Мордовиянь Прявтось Владимир Волков середасто, сентябрянь 27-це чистэ, ульнесь Республикань культурань дворецсэ кенярксчинь промкссонть, конась алтазель Машиностроителень чинтень.
8 ковонь итогтнень коряс Мордовиясо промышленной производствань индексэсь кармась 112%. Промпродукция миезь 39 млрд. целковоень питнес эли 17% седе ламо ютазь иенть коряс. Республикань экономикань виевгавтомантень покш путовкс тейсть «Оптикэнерго» холдингень предприятиятне, «Рузхиммаш», «Сарансккабель», «Хелиос-Ресурс», «Саранский телевизионный завод», «Резинотехника», «Электровыпрямитель», «Ковылкинский электромеханический завод», «ВКМ-Сталь». Машиностроениясь промышленностень смежной отраслятнень марто максы пелензэ региононь валовой продуктонть эйстэ.
Машиностроительной кенярксчинь форумонь участниктненень пшкадемстэ Мордовиянь лидерэсь тешкстызе, те залонтень пурнавсть ломантне, конат а пелить стака важодемадо. Специалисттнэ, конатнень тевдест ашти ломантнень эрямост, сэтьмечист ды сюпавчист.
«Те минек экономикань прявт отрасля, сонзэ «седеезэ» ды «моторозо». Мон ёвтан тенк седейшкавань поздоровт профессиянь кенярксчинть – Машиностроителень чинть кувалма! Вастовоманть ушодовомсто пшкадян тенк сюкпрянь вал марто ютазь кочкамонь итогтнень кисэ. Сюкпря тенк кемеманк кисэ!», – мерсь Владимир Волков.
Республикань ламот предприятиятне тонадсть ушоёндонь киртямотненень ды лия стакачитненень. Мордовиянь Прявтонть валонзо коряс, республикань промышленностесь лиссь важодемань ритмань режиментень. Одкстомтовсь промышленной производствань касомась.
Республикань руководителесь тешкстызе, 2-3 иеде икеле тевтне мольсть овсе лиякс. Мордовиянть талновтсь ламот предприятиятнень, важодемань коллективтнень вандынь чист.
Ней, Владимир Волковонь валонзо коряс, тевтне полавтовсть ды те редяви.
«Минь нейтяно, весемесь топавтови. Ломантне кемить вандынь чинтень. Минь цидярдынек, эзинек нолда кеденек ды поладынек важодеманть. Сюкпря тенк тень кисэ, машиностроениянь мельвановикс важодицят!», – мерсь Владимир Волков.
Апак вано сень лангс, кода тешкстызе сон, шкась аволь шожда, лиснить од тердемат. Владимир Волков кеместэ тешкстызе: «Минь а кадтадызь тынк ськамонк, поладтано лездамо сеть предприятиятненень, конат понгсть стака шкас».
Мордовиянь Прявтось ёвтынзе прявт тевтнень, конатнень топавтомсто эряви путомс властень ды промышленной секторонь вейсэнь вийтнень.
Васняяк, машиностроениянь комплексэнь предприятиятненень эряви кастомс экспортонь потенциалост. Республикасонть ули производствань база, научно-исследовательской потенциал. Ули весемесь, масторлангонь рынкантень од, икеле молиця технологиятнень ды продукциянть максомга.
Эряви ёроковтсо ладямс микшнемань-экономикань сюлмотнень, важодемс Россиянь экспортонь куншкакуронть, Торгово-промышленной палатанть, виевгавтомань лия институттнэнь марто.
«3 иетнень перть Мордовиясо экспортонь покшолматне кассть малав 2,5-ксть (4 млрд. целковойстэ саезь 10). Прявт тевесь – маласо вете иетнестэ экспортонь продукциянть кастомс 3-ксть седе ламос. Минек улить маштомачинек те невтевксэнть кастомгаяк», – ёвтась кемема Владимир Волков.
Сонзэ ванновтонзо коряс, экспортонть лангс нежедемась а невти, буто эряви отказамс госкорпорациятнень туртов продукциянь нолдамодонть. Россиянь минпромторгось кемекстась импортонь полавтомань отраслянь аравтлувт, тов совасть технологиянь 14 ёнкст, конат виевгавтовить республикасонть. Импортонь полавтомань программат истя жо кемекстасть госкорпорациятне.
