Ламо иетнес васенцеде Мордовиянь финансонь системась пряды финансонь иенть вадрясто. Редявикстэ кассть эсь доходтнэ. Республикань бюджетэнть коряс иенть перть эсь доходтнэ покшолгавтозь 5,8 млрд целковойтнес. Касыть муниципалитеттнэнь доходост.
Поладови эряза важодемась просроченной кредиторской долктнень пекстамонть коряс. Республикань бюджетэнть коряс тедеде просроченной долкось киртявсь кавксть (ульнесть 547 млн целковойть, кадовсть – 272 млн), 2021 иень якшамковонь 1-це чинть коряс 10-де ламоксть (ульнесть 2,5 млрд целковойть). Текень пингстэ вишка ды средней предпринимательствань субъекттнэнь икеле малав весе просроченной долкось пекстазь.
«Россиянь Федерациянь Президентэнть В.В. Путинэнь покш лезксэнзэ вельде миненек удалась целанек полавтомс тевтнень государственной долконть коряс, – тешкстызе Артём Здунов. – Мордовиянть лангсто целанек каязь весе ограничениятне, конатне ульнесть сонзэ марто сюлмавозь».
Иенть перть долкось киртявсь 16 млрд целковойс. Долконь нагрузкась киртявсь 237 проценттнэстэ 102% видьс. Минь путтано тев: те иенть прядовомс топавтомс долконь нагрузкань невтевксэнть – 100% аволь седе ламо (эсь доходтнэнь касоманть вельде)».
Региононь рыночной долконь покшолмась неень шкане 3,2 млрд целковойть, те малав 23 млрд целковойтнеде седе аламо 2019 иень якшамковонь 1-це чинь коммерческой долконь покшолманть коряс. 2022 иестэ процентэнь пандоматнень лангс ютавкстнэ (466 млн целковойть) кармить сехте вишкинеть меельце 11 иетнень перть (2012 иестэ саезь). 2019 иенть коряс процентэнь ютавкстнэ киртявсть 5-ксть.
Текень марто, кода тешкстызе республикань Прявтось, кадовить апак вите кевкстемат, конатнень лангс эряви явомс покш мель.
Редявиксэкс кадови местной бюджетнэнь просроченной кредиторской долктнень покшолмась. Апак вите бизнесэнть икеле муниципалитеттнэнь долктнень стакачись.
Целанек жо, республикань Минфинэнть пачтямонзо коряс, местной бюджетнэнь налогонь ды аволь налогонь доходтнэ кассть, 11 ковтнень перть касомась кармась 117%.
Текень пингстэ ацамковонь 1-це чинтень улить физической лицятнень пельде долкт модань налогонь, ули-паронть лангс налогонть коряс. «Истя, невтемакс, Теньгушевань енкссо велень поселениятнес тедеде пачтязь эсь доходт 6 млн целковойть, ули-паронь налогтнень коряс долкось кармась 1,2 млн целковойть, те малав 20% пурназь ярмактнень эйстэ, – тешкстызе финансонь министрась Сергей Тюркин. – Районтнэнень эряви налогонь органтнэнь марто вейсэ ванномс долконь а пандыцятнень, эдь тувталтнэ эрсить эрьва кодат: паряк, ломантненень эзть пачкоде налогонь пандомань туртов квитанциятне эли сынь кучозь электронной сервистнэнь вельде, пандыцясь жо а машты тов совамо».
Финансонь дисциплина ней улезэ весемесэ! Государственной финанстнэнь марто аволь видестэ важодемась, конань топавтсть региононь икелень руководительтне, редяви неень шкас. Артём Здунов ледстизе тевенть, конась кортавсь икеле чистэнть парламентэнь политической партиятнень лидертнэнь марто вастовомасонть.
