь Максим Киселев ваннызь Саранскоень ды Рузаевкань чугункань кинь вокзалонь объекттнэнь, конат одкстомтозь-вадрялгавтозь 2018 иень Футболонь коряс масторлангонь чемпионатонтень.
Кавонест вокзалтнэсэ строязь чугункань кинть трокс ялго ютамонь сэдть, лавшо шумбрачи марто ардыцятнень туртов теезь кавто лифтт ды путозь кепедевиця платформа вагонсто лисеманть-совамонть туртов. Одкстомтозь кулянь максомань системась: путозь электронной табло ды навигациянь невтемапельть. Вокзалтнэсэ роботы питневтеме Wi-Fi ды улить мобильной устройстватнень зарядямонь туртов станцият.
Саранскоень вокзалсонть строязь ванномань од павильон, путозь колмо металлодетекторт ды видеофиксациянь системат, сынст пачка часозонзо нолдавить 1500 ломанть. Рузаевкасо 2018 иень Футболонь коряс масторлангонь чемпионатонть ютавтома шкасто ошонть ёндо сэдентень молемстэ путови ванномань кавто участка марто нурька шкань павильон, те покшолгавтсы вокзалонь нолдамонь виевчинзэ 1000 ломаньс часозонзо.
Вокзалтнэсэ одкстомтозь истят инженерэнь сеттне, кода лембень ды валдонь пачтямонь, уштомань, вентиляциянь ды ведень пачтямонь, истя жо ванстомань, толонь мадстемань, сигнализациянь ды эвакуациянь управлениянь систематне. Одктсомтозь пассажирэнь платформатне, кассань залтнэ ды учомань нупальтне.
«Весе тевтне топавтозь ФИФА-нь ды «Россия-2018» оргкомитетэнь вешематнень коряс, – мерсь Виталий Вотолевский. – Кавонест вокзалтнэс шождасто понгить маломобильной эрицятне, кемекстазь транспортонь сэтьмечинь тевтне, витнезь инженерэнь систематне. Кемевтяно, масторлангонь чемпионатонть шкасто кавонесь вокзалтнэ кармить важодеме покш вийсэ. Истя жо эряви тешкстамс, минь бажинек ламолгавтомс комфортонть учомань нупальтнесэ, путынек башка креслат. МР-нь Правительствань Председателенть Владимир Сушков марто кортынек республикань тешкс марто башка интерьертнэнь теемадо. Арсян, те мельстуи кода ошонь эрицятненень, истя жо Мордовиянь прявтошонь инжетненень. Валс, строямонь тевтне топавтозь, прядовома лангсо мазылгавтомась-вадрялгавтомась».
«Вокзалтнэнь витнемаст коряс теезь пек ламо, – мерсь Владимир Сушков. – Весемезэ тов путозь инвестицият 700 миллионт целковоень покшолмасо. Те весемесь карми важодеме республикань эрицятненень ды инжетненень аволь вейке кементь иеть». Владимир Сушков тешкстызе, чугункань кинь комплекстнэсэ теезь безопасностень неень шкань система, пассажиртнэнь туртов неень шкань сервис кода вокзалонь маласо таркатнесэ, истя жо зданиянть потсо».