Ней зярыя предприятиятне пачтить продукция «Газпромов», «РЖД-в», «Лукойлав», «Ростелекомов», «Росатом» корпорациянть туртов. Весе предприятиятненень эряви ёроковсто кундамс те важодемантень», – тешкстызе Мордовиянь лидерэсь.
Омбоцесь: инновациянь виевгавтомань, производствань ванстомань принциптнень, экологичностенть кастомань программатнень тевс нолдамось. Промышленностесэ инновациянь организациятнень пельксэсь саи 67%, отгрузкасо инновациянь продукциянь пельксэсь саи малав 45%. Тедеде предприятиятне зярыяксть ламолгавтызь инновациянть продукциянь миеманть. Невтемакс, «Рефлакс-С» (5-ксть), «Сарансккабель» (4-ксть), «Биохимик» (3-ксть).
«Важодемс кезэрень койтнень коряс а эряви, ды минь тень чарькодтяно. Научно-технической прогрессэнть лувсо эрязасто касы важодемань производительностесь. Тееви технологиянь од лув. Кие-бути тень лемди промышленной нилеце революциякс. Минек туртов прявтокс ашти аволь лемесь, сонзэ результатось. Икелев лисить минек конкурентноспособностень кевкстематне. Маласо иетнестэ эряви теемс виев эскелькс цифровой экономикань, наукоёмкой промышленностень теемасо. Эряви топавтомс од содамочитнень, инновациянь продукциянть ды услугатнень нолдамост вельде региононь валовой продуктонь покш пельксэнь пурнамонть. Минек улить вадря невтевксэнек. Те ёнксонть икеле молить: «Оптикэнерго» холдингень предприятиятне – «ЭМ-Кабель», «ЭМ-Кат», «Сарансккабель-Оптика», истя жо «Ковылкинань электромеханической заводось». Инновациянь продукциянь пельксэсь тесэ 90%», – тешкстызе Владимир Волков.
Сон ёвтнесь, Мордовиясо тееви Россиясо субстанциятнень васенце нолдамось. Владимир Волков ёвтась кемема, «Биохимикесь» карми Россиянь фармацевтикань покш предприятиятнестэ вейкекс.
«Тынь содатадо, мон пачтинь Россиянь Президентэнтень В.В.Путиннэнь седе, «Биохимик» заводсонть анокстазь-теезь «Ванкомицин» Россиянь од антибиотикесь. Те покш изнявкс. Масторонь Президентэнть кармавтоманзо коряс, ды эсень пельде башка, ёвтан поздоровт весенень, кие сюлмавозь те изнявксонть марто!», – пшкадсь Владимир Волков.
Республиканть туртов, Мордовиянь Прявтонть ванновтонзо коряс, прявтокс ашти содавикс предприятиятнень вельмевтемась. Меельце 3 иетнень мереви лемдемс «Лисма» заводонь «омбоце чачомакс». Предприятиясонть топавтови инвестициянь покш программа, моли технической перевооружениясь.
Тедеде лоткавтозь эрексиянь люминесцентной таштомозь лампатнень нолдамось. Ламо иень перть эрексиянь цехенть пекстамодо энялдсть Саранскоень эрицятне.
Эрексиянь лампатнень полавтомс арсезь светодиодной линейной лампат. Сынь пек эрявикст Россиясо ды кандыть экспортонь покш потенциал.
Од рынкат саи светодиодной филаментной лампась. Кудотнень валдомтомадонть башка сон нолдави темс промышленностесэ. Лампатне пачтявить Санкт-Петербургонь митрополитенс, ютавтовить варчамот Московонь метросо, анокставить решеният «Автовазонть» туртов. Ней сынст нолдамонь покшолмась 50 тёжат иезэнзэ.
Ансяк проектэнть седеяк покшт бажамонзо – нолдамс филаментной лампат 12 миллионт иезэнзэ. Республикась предприятиянь руководстванть марто вейсэ путсы весе виензэ, те проектэнть топавтомга.
«Лисмась» – энергоэффективной светотехникань минек кластерэнть прявт предприятия. Сонзэ лувсо одкстомтозь республикань светотехникань ламот предприятиятне. Минь бажатано велявтомс Мордовиянтень валдонь источникень нолдамонь производствань масторлангонь куншкакуротнестэ вейкень славанть.
