Кочкуровань эйкакшонь искусствань школанть сюпав историязо – сон важоди районсонть 1961 иестэнть саезь, те зданиясонть – 1982 иестэнть саезь. Тей яксить сядодо ламо эйкакшт. Тонавтыцятне ветить занятият хореографиянь, живописень, декоративно-прикладной шкинемань ды музыкань коряс – тонавтыть вокалонтень, музыкальной инструменттнэсэ налксемантень.
Национальной проектсэнть улемась, кода евтнесь школань прявтось Елена Тарима, лездась одкстомтомс зданиянть, совавтомс тов од эрямо. Президентэнь проектэнть коряс явозь ярмактнень вельде (те 21 млн целковойтнеде седе ламо) целанек полавтозь инженерэнь коммуникациятне ды латось, теезь од крыльця, потолок, путозь кенкшт ды вальмат, вадрялгавтозь-мазылгавтозь школанть перька таркась. Условиятне пек вадрят: покшт валдо нупальть ды залт, 55 ваныцянь таркас амфитеатра марто концертэнь зал. Школасонть путозь неень шкань музыкань оборудования.
Школань выставкань таркатнесэ невтезь раськень оршамопельтне ды музыкань инструменттнэ. Башка нупаль явозь сценань оршамопельтнень ды карсемапельтнень ванстомаст туртов. Тесэ важодить пек вадря педагогт, конат максыть эйкакштненень эсь ерокчист.
Искусствань школань каштанчись – «Гармония» инструментальной ансамблясь, конантень совить тонавтыцятне ды эйкакштне. Коллективесь эрьва ие ардтни «Шумбрат, Мордовия!» фестивалентень.
Бутяева Светлана Дмитриевна, Кудашкина Вера Васильевна, Мария Агейкина, Маргарита Осипова, Богдана Теплякова налксизь республикань Прявтонть туртов Сергей Колганонь «Несказанная песня» произведениянть. «Топавтовсь минек мелесь – минек школасо ней лембе, мазый, вадря! Те алкуксонь дивань тев!» – мерсь «Гармониянь» руководителесь Светлана Бутяева.
Артём Здунов тонавтыцятнень ды эйкакштнень чамаст коряс чарькодсь: тонавтнемс ды тонавтомс истят условиятнесэ – покш мельспаро. Мордовиянь Прявтонтень евтасть сюкпря «Культура» нацпроектэнтень искусствань школанть совавтоманзо кисэ.
Мордовия Республикань Прявтонь пресс-службась