Сынст ютксто вейкесь – Ташто Шайговань велень школась, тонавтницятнень ламочист коряс районсонть сон сехте покш. Тосо тонавтнить 413 эйкакшт, кельгстявить – 629 тонавтницят.
«Минек школань зданиясь строязь 1988 иестэ. Те шкастонть саезь педе-пев витнема эзь ютавтово. Эрявсь одкстомтомс латонть, канализациянть, водопроводонть, отоплениянть, ламо эряви теемс стенатнень витнемаст коряс. Весе неть тевтне ушодозь эйзюрковонь 18-це чистэ, ней эрязасто моли потмонь отделкась», – евтнесь велень школань прявтось Галина Венчакова.
Эште вейке школа одкстомтови Новотроицкое велесэнть. Зданиясь строязь 1984 иестэ. Уш витнезь латось, мазылгавтозь ушо енксось. Ней теевить киякстнэ, электропроводкась, вальматне ды истя седе тов. Школань помещениясонть тееви столовойгак, икеле сон ульнесь лия корпуссо. Сонзэ туртов уш рамазь од оборудования.