Кластерэнь важодеманть лувсо удалась ванстомс минек вагононь строямонть. Колмо иеде икеле отраслясь вастовсь покш стакачи марто. Вагононь рынкась пешкедсь. Миненек удалась лисемс томбалень рынкатнес, ладямс важодемань сюлмот Кубанть, Иранонть мрато. Одкстомтозь продуктонь линейкась, покшолгавтозь сеть вагонтнэнь нолдамось, конатне седе эрявить. Ней тееви сталень вертикальной резервуартнэнь од производствась.
Тень вельде «Рузхиммаш» заводсонть тедеде производствань покшолматне касыть кавксть: кармить нолдазь 4,5 тёжадо ламо вагонт. Седеяк ламо покшолгавтома ули литейной производствасонть.
Минь бажатано аволь ансяк кастомс производствань покшолматнень важодиця предприятиятнесэ, истя жо теемс покш технологиянь од производстват ды секторт.
Ней Мордовиясо тееви Россиянь промышленностень од отрасля – оптоволоконной приборостроения. Те пек эрявикс тев минек масторонть туртов. Курок карми важодеме волоконной оптикань Инжинирингень куншкакурось. Ушодызе важодеманзо Россиясо оптической волокнань васенце заводось.
Россиянь Президентэнть В.В.Путинэнь лезксэнзэ вельде улить эскелькст заводонь омбоце очередень строямонть коряс. Минек туртов прявтокс ашти седе куроксто топавтомс те проектэнть, менемс оптоволокнань коряс импортонь зависимостенть эйстэ», – тешкстызе Владимир Волков.
Республикань промышленной предприятиятнесэ касы важодемань производительностесь. Сехте вадрят невтевкстнэ «Медоборудование» (касомась 6-ксть), «Оптиковолоконные системы» (малав 3-ксть), «ВКМ – Сталь» (1,7-ксть) заводтнэсэ.
«Аравтлувсонть 2020 иентень колмоце пельксэс кастомс миезь продукциянь покшолматнень, промышленностесэ инновациянь товартнэнь пельксэнть малавгавтомс 35%. Минек предприятиятнень ламот арсематне саезь мельс «Повышение производительности труда и поддержка занятости» федеральной приоритетной программанть анокстамсто. Сонзэ топавтоманть туртов кочказь 16 регионт, ютксост Мордовияськак.
Покш тевесь весень туртов – кадратнень анокстамось. Неень шкане важодицянь квалификациясь карми производствань прявт пельксэкс.
Тынь содатадо аволь аламо невтевкст, зярдо од производстватне важодить аволь лезэвстэ вадря инженертнэнь, технологтнень, конструктортнэнь, важодицятнень асатомаст кувалма.
Мон аволь весть кепедекшны те кевкстеманть, истя жо эсень Кучомасонтькак. Эштё весть тешкстаса, специалисттнэнь комплексэнь анокстамось веши мелень явома школатнень, техникумтнень ды вузтнень ёндо.
Эряви теемс студенттнэнь стажировкань ды практикань площадкат, пандомс стипендият ёроков тонавтницятненень.
Эряви апак пеле тердемс од ломантнень, пандомс тенст вадря зарплата, лездамс витемс эрямо таркань кевкстемаст. Тень туртов республикасонть ули весемесь», – тешкстызе Владимир Волков.
Кортамонзо прядовомга Мордовиянь Прявтось Владимир Волков мерсь: «Машиностроителень чись – те, васняяк, сетнень кенярксчись, кие эрьва чистэ капши роботав заводонь проходнойтнень пачк. Ёвтан седейшкавань поздоровт тенк – инженерт, робочейть, производствань ветерант, – весенень, кить теизь минек предприятиятнень ды кить важодить тесэ ней. Ёвтан республикань весе машиностроительтненень сюкпрянь валт лезэв важодеманть кисэ, масторонь ды республикань социально-экономической виевгавтомантень редявикс путовксонть кисэ!
Арсян тенк а лоткамс саезенть лангс, бажамс важодемасо од тёкштнэнь саемантень! Кеме шумбрачи тыненк ды малавиксэнк туртов, паро эрямо, валдо менель ды весе паронть!»
Кенярксчинь промкссонть ульнесть МР-нь Правительствань Председателесь Владимир Сушков, МР-нь Госсобраниянь Председателень полавтыцясь Валерий Алехин, МР-нь Профсоюзтнэнь федерациянь председателесь Мария Голиченко.
Машиностроениянь зярыя важодицятне ды ветерантнэ казезь республикань ды отраслянь наградасо.