Медьковонь 11-це чистэ Мордовия Республиканть ды «Российский Союз строителей» вейсэндявконть ютксо вейсладямонь тешкстамонть шкасто, Мордовиянь Прявтось Владимир Волков ды Россиянь строительтнень вейсэндявксонь Президентэсь Владимир Яковлев кортасть региононть туртов прявт проекттнэнь топавтоманть коряс.
Истя, Россиянь строительтнень вейсэнядвксонтень совицятне ёвтасть мель топавтомс Мордовиясо зярыя проектт – Саранск ошонь округсо ушонь валдомтомань системанть одкстомтомга, ошонь юго-западаонь пельксссэнть канализациянь сеттнень витнемга, башка кормасось мольсь Фурмановонь куросо коллекторонь витнемадонзо, истя жо «Рузаевка» ТОСЭР-нь юрсо энергиянь ванстыця индукциянь плитатнень нолдамонь коряс производстванть ладямга.
Владимир Волков тешкстызе, ёвтазь весе проекттнэ пек эрявикст республиканть туртов, сынь токшить ламот эрицятнень. Седе пек те кандови Фурмановонь куросо коллекторонь витнемантень. «Те стакачинть вельде ломантне майсить уш аволь вейке ие. Водопроводонь те пелькссэнь сеедьстэ лисниця авариятне а мерить вадрясто витнемс кинть. Ломантне видестэ сёвныть властенть – республикань ды ошонь. Секскак минек ули меленек топавтомс те проектэнть. Правительствантень ды Саранскоень администрациянтень кармавтан ладямс вейсэнь важодема весе процедуратнень топавтомга ды куроксто ушодомс тевтнень коллекторонть витнемга. Сёксес Фурмановонь курованть кись улезэ витнезь», – мерсь республикань Прявтось.
Истя жо ошонь вадрялгавтоманзо туртов пек эрявикс Саранскойсэ ушонь валдомтомань системань одкстомтомань коряс проектэсь. Арсеви совавтомс тевс республикасонть нолдавиця светотехникань прибортнэнь ды кабелень продукциянть, истя жо од технологиятнень. РСС-нь финансонь-инвестициянь тевдеемань коряс комитетэнь председателесь Руслан Шатохин мерсь: «Минек тевенек: Саранскоесь улезэ седеяк мазый, седеяк валдо, нолдамс тевс автоматизациянь неень шкань системанть, ванстомс вийтнень ды финанстнэнь».
«Рузаевка» ТОСЭР-нь юрсо энергиянь ванстыця индукциянь плитатнень нолдамонь коряс производстванть панжомась пек эряви те ёнксонть туртов, сон максы важодемань од таркат.
Мордовиянь Прявтось тешкстызе, неть проекттнэнь топавтомсто эряви нолдамс тевс неень шкань технологиятнень, сехте вадря практикатнень ды производствань вийтнень, конат нолдавить тевс эсенек масторсо ды томбале.
Вастовомасонть ульнесь Мордовия Республикань Правительствань Председателесь Владимир Сушков, Саранск ошонь округонь прявтось Петр Тултаев.
Мордовия Республикань Прявтонть пресс-службась