Строямось ветявсь «Демография» национальной проектэнть вельде. Финансированиянь покшолмась кармась 985 млн. целковойть, сынст ютксто федеральной бюджетэнь ярмактне - 914 млн, республикань – 71 млн целковойть.
Зданиятнень комплексэсь ашти колмо секциятнестэ вейсэнь покшолмасо 15 тежат кавонзазь метрат. Весе корпустнэ сюлмавозь эсь ютковаст.
Од кудосонть-интернатсонть теезь пек вадря условият сыре ломантнень туртов. Те вейке ды кавто ломаньс эрямонь нупальть, телевизор, холодильник, сплит-система, санузел марто. Эште тесэ улить вадрясто теезь оймсемань туртов таркат, медицинань нупальть, лецямонь физкультурань зал, столовой, парикмахерской.
Кудонть-интернатонть юрсо истя жо важодить «Социальная передышка» эрицятнень нурька шкань улемань отделениясь ды чить улемань отделениясь. Пенсионертнэнь ды инвалидтнэнь туртов тесэ ютавтовить эрьва кодат занятият, истя жо стамонь-викшнемань, алтыматнень кодамонь коряс. «Прявтось – минек ули тевенек ды минь вастовтано-кортатано, те пек питней», – кортыть сыре ломантне.
Интернатось карми районсонть сыре ломантнень мелест-ванновтост коряс вастовомань-кортамонь туртов куншкакурокс. Интернатсонть истя жо карми важодеме технической средстватнень прокатонь пункт, малавикстнэнь мельга якамонь тонавтомань коряс школа.
Пищеблоконь важодицятне евтнесть республикань руководителентень, сынь бажить пидемс-панемс пек тантейстэ, кода кудосо.
Од зданиясонть башка мель явозь сэтьмечинтень. Весе нупальтнесэ ули автоматической пожарной сигнализация, кирваземадо валсо пачтямонь система, вентиляциянь система ды качамонь саиця система. Ули видеонаблюдения. Ломантнень куроксто эвакуациянть туртов теезь колоньгеменде седе ламо запасной лисемат. Истя жо путозь Росгвардиянь маласо подразделениянтень талновтомань пачтямонь лисема марто ванстомань пост. Социальной учреждениянть маласо теезь аволь покш стадион, путозь тренажерт, истя жо кизэнь эстрада, сад, теплица ды пире.
Кудонтень-интернатонтень кельгстявить 150 ломанть. Ламотне юткстост ломантне, конат понгсть эрямонь стака шкас ды конатненень эряви якамо.
Артём Здунов кортась интернатсонть эриця пенсионертнэнь марто, ютксост Ине Отечественной войнань участникень довась Анастасия Николаевна Ильина ды тылэнь важодицясь Анна Кузьминична Чернова. Апак вано ламо иетнень лангс, сырькайтне а емавтыть оймень виенть. Сынь пек кенярдсть цецятненень, конатнень казинзе тенст Артём Здунов. Мелень явомась – те сехте прявтось сыре ломантнень туртов.
Мордовиянь Прявтось истя жо кортась учреждениянь персоналонть марто. «Сюкпря Президентэнтень национальной проектэнть кисэ, конань вельде теезь истямо интернат. Кеман, сырькайтненень ды покштятненень вечкевить условиятне, конат тесэ теезь», – мерсь медсестрась Марина Шарова.
«Прявтось – тесэ тенст улезэ вадря, эрямось лаказь лаказо, маряст эсь пряст эрявиксэкс», – тешкстызе Артём Здунов.
Мордовия Республикань Прявтонь пресс-службась