Владимир Волков: «Гектарстонть 100 центнерт – те масторлангонь результат»

Владимир Волков: «Гектарстонть 100 центнерт – те масторлангонь результат»

Мордовиянь руководителесь Владимир Волков августонь 12-це чистэ ютавтсь выездной семинар-промкс велень хозяйствасо интенсивной технологиятнень тевс нолдамодост. Тедеде семинарось ютавтовсь колмо предприятиятнень площадкатнесэ: Рузаевка ёнксонь «Исток» ООО-нть, Инсаронь ёнксонь «Пикаев О.В.» ИП-нть ды Ковылкина ёнксонь «Мордовский бекон» ЗАО-нть. Мероприятиясонть ульнесть Мордовиянь Правительствань Председателень васенце полавтыцясь – велень хозяйствань ды продовольствиянь министрась Владимир Сидоров, райононь прявттнэ, агрохолдингень ды велень хозяйствань предприятиянь прявттнэ.

Семинаронь программась аштесь практикань ды теориянь пельксстэ. Ладязь коенть коряс, башка мель явозель практикантень. Сеть сельхозпредприятиянь прявттнэ, конатнень кедьсэ ютавтовсь выездной семинарось, невтнизь ды ёвтнизь, мезенть вельде сыненст удалы кастомс сокамонь-видемань лезэвчинть.

Семинаронь васенце площадкакс кармась «Исток» ООО-нь яровой товзюронь паксясь. Пивсэментень тесэ ансяк кундасть, эряви пурнамс эштё

малав 2 тёжат гектарт. Ледстясынек, пиземетнень вельде весе республикасонть пивсэме ушодсть 15-20 чиде седе позда.

Предприятиянь прявтось тешкстызе, паксястонть арсеви пурнамс малав 70 центнерт гектарсто. Владимир Волков домкасто кевкстнизе тевс нолдавиця технологиятнеде, истя жо пакся тикшетнеде ды унжатнеде обработкадонть, удобрениятнень совавтомадост. Эрявикс весе технологиятне тесэ тевс нолдавить целанек. Секскак велень хозяйствань предприятиясь ловови республикасонть сехте виевтнестэ вейкекс. Мордовиянь руководителесь истя жо тешкстызе хозяйствань вадря экономиканть, косо ловить эрьва целковоенть ды бажить валгтомс продукциянь себестоимостенть: тесэ модань вейке гектаронть лангс ютавтыть 28,5 тёжат целковойть. Покш урожайностенть вельде, конанть велень хозяйствань предприятиясь невти эрьва ие, неть ярмактне идевить.

Владимир Волков тешкстызе, те опытэнть эряви ламолгавтомс ды республикань велень хозяйствань весе предприятиятнесэ нолдамс тевс интенсивной технологиятнень.

«Республикань весе предприятиятнень аграриянь весе специалисттнэ кадык сыть тей икеле молиця опытэнть тонавтнеманть туртов», – тешкстызе Мордовиянь лидерэсь.

Олег Пикаевень паксятнесэ ваннызь технологиятнень цела комплексэнть, конат лездыть фермерэнтень саемс редявикс результатт, аволь стяко эрьва иестэ республикань Минсельхозось кочки сонзэ хозяйстванть Мордовиянь весе аграрийтнень туртов невтемань площадкакс. Вана тедедеяк Пикаевень од рекордонзо. Вейке паксясонть ловить биологической урожайностенть – 140 центнерт гектарсто. Специалисттнэнь ванновтост коряс, вейке гектарстонть кармить пурнавомо 100-110 центнерт. «Те масторлангонь результат. Эштё зярыя иеде икеле минь тень ланга ансяк арсинек, ды вана ней зярыя хозяйстватне топавтызь неть арсематнень эрямос. 70-80 центнерт гектарсто минек ней пурныть велень хозяйствань комсь предприятият. 5 иень ютазь республиканть туртов кармить эрявомо сюронь 2 млн тоннат. Те цифрантень миненек эрявияк бажамс. Минек аграрийтнень потенциалост ули, велень хозяйствань предприятиятнесэ важодемань производительностесь касы седе куроксто промышленностенть коряс», – тешкстызе Владимир Волков.

Икеле молиця технологиятнень тевс нолдыть истя жо «Мордовской бекононь» сюронь-тикшень кастыцятне, сынст ютксо, модань минимальной обработкась (Mini-till) ды нулевой обработкась (No-till). 2015 иестэ те технологиянть коряс видезельть 20 тёжадо ламо гектарт, 2016-стэ – 25 тёжадо ламо, 2017-стэ – 30 тёжадо ламо гектарт. Те технологиясь лезды идемс моданть эрозиядо, вансты сонзэ сюпавчинть ды кирти уштомапелень

материалтнэнь ютавтоманть 70%. Те лезды киртямс пертьпельксэнть лангс зыянчинть, киртямс важодемань затрататнень, ды – киртямс продукциянь себестоимостенть. Прявт тевесь течи, кода тешкстызе Владимир Волков, – саемс пек вадря ды аволь питней сюро.

