2020 иестэ саезь ярмактне, конат явовить уроз-эйкакштненень эрямонь таркатнень максоманть туртов, эрьва ие ламолгавтовить – те Мордовиянь руководителенть мелесь. Тедеде республикасонть уроз-эйкакштненень явозь 88 квартират. Бути саемс, невтемакс, 2019 иенть, сестэ урозтнэнень максозельть весемезэ 35 квартират.
Мордовиянь Прявтось ацамковонь 19-це чистэ сась Титовонь куросо 135-це кудонтень – те од кудо, косо улить квартират урозтнэнь туртов, ташто кудосто одс ютавтозетнень туртов. Теде башка, те кудосонть эрямо таркатнень федеральной программанть коряс, конань яволявтызе масторонь Президентэсь, сайсь квартира Херсонской областень эрицясь, конась сась Мордовияв.
Артём Здунов покш мель марто ваннынзе од квартиратнень ды кудонь перька тарканть. Строицятне топавтызь икелест путозь весе тевтнень! «Неяви, кудось пек паро. Ули эйкакшонь площадка, мини-футболонть туртов пакся, Пазось максозо, штобу ломантне тесэ эрявольть уцяскавсто, – мерсь республикань руководителесь. – Тедеде минь кавтос ды пельс ламолгавтынек квартиратнень, конатнень максстано уроз-эйкакштненень, ансяк теяк пек аламо. Очередьсэ аштить 1,5 тежа ломанть, те кармавты эрязкавтомс квартиратнень максоманть. Те кудонть коряс минек ули Херсонской областень эрицятнень туртов сертификатонь тевс нолдамось, неть ломантне састь миненек. Сюкпря Россиянь Президентэнть Владимир Владимирович Путинэнь кармавтомантень, Правительствась куроксто сонзэ топавтызе – уш 13 квартират тедеде максстано минек соотечественниктненень».
«Минь вастовинек од кудотнес совицятнень марто – ломантне мельспаросот. Эрьва квартирась уштови башка. Республикань Прявтонь кармавтоманть максовиця эрямо таркатнень ламолгавтоманть, ломантнень эрямонь условияст вадрялгавтоманть коряс карматано топавтомо седе тов», – тешкстызе Мордовиянь строительствань ды архитектурань министрась Алексей Гришакин.
Артём Здунов тешкстызе, сы иестэ путови тев: нилеце пельксэс ламолгавтомс уроз-эйкакштненень максовиця квартиратнень. Истя жо республикань парламентсэнть ней анокстави законопроект те категориянтень эрямонь таркатнень лангс сертификаттнэнь максомадо.
Артём Здунов кортась од кудотнес совицятнень марто. Херсонской областень эрицянть марто кортась важодемань тарканть муемадо – электрикень специальностесь республикасонть эрявикс. Правительствань Председателень полавтыцясь Инсаф Хайруллин ды строительствань ды архитектурань министрась Алексей Гришакин алтасть маласо шкастонть муемс тензэ важодема строямонь организациятнестэ вейкестэнть.
Мордовия Республикань Прявтонь пресс-службась