Мордовиясь эрязасто топавты важодеманть питневтеме пси ярсамопельсэ школасо тонавтницятнень андомаст коряс. Кода те важоди тонавтнема иенть ушодовомсто сась ваномо Россиянь Федерациянь просвещениянь министрань васенце полавтыцясь Дмитрий Глушко. Мордовиянь Прявтонть Владимир Волков марто федеральной чиновникесь ульнесь «Тавла» тонавтнемань куншкакуросонть».
Пандемиянть шкасто саранскоень 17№ школась важоди башка лувсо. Совамсто аштить медицинань важодицят, конат онкстнить эйкакштнень температураст. Башка графикенть коряс сынст полавтыть тонавтыцятне. Дмитрий Глушко ды Владимир Волков истя жо ютасть термометрия, кедень дезинфекция ды оршасть маскат – вешематнень эряви топавтомс весенень.
– Ней школасонть эрьва классонть туртов башка расписания. Эйкакштне кунсолыцят, сыть ёвтазь шкантень. Те лезды а пурнамс школасонть ламо эйкакшт, ды а нолдамс коронавирусонть, – толковизе инжетненень «Тавла» тонавтнемань куншкакуронь прявтось Светлана Лиманская.
Седе тов ютавтовсь экскурсия школань кабинетнэва. РФ-нь Просвещениянь министрань васенце полавтыцясь кевкстни, кода моли класстнэсэ коштонь ванськавтомась, кие тень мельга ваны. Дмитрий Глушконень толковить, школань кабинетнесэ улить эсенек республикасо нолдазь мобильной бактерицидной лампат. Технической персоналось графикень коряс кандтни эйсэст ды пштистэ ваны тевс нолдамонь вешематнень мельга.
Светлана Лиманская невтинзе инжетненень мастерскойтнень, косо эйкакштне эсест кедьсэ стыть ды кодыть, теить чувтосо ды кшнистэ теевкст. Ваннызь биологиянь кабинетэнть.
– Подгруппасонть ансяк тейтерькат! Тынь цёрынькатнень тей а нолдатадо? Эдь самай цёратне – вадря врачт ды ученойть, – мерсь Дмитрий Глушко.
Толковизь, цёрынетне те шкане тонавтнить физика ды информатика.
Дмитрий Глушконень невтизь спортивной залонть, бассейнанть, актовой залонть – истямо оснащения школатнесэ чуросто неят. Прявтось, тесэ весемесь важоди. Спортонь секциятне пек вечкевить тонавтницятнень туртов, сценась чаво а эрси.
Инжетне совасть школань столовойс, сон покш, валдо ды ванькс. Тарка саты венень, ванстови социальной дистанциясь. Ярсамс макссть – рис марто котлетт, ой марто бутерброд ды лимон марто чай. Эйкакштне ярсыть мельспаросо.
– Менюсь кемекстазь МР-нь Роспотребнадзоронть марто. Аватненень ды тетятненень мереви варштамс школань сайтстэ, мезде ярсыть сынст эйкакшост. Вишка классонь весе тонавтницятне ды 80% покш классонь тонавтницятне ярсыть пси ярсамопельде, – толковизе Светлана Лиманская.
Эйкакштненень мереви ярсамс аволь ансяк столовойсэ. Курок тесэ карми важодеме школань буфет. Менюсонть ансяк эсенек производительтнень пельде лезэв ярсамопельть. Ды кодаткак наличной ярмакт! «Тавласонть» топавтови «Школьная карта» проектэсь. Сонзэ вельде мереви ваномс тетятнень-аватнень ды бюджетэнь ярмактнень мельга, картантень мереви путомс ярмакт терминалонть вельде.
Дмитрий Глушко ёвтнесть школасо ярсамопелень коряс тетятнень-аватнень марто сюлмавомань од сервистэнть, конась неть читнестэ нолдави Госуслугань порталсонть.
Россиянь Федерациянь Просвещениянь министрань васенце полавтыцясь Дмитрий Глушко ваннызе Мордовиянь товартнэнь выставканть.
– Масторонтень эряви тонавтнемс минек пельде, – мерсь Мордовиянь Прявтось Владимир Волков ды ёвтась мель Министерствань представителентень теемс Мордовиянть ярсамопелень стандартнэнь арсемаст-анокстамост коряс экспериментэнь площадкакс. Кортамось моли школань менюнь тонавтнемадо, рациононь анокстамодо, истя жо эйдень кужотнес ды вишка школатнес обедтнэнь пачтямодо. Кортамось истя жо мольсь школань столовойтнес од оборудованиянь путомадо, конась карми ладямо шкань вешематненень. Дмитрий Глушко кирдинзе неть ушодкстнэнь.