Владимир Волков: «Биохимиксэ» производствань вийтнень кастомась – республикань промышленностень прявт ёнкстнэстэ вейкесь»

Владимир Волков: «Биохимиксэ» производствань вийтнень кастомась – республикань промышленностень прявт ёнкстнэстэ вейкесь»

Мордовиянь Прявтось Владимир Волков ютавтсь важодемань вастовома "ПРОМОМЕД" УК ООО-нь прявттнэнь Советэнь председателенть Петр Белый, «Биохимик» АО-нь руководстванть ды «Бистерфельд Интернэшнл» компаниянть – стратегической партнеронь предприятиянть генеральной прявтонть Франк Диркс марто. Вастовомасонть истя жо ульнесь Промышленностень, наукань ды од технологиятнень министрась Александр Седов.

Франк Диркс ёвтнесь Владимир Волковнень «Биохимик» заводонть – республикань умонь предприятиянть марто ламо иень перть вейсэнь важодемадонть. Тень пингстэ тешкстызе, предприятиянть неень шкань изнявкстнэ – те икелев алкуксонь эскелькс. «Монь дивавтымем покш технологиянь оборудованиясь, конань неи предприятиясонть, неень шкань технологиятне ды вадрясто анокстазь, покш профессиональной кадратне. А дивавты, заводонь важодемань результаттнэнень максови покш питне сехте верде. Минек масторонь историясонть васенцеде тесэ анокстазь лия ёнов а молиця антибиотиктнень нолдамось: штамм-продуцент эйстэ саезь фармацевтикань анок субстанцияс. Те пек виев важодемань результат, истя жо промышленной холдингенть ды властенть ютксо вейсэнь важодемась!» – ёвтынзе инжесь эсензэ мелензэ «Биохимиксэ» неезденть коряс.

Вастовомасонть кортавсть «Бистерфельд Интернэшнл» компаниянть ды «Биохимик» АО-нть седе тов вейсэнь важодемань кевкстематне. Республикань Прявтось тешкстызе, «Биохимиксэ» производствань вийтнень касомась, лекарствань препараттнэнь нолдамось ды импортонть эйстэ Россиянь фармацевтикань промышленностенть аштеманть киртямось – республикань промышленной секторонть прявт ёнкстнэстэ вейкесь. «Фармацевтикань те эскельксэсь кармави лекарствань препараттнэсэ масторонь топавтомань сферасонть национальной безопасностень прявт пельксэкс!» – тешкстызе Владимир Волков.

Кортамонть лувсо Фрэнк Диркс ёвтызе мелензэ Саранскоень аэропортонь одкстомтозь комплексэнть коряс. Инжесь ливтясь Мордовиянь прявтошонтень аэропортонть одкстомтомадонзо мейле васенце рейссэнть, конань топавтызе февралень 14-це чистэ «Победа» авиакомпаниясь. «Неень шкань аэропорт, весемесэ комфорт, обслуживаниясо европань качества!» – истямо покш питне макссь немецень бизнесменэсь 2018 иень футболонь коряс масторлангонь чемпионатонь ютавтомантень Саранскоень анокстамонь прявт объектнэстэ вейкентень.

Мордовия Республикань Прявтонть пресс-службась