Таштамковонь 19-це чистэ «Новости» РИА-нь площадкасонть ютавтовсь пресс-конференция, конасонть «Промомед» Фармацевтической компаниясь яволявтсь Россиянь рынкас сахарной диабетэнь ды пек эчкелгадомань лецямонть туртов импортонь полавтыця препаратонть ливтемадонзо. Те отечественной васенце препарат омбоце типень сахарной диабетсэ сэредиця, пек эчке ломантнень лецямонть, истя жо неть орматнень кувалма седеень-санонь ормалгадомань профилактиканть туртов.
Од линейкантень совасть препаратт, конат лездыть пекстамс истят средстватнень дефицитэнть, конась лиссь вейкине производителенть пельде пачтямотнень лоткавтоманть кувалма.
Вейке средствась нолдави шприц-ручкас пештезь, таштамковонь 18-це чистэ сонензэ максозь регистрациянь удостоверения ды сон пачтяви аптекатнес ожоковсто. Эште кавто препараттнэ ютыть государственной регистрация.
Презентациянть шкасто тешкстазель, «Промомед» компаниясь нолды од препаратт регионтнэсэ эсь фармацевтической предприятиятнень марто вейсэнь важодеманть лувсо, импортонь полавтоманть лувсо топавтовить тевть Россиянь производительтнень внутренней кооперациянть коряс.
Петр Белый, «Промомед» компаниятнень группань прявттнэнь советэнь председателесь: «Биохимик» Саранскоень заводось – минек производственной прявт площадка, косо тееви од препарат сахарной диабет марто ды пек эчке ломантнень лецямост туртов. Уш ожоковонь куншкасто сон пачтяви Россиянь Федерациянь шумбрачинь ванстомань системантень. Препаратось нолдави Свердловской областесэ «Медсинтез» заводонть марто вейсэнь важодеманть лувсо. Те регионъютконь кооперациянь пек вадря невтевкс – весемесь сень туртов, штобу топавтомс масторонь лекарствань безопасностенть, Россиянь эрьва пациентэнтень рамавольть инновациянь, пек лезэвть препараттнэ».
Пек эчкелгадомань терапиянть туртов отечественной препараттнэнь теемась уш ламо иеть ашти «Промомед» компаниянь тевдеемань прявт енксокс. Невтемакс, Саранскойсэ (Мордовия Республикась) «Биохимик» АО-нь производственной площадкасонть компаниясь 2019 иестэнть саезь нолды препаратт, конат кармасть «Инновационный продукт 2021 года» раськеютконь премиянь изницякс. Эряви тешкстамс, Саранскоень «Биохимикесь» – производствань пешксе циклань фармацевтической покш предприятиятнень ютксо вейкесь.
Предприятиянь прявт тевесь – субстанциятнень линейканть седе тов виевгавтомась ды ансяк Россиянь пачтицятнень марто важодемантень целанек ютамось. Арсематнесэ – 2024 иенть ушодовомсто теемс заводсонть пештезь шприцтнэнь производствань коряс од участка.
Те иень эйзюрковсто Россиянь Федерациянь Президентэнть Владимир Путинэнь участиянзо вельде «Биохимикень» юрсо панжовсь фармацевтической субстанциятнень производствань коряс завод.
Таштамковонь 7-це чистэ государствань руководителенть марто вастовомасонть Мордовиянь Прявтось Артём Здунов евтнесь регионсонть фармацевтикань виевгавтомадонть, истя жо Россиянь Минпромторгонть ды Минобрнауканть марто вейсэнь важодеманть вельде Мордовиясо федеральной биотехнологической куншкакуронь теемань коряс арсематнеде. «Нурька шкас фармацевтикантень путозь 16 миллиардтнэде седе ламо, поладтано топавтомс масторонь лекарствань безопасностенть», – пачтясь Россиянь Президентэнтень Артём Здунов.
Мордовия Республикань Прявтонь пресс-службась