«Республикасонть ули «Мира» ероков эйкакштнень редямонь ды сыненст лездамонь куншкакурось – те Саранск ош, Транспортной куро, 19. Ней минь те зданиянть емавтано. Велень хозяйствань тевтнень туртов саезель кредит - ракшань кирдемань комплексэнть строямс. Нама, сон апак топавто. Кредитэнь смустесь апак топавто, залогсонть – минек ули-парось. Ледстяса, икеле миненек удалась ливтемс залогсто кавто театрат – раськень ды музыкань. Те зданиянть коряс уш ули судонь решения, сон юты «Россельхозбанконтень». А эдь «Мира» куншкакурось – те минек каштанчинек! Ды вана истя сонзэ эйкакштнень кедьстэ ней саемс! – Мордовиянь Прявтось эзь кекше ацирьгадоманзо. – Минь путынек тов 215 млн целковойть, истя жо республикань бюджетстэ, явовтынек федеральной ярмакт, ды ней тень емавтано!»
Те невтемась аволь вейкине. Республикасонть содавикс «Развитие села» фондось истя жо аволь видестэ важодсь финанстнэнь марто. Тень кувалма Артём Здунов севнызе Правительствань Председателенть Владимир Сидоровонь.
«Владимир Николаевич, мон тыненк уш аволь весть кортынь «Развитие села» обществанть коряс. Вана 2016 иестэ явозь 115 млн целковойть. Сынь тусть «Знамя» ООО-нь. А ведомствань ваннома, а ярмактнень велявтома арась. Тосо ней, нама, ушодозь уголовной тев, ансяк ярмактне арасть! Районтнэнь прявттнэ, зярдо мон сакшнан, вешить ярмакт эрьва кодат тевтнес: миненек бу тесэ строямс, миненек бу тесэ витнемс. Весе те сядот миллионт целковойть!»
Ютавтозь ванномась невтизе, кавто иетнень перть «Развитие села» АО-сь лизингень 90% договортнэнь тешкстась «Воля» ООО-нть марто. Те невти, структурась, конань 100% акциятне государстванть кедьсэ, топавтсь частной предприятиянть мелензэ.
«Владимир Николаевич, тынь содатадо, кие тосо прявтось – Федоров, сон ульнесь тынк полавтыцякс, зярдо тынь ульниде райононь прявтокс. Ансяк кодаткак шаштомат арасть. Вейке миллиардт тусь – ды весе, ярмакт арасть. Истят жо тевтне республикань кастомань-кепетемань корпорациянть коряс. Мон Владимир Николаевичнэнь максынь возможность улемс директортнэнь советэнь прявтсо, штобу топавтс ярмактнень велявтоманть. Ансяк велявтома арась! Корпорациянть ды «Воля» ООО-нть ютксо тешкстазь заемонь договорт 346 млн целковойтнень покшолмасо. Ансяк долкось нейгак ашти, ярмактне апак максо. Кармавтан финансонь блоконтень – пурнадо прявттнэнь совет, полавтынк Владимир Николаевичень. Кинень бути тень кисэ эряви кандомс ответственность!»
Мордовиянь Прявтось явовтынзе промксонтень пурнавозь районтнэнь прявттнэнь ды Правительствань члентнэнь мелест: финансонь дисциплинась токши весень ды эрьванть. «Коллегат, ярмактне истяко костояк а саевить. Аволь шожда пурнамс налогтнень, седе пек минек шкане. Эрявить ярмакт инвестпроекттнэс, зарплататнень эряви кепедемс. Лисни, минь ярмактнень пурнатано казнас, а мейле кодат бути частной компаниятненень максстано сынст апак велявто, ды эште емавтано минек ули-паронть. Те виде? Те мезень кисэ истя Мордовиянть а вечкемс? Ветядо порядок. Куроксто пурнадо Прявттнэнь совет. Весе кевкстематнень коряс – монень отчет».
Артём Здунов тешкстызе: республикасонть финанстнэнь марто тевесь ладявсь, ансяк сонзэ эряви кирдемс. Седе тов истят покш коламот иляст уле.
Мордовия Республикань Прявтонь пресс-службась