Правительствань икелень промкссонть кортасть национальной проекттнэнь лувсо ярмактнень тевс нолдамодост. Ней Мордовиянь Финансонь министрась Сергей Тюркин пачтясь государственной программатнень эрямос совавтомадост, сынст топавтомас 2022 иестэ явозь 6 миллиард целковойть. Ацамковонь 1-це чинтень сынст тевс нолдамось - 79,6%.
Аволь весе ярмактнень тевс нолдамось редяви сеть госпрограмматнень лувсо, конатнень ветить региононь Промышленностень, наукань ды од технологиятнень министерствась ды Цифровой виевгавтомань министерствась. Кода тешкстызь министерстватнень руководительтне, иенть прядовомс весе тевтне улить прядозь.
Нацпроекттнэнь ды госпрограмматнень топавтомадост башка, Мордовиясо ветяви важодема сы иестэ национальной проекттнэнь топавтомс ярмактнень явомань коряс федеральной министерстватнень марто вейсладямотнень тешкстамонть коряс. Премьер-министрась Владимир Сидоров кармавтсь эрязкавтомс те важодеманть: ацамковонь 23-це чинтень эряви тешкстамс 90 вейсладямот.
Ванновсь Мордовиянь Прявтонть Артём Здуновонь Государственной Собраниянтень Кучомань топавтоманть коряс 2023 иентень Правительствань тевдеемань Программань проектэсь. Тевдеемань Программантень совавтозь 350 ламо мероприятият экономикань эрьва кодат отраслятнесэ.
Спортонь ды од ломанень политикань министрась Александр Савилов пачтясь, 2023 иестэ регионсонть арсеви ютавтомс 650 ламо физкультурань ды спортонь мероприятият, сынст ютксо раськеютконь, весероссиянь ды регионъютконь уровнянь малав 100 пелькстамот. Спортонь прявт пелькстамотнень ютксо: толонь мадстемань-идемань спортонть коряс масторлангонь чемпионатось, ВМХ-спортонть ды шожда атлетиканть коряс пелькстамотне.
Од ломантнень тевест коряс Госкомитетэнь председателесь Анастасия Гришнева евтнесь, сы иестэ Мордовиясо анокставить 2000 ламо мероприятият ды акцият Од ломанень политикань виевгавтомань программань топавтоманть лувсо. Мордовиясо ютавтовить весероссиянь ды округонь малав 10 пелькстамот, истят кода Вожатойтнень тевдеемань коряс панжадо чемпионатось, Равчирень федеральной округонь ««IQ ПФО» интеллектуальной олимпиадась, Студенттнэнь раськеютконь чись.