Мордовиясо строямонь материалтнэнь нолдамонть виевгавтомась, аламо этажонь ды аволь питней кудотнень строямсто сынст тевс нолдамось кортавсь цетвергстэ, сентябрянь 28-це чистэ, Мордовия Республикань Прявтонть Владимир Волковонь кедьсэ промкссонть.
Кортамось мольсь республикань стройиндустриянь икелень предприятиянть важодеманзо одкстомтомадо – Ковылкинань силикатной кирпиценть заводтонть. Республикань руководствась кармавтсь велявтомс икелень статусонть предприятиянтень, конась макснесь райононь эрицятненень колмо сядодо ламо важодемань таркат ды ульнесь строительной комплексэнь ды индустриянь предприятиятнень ютксо ютавтовиця эрьва кодамо рейтингень ды пелькстамонть участникекс ды изницякс.
Течи заводонть уцяскантень явсь мель предприятиясь-инвесторось, конань аравтлувсо строямонь матекриалтнэнь нолдамонь вельмевтемась, истя жо предприятиянь «визитной карточканть» – силикатной кирпиценть ды ячеистой бетононть. Ней моли производствань площадьтнень анокстамось ды витнемась, предприятиянь инженерэнь ды килангонь инфраструктуратнень одкстомтомась. Арсеви келейгавтомс производствань линейканть строямонь рынкасо неень шкань ды рамавиця продуктнэнь нолдамост вельде – фундаментэнь ды стенань блокт, черепица, плитка. Предприятиянь вельмевтемань программанть топавтомань шкасто важодема таркат арсеви максомс 100 ломантненень.
Владимир Волков тешкстызе, предприятиянтень од эрямонь максомась – властенть туртов прявт тев. Текень пингстэ региононь руководителесь кармавтсь арсемс седе келейстэ: «Прявт тевекс кармазо Мордовиясо – велетнесэ ды оштнень маласо – аламо этажонь строямонь виевгавтоманть туртов эрявикс весе матералтнэнь республикасонть нолдамось. Аволь питней куроксто стявтовиця кудотне витсызь районтнэсэ эрямо таркань а сатомань кевкстеманть, сетнень туртов, кить эрить ды важодить велесэ – велень хозяйствань производствасо, переработкасо, социальной сферасо».
Тень кувалма Мордовиянь Прявтось кармавтсь Правительствантень арсемс тевть, конат лездыть уш маласо шкастонть стявтомс республикань весе районтнэсэ аламо этажонь эрямо кудонь варчамонь проектт. Путозь задача, те эрямо таркань рамицятне понгост льготань ипотекань кредитованиянь программантень, истя жо эрямо таркань социальной лия программатнес, конат важодить республикасонть.
Промкссонть ульнесть Мордовия Республикань Правительствань Председателесь Владимир Сушков, сонзэ полавтыцянзо – Экономикань, торговлянь ды предпринимательствань министрась Владимир Мазов ды Строительствань, транспортонь ды ки лангонь хозяйствань министрась Виктор Цыганов, истя жо Ковылкинань муниципальной райононь прявтось Виктор Ташкин.
Мордоавия Республикань Прявтонть пресс-службась