Од стадионось панжовсь Саранскоень «Мордовиянть» ды Ижевскоень «Зенитэнть» ютксо варчамонь матчсэнть, конантень састь 13 тёжадо ламо ваныцят, учовсть жо ансяк 10 тёжат. Региононь кавто командатнень вастовомась сайсь весероссиянь гайтть. Тей аккредитацият теевсть федеральной ды омбо масторонь СМИ-тне, почётонь инжетнень ютксо ульнесть Россиянь Правительствань вице-премьерэсь Виталий Мутко ды Мордовиянь Прявтось Владимир Волков. Весень седе пек талновтсь аволь матчень результатось, кода покш футболонтень Саранскоень анокчись. Макссы-арась «Мордовия Аренась» касомань-виензамонь аттестатонть лангс экзаменэнть?
А карматано кирдеме талномасо. «Мордовия Аренась» экзаменэнть максызе. Аволь шожда тевть од стадиононть икелев путсь пертьпельксэсь. Маней валскесь полавтовсь пельсэ ды вармасо, мейле тусь чова пиземне. Тень лангс апак вано, стадиононть потсо ульнесь вадря. Стадиононть конструкциясь цидярдсь варманть ды пизементь ало.
Истя жо вадрясто цидярдынзе ваныцятнень варчавксост стадиононь инфраструктурась. Нолдамонь пунктнэнь ды ванномань зонанть ломантне ютызь куроксто ды вадрясто. Эряви тешкстамс, варчамонь матчсэнть сэтьмечинь топатвомань тевтне мейсэяк эзть явовт масторлангонь чемпионатонь матчтнень шкасто. Полициясь домкасто ваннось багажонть ды ютавтсь а кемевтиця ломантнень ванноманть. А меревиця предметтнэ нельгевсть апак жаля.
Стадиононть потмова куроксто ютамонтень лездасть ламо волонтёртнэ. Эрьва ваныцясь, сехте талакадозеськак, сынст лезксэст вельде муизе трибунатнесэ эсензэ тарканть. Те токшесь ваныцянь весе категориятнень. Башка таркат теезь маломобильной группатнень ды коляскасо инвалидтнэнь туртов.
Стадиононть потсо весемесь теезель сень туртов, ютавтомс ваныцятнень туртов алкуксонь кенярксчи: микшнесть сувенирт, ярсамопельть ды кельмине симемапельть; морасть-кишсть Мордовиянь артисттнэ; пейдевтсть ветицятне, конат терявтнесть нолдамс стадионсонть фанатонь васенце волна (ды нолдасть!); викторинат ды конкурст. Сехте покш мель жо кадсь футболонь аренань валдомтомась. Валдонь спектрась кочказь истя, сон пек малавикс чикансенть ёнов. Вере, трибунатнень велькссэ, уйсть чопода пельть, ало, стадионсонть, мизолдсь валдо чись. Эффектэнть виевгадсь трибунатнень ашо-валдо-тюжа тюссо артомась. Кенярксчинь ёжось, конась якась превсэ-мельсэ, тердсь ушов.
Гайгсть Россиянь ды Мордовиянь Гимнатне, спортонь ветерантнэ налксизь оскань тешксэнь нолдамонть, ды кенярксчись валовсь келес – алкуксонь футболось Саранскойсэ! Васняяк те ёжось ульнесь одокс ды атонадовицякс, трибунатне натой дивазь чатьмонсть. Марявсь ансяк «Мордовиянь» фанаттнэнь марто секторось, ды сыньгак тень тейсть кода бути седейшкава.
Жаль, дивань тевенть кадовсь, мертяно истя, лия тантезэ. 0:0 счётонть пингстэ ваныцятне тусть истямо ёжо марто, буто «Мордовинть» изнизь. Арась, кенярксчись, эзь колавт. Ансяк эзь сато тортонть лангсо вишнине. Сонсь жо тортось пек вадряль. Ды тенесэ кемевтеви эрьвась: Тавла леенть чиресэ чикась ней панжадо ваныцятнень туртов!
«Мордовия» – «Зенит» (Ижевск) матчонть прядовомадонзо мейле журналисттнэнь кевкстемаст лангс каршо валт макссть Россиянь Правительствань Председателенть полавтыцясь Виталий Мутко ды Мордовиянь Прявтось Владимир Волков.
Виталий Мутко: – Мон ёвтан поздоровт Мордовия Республикань ваныцятнень туртов. Течи топавтозь пек редявикс тев: минь панжинек Футболонь коряс масторлангонь чемпионатонь меельце прявт объектэнть – «Мордовия Аренанть». Весемесь ютась вадрясто, весе систематне важодить: управлениясь, штабось, коммуникациятне. Стадиононть пештемась-чамдомась ютась куроксто, ды целанек ошось вадрясто топавтынзе ардомань варчамонь схематнень ды ваныцятнень пачтямонть. Республикасонть топавтозь покш важодема вадрялгавтоманть-мазылгавтоманть коряс, башка сервистнэнь теемга. Течи минь максынек вадря питне аволь ансяк стадиононтень, истя жо маласо аштиця од гостиницатненень. Мордовиясь вадрясто анокстась ды ютавтызе варчамонь васенце матчонть.
Монь кевкстнесть газононть коряс. Газонось паро. Сонзэ туртов прявтось – ундокстнэ. Эряви аламошка чи, тундонь лембе кавто недлят – ды весемесь ули пек вадря.
Ёвтан сюкпря весенень, кить строясть стадиононть, волонтёртнэнень, матчонь анокстыцятненень. Весе службатне варчазь. «Мордовия» клубонтень арсян изнявкст. Икеле сонзэ учить эштё кавто матчт. Эряви седе вадрясто ютавтомс налксематнень ды изнямс.
Владимир Волков: – Минь лисинек масторлангонь чемпионатонтень анокстамонь финишентень. Сехте прявт объектэсь – стадионось, ды гостиницатне, истя жо «Меркьюрись» – анокт. Тевтнень минь топавтынек. Вадрясто ютавтынек варчамонь матчонть.
Ёвтан сюкпря весенень, кие важодсь минек республикасо. Ёвтан сюкпря лезксэнть кисэ Россиянь Минспортонтень ды Виталий Леонтьевичнень. Саранскоесь анок масторлангонь чемпионатонть ютавтомантень, те минек вейсэнь изнявксонок.
Нама, минь учинек изнямо минек команданть пельде, эсензэ лигасонть сон икеле молиця. Минек командась ладязо од стадиононтень, ваныцятненень, конатне пек мелявтыть кисэст.
Виталий Мутко: – Тешкстаса, Россиясо футболось виевгавтови. Масторсонть важодить футболонь малав 2500 школат, косо тонавтнить малав 300 тёжат эйкакшт. Мордовиясо налксест эсенк кастовкст. Уш ней зярыя тынк од ломанте налксить масторонь келес 1,2 дивизиононь клубтнесэ. Те паро. Важодить специалисттнэ.
Масторлонгань чемпионатось максы тенек ветямонь, анокстамонь од содамочить-маштомачить. Кеман, минек футболось карми седе вадря. Прявтокс ашти ёжоськак. Стадионтнэс ломантне саст семиянек, витевель ёжост, региононть туртов матчтне кармаст покш тевекс. Стадионсонть важодезэ wi-fi. Концертэнь программа, мелень витема, весемесь улевель ломантнень вадрякс. Ды те ёнкссонть Саранскойсэ футболонь од стадионось – виев эскелькс икелев.