Саранскоень мэрэсь пресс-конференциясо седясь ды морась раськень морот

Саранскоень мэрэсь пресс-конференциясо седясь ды морась раськень морот

Ошонь пресс-центрасонть ютавтовсь Саранск ошонь округонь прявтонть Пётр Тултаев марто пресс-конференциясь. Ошонь мэрэсь ёвтнесь седе, кода полавтовсь Саранскоесь 2018 иень Футболонь коряс масторлангонь чемпионатонтень.

Республикань Прявтошонь мэрэсь эзь карма сёпомо, сон мелявты, кода ошось ютавтсы мундиаленть. Сон натой видькстась, васенце ковтнестэ, кода ёвтазель, Саранскоесь ютавтсы Масторлангонь чемпионатонть, сонзэ ёмась удомазо. "Саранскоесь лия оштнеде седе пек бажась ютавтомс эсензэ кедьсэ чемпионатонть, ды мон кеман, весемесь юты парсте. Минь тейсынек весементь, ошсонок улезэ футболонь алкуксонь кенярксчи", - мерсь Саранск ошонь округонь прявтось.

Пресс-конференциянть Пётр Тултаев прядызе гармошка марто раськень моронь морамосо.

Кода тешкстызе мэрэсь, сон бажась содавтомс тов пурнавозь журналисттнэнь регионсонть эриця раськетнень культураст марто.

Ушодсь эрзянь ды мокшонь моросто.

"Мон мокшо. Мордовиянь раськетне явовить этнической кавто группас - мокшот ды эрзят, моран тенк мокшокс", - мерсь ошонь администрациянь прявтось ды морызе "Луганяса Келунесь" раськень содавикс моронть.

Музыкань сюрпризэнть Пётр Николаевич поладызе "Кавто цёрат" эрзянь моросонть. Меельцекс морызе весенень вечкевикс "Катюшанть".