Апрелень 28-це чистэ Республикань Кудосо ютавтови республикань пелькстамотнесэ изницятнень ды призертнэнь чествованиясь. Казнетнень ды дипломтнэнь явшесынзе Мордовия Республикань Прявтонь тевтнень нурька шкас топавтыцясь Владимир Волков.
Маень 1-це чистэ Саранскоень Советской площадентень кармить ютамо важодемань коллективтне. Тесэ 11 чассто ушодови 2016 иень итогтнень коряс предприятиянь, организациянь ды учреждениянь коллективтнень республикань трудонь соперничествань изницятнень чествовамось
Арсеви ютавтомс Военной ды трудонь подвигень мемориальной музеень арт-объекттнэнь выставка, Саранскоенть - футболонь коряс мирэнь чемпионатонь ютавтыцянть - презентация, истя жо Мордовиянь Туристэнь-кулянь куншкакуронть выставкань экспозиция.
Ошонь эрицятненень ды инжетненень шкинемань сехте вадря номерэнзэ невтсынзе «Умарина» морамонь ды киштемань государственной ансамблясь.
Фонтан вакссо валгома таркасонть ютавтови декоративно-прикладной шкинемань, раськень художественной промыслань ды ремеслань теевкстнэнь выставкась.
Теде башка, 12 чассто панжови культурань ды оймсемань парконь тундонь-кизэнь 82-це сезонось.
Кенярксчинь мероприятиятне ютавтовить Мордовиянь муниципальной весе районтнэсэ.