Маень 12-це чистэ Саранскойсэ официальна панжовсь аэропортось. Торжественной мероприятиясонть ульнесть Россиянь транспортонь министрань тевтнень топавтыцясь Максим Соколов ды Мордовия Республикань Прявтось Владимир Волков.
Ледстясынек, аэропортонь комплексэнь одкстомтоманть лувсо строязь кавто терминалт - эсенек масторонь ды раськеютконь коштонь линиятнень туртов, топавтозь важодемат ливтямонь-озамонь полосатнень витнемга, рулямонь од китнень, коштонь движениянь управлениянь объекттнэнь строямга, самолётонь аштемань таркатнень ламолгавтомга перрононть келейгавтомга.
Минтрансонь руководителесь тешкстызе неень шкань од аэропортонть эрявиксчинзэ республиканть седе тов виевгавтоманзо туртов, истя жо сонзэ инвестициянь ды туристической привлекательностенть кастомга, истя жо ёвтась сюкпря Мордовиянь Прявтонтень сонзэ апотамонть ды анокчинь невтеманть кисэ чемпионатонь тевкадовксонть лувсо те прявт пректэнть топавтомасо.
Максим Соколов ледстизе, Саранскоень аэропортось ушодсь примамо свалшкань рейстнэнь эштё февральстэ, ды республикань ламот эрицятне ды Саранскоень инжетне уш макссть питне сонзэ неень шкань вешематненень ладямонтень, вадрячинтень.
«Весе од инфраструктурась строязь масторлангонь чемпионатонтень анокстамонь программанть коряс, ды кементь иень перть карми вадря путовксокс республиканть седе тов виевгавтомга, – мерсь Минтрансонь прявтось. – Ульнесь аволь шожда муемс финансирования, кода региононь, истя жо федеральной, ульнесть башка стакачить. Ансяк командасо важодезь, масторонь Президентэнть ды Правительстванть лезксэст вельде, минь явинек эрявикс ярмакт, ды те объектэсь футболонь масторлангонь первенстванть ушодовомадонзо ламодо седе икелев ушодызе важодеманзо. Течи Мордовиянь транспортонь инфраструктруась целанек анок масторлангонь чемпионатонтень ды тензэ максови покш питне».
Мордовиянь Прявтось Владимир Волков ёвтась сюкпря республикань эрицятненень те покш тевенть кувалма. «Аэропортось – чемпионатонь тевкадовксонь прявт объект, конась карми важодеме ломантнень лезэс ламо иеть. Те прявт проектэсь топавтозь масторонь Президентэнть ды Правительстванть, Минтрансонть ды башка Максим Юрьевич Соколовонь, истя жо ПФО-со РФ-нь Президентэнть полномочной представителенть Михаил Викторович Бабичень лезксэст вельде. Минек аэропортось лади неень шкань весе вешематненень, истя жо сэтьмечинть коряс. Республиканть туртов прявтокс ашти, чемпионатонть прядовомадонзо мейле, сон ванстовлизе раськеютконь статусонть», – тешкстызе Мордовиянь Прявтось.
Максим Соколов мерсь, сы недлясто те кевкстеманть коряс ушодсы важодеманзо межведомственной комиссиясь. Сон карми вешнеме решеният, конат лездыть кадомс Саранскоентень раськеютконь терминалонть.
Мордовия Республикань Прявтонть пресс-службась