Мартонь 18-це чистэ Саранскойсэ ютавтовсь «Минь - вейсэ!» митинг-концерт, конась алтазель Крыменть ды Севастополь ошонть Россиянть марто вейсэндявомань колмо иетнень топодемантень. Те ульнесь раськень алкуксонь кенярксчи, конасонть примасть участия 10 тёжат ломанть. Эень Дворецэнть икелев пурнавкшность республикань важодемань коллективень, общественной вейсэндявксонь ды партиянь, раськень диаспорань представительтне, ветерантт, студентт, республикань творческой сехте вадря коллективть. Митингентень сакшность МР-нь Госсобраниянь Председателесь В.В.Чибиркин, Саранск ошонь округонь прявтось П.Н.Тултаев, МР-нь Прявтонь Администрациянь важодицятне, МР-нь Правительствань членттнэ. Покш мероприятиянть пурныцякс-ютавтыцякс кармасть республикань общественной организациятне. Сценанть лангсто ды площадьстэ одс ды одс гайгсть масторонь Президентэнть В.В.Путинэнь валонзо, конатнень сон ёвтынзе колмо иеде икеле: «Кувать шкадонть ды стака уйнемадонть мейле Крымесь ды Севастополесь велявтсть тиринь гаваньс, свалшкань приписка марто портс - Россияв». Общественной движениянь активисттнэнь пельде марявсть кенярксов рангомат: «Сюкпря Крымень ды Севастополень эрицятненень мельцек-мельцек молиця позициянть кисэ. Минь печтясынек весе стакачитнень, секс мекс минь вейсэ. Минь вейсэтяно!»
«Единой Россиянь Молодой гвардиянь» республикань штабонь прявтось Е.Миронов, митингень ютавтомань анокстыцятнень эйстэ вейкесь, кортась седе, Мордовиясь покш мельспаросо кирдизе Крымень эрицятнень мелест вейсэндявомс Россиянть марто. Тов пачтявсь гуманитарной лезкс, тосо важодсть педогогической отрядт, кизна Крымев оймсеме якасть Мордовиянь эйкакштне. Сехте ёроковтне примасть участия «Таврида» од ломанень форумсонть. МР-нь Прявтонть В.Д.Волковонь кармавтоманзо коряс Крымев кучозь Мордовиядо книгат, ней тосо пурнави цела библиотека, косо карми ёвтневеме масторонь весе регионтнэде.
Е.Сыщиков, Мордовиянь Госсобраниянь депутатось, тетянь-авань ассоциациянь пурныцясь, лемдизе Крыменть - Россиянь ламо эйкакшонь семиянь членэкс, косо весемесь кирдеви вейсэнь-вейсэнь лездамонь ды ялгаксчинть лангсо. Уш тедеде тетянь-авань вейсэндявксонь активисттнэ арсить панжомс Крымсэ эйкакшонь тонавтомань куншкакурот.
Раськень ялгаксчинь кудонь республикань общественной культурно-просветительской организациянь прявтось Р.Акашкина ледстизе, кодат кеметь духовной сюлмотне Мордовиянть ды Крыменть ютксо, ды васняяк минек вейсэндить героической исень чись, сон сюлмавозь Ушаков ине флотоводецэнть лемензэ марто. Неень шкане Крымсэ эрить 20 тёжат эрзят-мокшот, важоди Ушаковонь лемсэ Мордовиянь раськетнень вейсэндявомань куншкакурось, «Ялгат» мокшэрзянь культурань вейсэндявксось, ладязь сюлмот Крым Республикань Раськетнень ялгаксчинь кудонть марто.
Эштё куватьс эзть туе ошонь эрицятне площадьстэнть. Саранскоенть велькссэ гайги музыка, лыкавтнить флагт, ды эрьванть ульнесь мелезэ морамс ялгаксчиде, часиядо, важодемадо ды тундодо морот. Олякстомтозь Крымень тундонь лембе врамась пачкодьс Саранскоенть видьс.