Теде башка, уш зярыя иеде икеле агрохолдингесь кармась ютамо экологиянь коряс безопасной велень хозяйствань техникантень, конатнес путозь Евро-4, 5 стандартонь двигательтне. А нолдави тевс Евро-1,2 двигатель марто техникась, сынь полавтозь Джон Дир, россиянь Акрос ды РСМ, конатнес путозь неень шкань двигательть. Евро-4 ды Евро-5 стандартнэ кортыть выхлопной газтнэсэ зыянонь веществатнень аламочидест, конат ладить Европейской союзонь экологиянь безопасностень невтевкстнэнень.

Мероприятиянь практикань покш пелькстэнть мейле Владимир Волков ютавтсь промкс – весе участниктне кельгстевсть Ковылкина ёнксонь Кочелаево велень Культурань куншкакуронь актовой залонтень. Тесэ ёвтызь велень хозяйствань покш чинь итогтнень.

Мордовиянь руководителесь Владимир Волков эштё весть тешкстызе: «Сеть хозяйстватнень опытэст, конатнень минь течи ванынек, эряви саемс мельс весенень. Чарькодеви, а эряви целанек теемс методтнэнь копиянть – эрьва хозяйстванть эсензэ спецификазо. Эряви нолдамс тевс агроприемтнэнь, конат невтизь покш лезэвчист».

Семинаронь участниктне кортызь республикань агропромышленной комплексэнь виевгавтомань кевкстематнень. Истя жо мольсь кортамо республикань Минсельхозонь геоаналитической куншкакуронть важодемадонзо, косо моли велень хозяйствань модатнень оперативной мониторингесь. Куншкакуронь важодицятне цифровой космической съемканть вельде саезь даннойтнень коряс куроксто максыть питне. Те кулянть ванкшномась лезды примамс управлениянь вадря решеният. Видьметнень, паксянь границятнень мереви ванномс оптической ды радарной снимкатнесэ, конатнень эрьва чистэ максы Космической исследованиянь институтось. Неть снимкатнень вельде мереви, невтемакс, ванномс видезетнень лисеманть, моданть температуранть ды начкочинть. Мордовиянь лидерэсь тешкстызе, аграрной отраслясонть космической технологиятнень тевс нолдамось ней пек эрявикс, нама, бути хозяйствань прявтнэ путыть икелест тевс виевгадомс ды кастомс велень хозяйствань продукциянь производствань покшолматнень кастоманть.

Васенце пель иень итогтне, кода тешкстызе Мордовиянь руководителесь, кемевтить: республикась саизе 1 тарканть ПФО-нь регионтнэнь ютксо вейке ломаненть лангс ловсонь ды сывелень нолдамонть

коряс, ды омбоце тарканть – ракшань ды саразонь сывелень нолдамонть коряс. 6 ковтнень перть касомась кармась 8,4%.

Владимир Волков тешкстызе: республиканть изнявкстнэде содыть Россиянь Минсельхозсо. Секскак федеральной ведомствась кочкизе Мордовиянть машинань вельде потявтомань оператортнэнь ютксо профессиянь коряс весероссиянь пелькстамонь ютавтома таркакс, сон ветяви Ташто Шайгова ёнкссо 2017 иень сентябрянь 4-7-це читнестэ. Те шкастонть арсеви ютавтомс ловсонь животноводствань виевгавтмоань коярс весероссиянь промкс.

Мероприятиянть прядовомсто Владимир Волков кармавтынзе аграрийтнень покшолгавтомс сюронь пурнамонь темпатнень. Августонь 12-це чинтень пивсэзь 193 тёжат тоннат сюро, средней урожайностесь – 35,5 центнерт гектарсто.

Ней ули весе эрявиксэсь сюронь пурнамонть туртов. Летьке сюронть эряви ускомс тинге лангс, мейле уш пачтямс кшинь примамонь предприятиятнес, путомс ванстома таркатнес. Республикань элеватортнэ ды спиртзаводтнэ чизэнзэ анокт примамс 23 тёжат тоннат сюро. Арсеви, вадря погоданть вельде республикась пурны 1,5 миллионт тоннат сюро.

Мордовия Республикань Прявтонть пресс-службась