Саранскойсэ чествовизь «Православной тонавтыця 2016» Равчирень федеральной округонь II пелькстамонь изницятнень ды лауреатнэнь

Ноябрянь 25-це чистэ Саранскоень Раськень драмань теартасонть явшевсть казнеть «Православной тонавтыця 2016» Равчирень федеральной округонь II пелькстамонь изницятненень ды лауреатнэнень. Тей сакшность ПФО-со РФ-нь Президентэнть полномочной представителенть полавтыцясь Олег Мельниченко, Мордовиянь Прявтось Владимир Волков, Саранскоень ды Мордовиянь митрополитэсь Зиновий ды лият.

Олег Мельниченконь валонзо коряс, «Православной тонавтыця» пелькстамонть вельде явови лезкс тонавтыцятненень, конат максыть содамочить «Основы православной культуры» предметэнть коряс, лезды сынст шкинемань ушодоматненень.

«Пелькстамонь прявт пельксэкс ашти те предметэнть коряс методикань важодевкстнэнь анокстамось ды тонавтыцятнень юткова сынст пачтямось. Сон лезды теемс корпоративень культура школань коллективтнесэ, лезды вейсэндямс тонавтыцятнень, касты сынст маштомачист», - мерсь Олег Мельниченко.

Владимир Волков эсь кортамосонзо ёвтась сюкпрянь вал Равчирень федеральной округсонть Россиянь Президентэнть полномочной представителентень Михаил Бабичнень ды сонзэ полавтыцянтень Олег Мельниченконень максозь праванть кисэ примамс сехте вадря тонавтыцятнень, конат Мордовиясо максыть содамочить «Основы православной культуры» предметэнть коряс.

«Минь чарькодинек тень кода покш таликань теемань редямонть, конань меельце иетнестэ минек республикась теи од ломантнень патриотизмань воспитаниянть коряс, православиянь веранть кемекстамосонть ды сонзэ лувсо раськетнень вейсэндямосонть, - мерсь Мордовиянь Прявтось. - Ламо иень перть Мордовиясь ловови истямо регионокс, косо властень органтнэнь, духовенстванть ды обществанть вейсэнь виест вельде вельмевтевить ды виевгавтовить духовно-нравственной питнейчитне ды койтне-кирдатне. Минь свал нежединек сень лангс, вейсэнь мельтнень-арсематнень чарькодемась, вейсэндямось ды вейкень-вейкень чарькодемась  ашти весе Россиянть ды минек тиринь Мордовиянть вадря эрямонь лувокс».

Республикань Прявтось тешкстызе, меельце комсь иетнень перть регионсонть стявтозь ды одкстомтозь православиянь малав 400 храмт, вельмевтезь сядот озномо пурнавома таркат, ёроковсто моли тевесь Церьковантень максома сонзэ икельксэнь зданиятнень. Весе неть изнявкстнэнень покш питне максть Рузонь православиянь церьковань иерархтне.

"Весе христиантнэнь туртов тешксэв кавто тёжань иестэнть саезь ды неень шкас Весе Русень Патриархтне ветексть сакшность минек республикантень. Ды эрьва содавтомась кандсь историянь покш смусть, максть тенек вийть ды кемема, лездась топавтомс вадрят тевсть. Истя, 2006 иестэнть Алексий Патриархось светизе Феодор Ушаковонь лемсэ минек Кафедральной Соборонть. Ютазь иень октябрясто Московонь ды Весе Русень Иневанькс Патриархось Кирилл светизе Кириллэнь ды Мефодиень иневанькс равноапостолтнэнь, Словенской тонавтыцятнень лемсэ храмонть", - толковизе В.Д.Волков.

Республикасонть келейстэ тешкставсть Русень лемдемань 1025 иетнень топодемась, Эрзянь-мокшонь раськенть Россиянь государствань лия раськетнень марто вейсэндявомань тёжа иетне, Иневанькс Владимирэнь преставлениянь Тёжа иетне, Сергей Радонежскоень 700 иетне ды ламот-ламот лиятне.

Мордовиянь Прявтось ледстинзе масторонь Президентэнть В.В.Путинэнь валонзо, конась мерсь "течи обществанть вейсэндявоманть туртов эрявить оймень виевчи, нравственной питнейчить ды нежеть".

"Ды тенесэ покш тарка явови тонавтомань ды воспитаниянь ёнксонтень. Секскак течи минек эйдень кужотне, школатне, колледжтне, техникумтнэ ды вузтнэ кармасть минек эйкакштнень ды од ломантнень туртов аволь ансяк содамочинь пурнамонь, истя жо духовной ды культурань ёнкстнэнь кемекстамонь таркакс", - тешкстызе Владимир Волков.

Сон мерсь, Мордовиясо пурназь истямо важодемань сатышка содамочить-маштомачить образованиянь весе уровнятнесэ, эйдень кужотнестэ саезь, вузтнэнь самс. Тевс нолдавить духовно-нравстенной воспитаниянь коряс авторонь программатне. Равчирень федеральной округонть коряс республикась сови сехте вадрятнень ютксс "Основы православной культуры" предметэнть школасо тонавтоманть коряс - 75%.

"Республикань вузонь тонавтыцятне анокстасть лия ёнов а молиця тонавтомань пособият "Основы православной культуры" ды "Основы исламской культуры", конатнень лувсо ашти тонавтомань раськень культурась. Иестэ иес республикань районтнэсэ ламолгадыть кадетэнь дв казаконь класстнэ. Ней истят 133 класстнэсэ тонавтнить 3500 эйкакшт. Тесэ тонавтомань процессэсь нежеди гражданской, патриотонь ды духовно-нравственной воспитаниянь сехте вадря койтнень лангс. Покш лезкс явить МЧС-нь, МВД-нь, ДОСААФ-нь важодицятне, армиянь ды флотонь ветерантнэ, казечествантень совицятне", - тешкстызе МР-нь Прявтось.

Зиновий Владыкась тешкстызе, течи пек пштистэ ашти эйкакштнень ды од ломантнень патриотизмань ды духовно-нравстенной воспитаниянь кевкстемась. Тонавтыцятнень лангс путовить покш кемемат кастомс эйкакштнень превеекс, весемес чарькодицякс, тонавтомс вечкеме прявт питнейчитнень ды тиринь масторонть.

"Нама, эйкакштнень кастомасонть покш таликаст тетятнень-аватнень, ансяк тонавтыцяськак саи башка тарка, сехте пек масторонть туртов стака шкатнестэ", - толковизе Саранскоень ды Мордовиянь Митрополитэсь.

Тешкстасынек, пелькстамосонть 36 тонавтыцятнень юткссо изницякс кармасть Мордовиянь колмо тонавтыцят.