Владимир Волков кармась Мордовия Республикань Прявтокс

Владимир Волков кармась Мордовия Республикань Прявтокс

Саранскойсэ сентябрянь 19-це чистэ МР-нь Государственной Собраниянь котоце тердемань 15-це сессиясонть Владимир Дмитриевич Волков аравтозь Мордовия Республикань Прявтокс.

Те кенярксчинтень республикантень сакшность покш инжеть: Равчирень федеральной округсо РФ-нь Президентэнь полномочной представителень полавтыцясь Алексей Сухов, РФ-нь Федеральной Собраниянь Федерациянь Советэнь члентнэ, РФ-нь Госдумань депутаттнэ, властень федеральной органтнэнь прявттнэ, Самарань областень губернаторось Николай Меркушкин, Пензань областень губернаторось Иван Белозерцев, Татарстан, Чувашия республикатнень, Саратовань областень делегациятне.

Кочкамонь итогтнень, конатнесэ изнясь В.Д.Волков, ёвтынзе МР-нь Центризбиркомонь председателесь Александр Косов.

Владимир Волков ёвтынзе присягань валтнэнь: «Мордовия Республикань Прявтонь тевтнень топавтомсто максан вал явомс мель ды ванстомс ломаненть ды гражданинэнть праванзо ды олячинзэ, топавтомс Россиянь Федерациянь Конституциянть, федеральной законтнэнь, Мордовия Республикань Конституциянть ды Мордовия Республикань законтнэнь, алкуксокс топавтомс монь лангс путозь тевтнень, видестэ кандомс служба Россиянь Федерациянь эрицятненень».

Владимир Волковнень государственной властень тешксэнть – Мордовия Республикань Прявтонь Знаконть максомадонзо мейле, сон официальна кармась Мордовия Республикань Прявтокс.

Мордовиянь Прявтонть лемс поздоровонь телеграмма кучсь Россиянь Правительствань Председателесь, «Единая Россия» партиянь председателесь Д.А.Медведев, сонзэ ловнызе МР-нь Госсобраниянь Председателесь Владимир Чибиркин.

Эйсэнзэ кортави: «Мельвановикс Владимир Дмитриевич!

Ёвтан Тенк поздоровт Мордовия Республикань Прявтокс аравтоманть кувалма!

Тынк изнямось невти Мордовия Республикань эрицятнень пельде кемеманть, регионсонть «Единая Россия» партиянть покш авторитетэнзэ.

Арсян, седе товгак карматадо путомо покш вийть республиканть виевгавтомга ды социальной покш проекттнэнь топавтомга.

Арсян Тенк кеме шумбрачи ды весементь сехте паронть.

Дмитрий Анатольевич Медведев».

Россиянь Федерациянь Федеральной Собраниянь Федерациянь Советэнь Председателенть В.И.Матвиенконь телеграммасонть кортави: «Мельвановикс Владимир Дмитриевич!

Ёвтан Тенк поздоровт Мордовия Республикань Прявтокс аравтоманть кувалма!

Кеман, тынк профессионализмась, опытэсь ды компетентностесь лездыть топавтомс тевтнень Мордовия Республикань социально-экономической виевгавтоманть коряс. Сонзэ потенциалонть лезэвстэ нолдамс тевс, вадрялгавтомс ломантнень эрямост.

Арсян, Россиянь Федерациянь Федеральной Собраниянь Федерациянь Советэнть Мордовия Республикань государственной властень органтнэнь марто Россиянь государственностенть кемекстамга вейсэнь важодемась седе товгак карми лезэнь кандыцякс.

Арсян Россиянть лезэс виев важодема!

Валентина Ивановна Матвиенко».

«Единая Россия» фракциянь прявтонь васенце полавтыцясь, Госдумань аграрной кевкстематнень коряс комитетэнь членэсь, Муниципальной образованиятнень Общественной конгрессэнь Президентэсь Виктор Кидяев ловнызе Россиянь Государственной Думань Председателенть В.В.Володинэнь шумбракстнемань адресэнть.

Эйсэнзэ кортави: «Мельвановикс Владимир Дмитриевич!

Ёвтан Тенк поздоровт Мордовия Республикань Прявтокс кочкамонть кувалма!

Региононь эрицятне эсест кочкамосост макссть питне ютазь вете иетнестэ Мордовия Республикань Прявтокс улемстэ тынк важодемантень. Тынь маштадо виевстэ кастомс-кепетемс республиканть, витемс кевкстематнень ломантнень эрямост вадрялгавтомга.

Арсян Тенк шумбрачи ды изнявкст кемекстазь аравтлувонть топавтомасо.

Покш мель марто, Вячеслав Викторович Володин».

ПФО-со РФ-нь Президентэнть Полномочной представителенть Михаил Бабичень поздоровонзо ловнынзе Алексей Сухов: «Мельвановикс Владимир Дмитриевич!

Ёвтан Тенк поздоровт Мордовия Республикань Прявтокс официальной аравтоманть кувалма!

Региононь исполнительной властень органтнэсэ ламо иень важодеманть пингстэ, Тынь саиде покш изнявкст, конат сюлмавозь республикань инновациянь виевгавтоманть ды сонзэ экономикань традиционной отраслятнень кирдеманть марто. «Технопарк-Мордовия», светотехникань кластерэсь, фармацевтикань отраслясь – весе неть сфератне вешить аволь ансяк финансонь покш лезкс, истя жо покш квалификациянь специалисттнэнь анокстамонть. Тенень Тынь явтадо покш мель. Образованиянтень, науканть ды производстванть туртов инвестициятне кармасть Мордовиянь виевгавтомань неень шкань этапонь прявт пельксэсь. Текень пингстэ республикась кадови Равчирень икеле молиця агропромышленной регионокс. Мордовиясь течи нолды эсензэ эрицятнень туртов велень хозяйствань продукция, ёроковсто саи весероссиянь ды омбо масторонь рынкатнень.

Кеман, раськеютконь покш мероприятиясь 2018 иень Футболонь коряс масторлангонь чемпионатось Мордовиясо ютавтови покш уровнясо. Лезды мирэнь ламот масторонь эрицятненень теевемс содавиксэкс республикань мазычитнень ды паронь арсиця эрицятнень марто. Карми стимулокс масторонь внешнеполитической вейкине курсонть юрсо

внешнеэкономической ды гуманитарной сотрудничествань виевгавтоманть туртов.

Арсян Тенк топавтомс кемекстазь весе аравтлувтнень, ванстомс ды ламолгавтомс саезенть Мордовиянь эрицятнень лезэс ды минек масторонть вадрялгавтомга.

Бабич Михаил Викторович».

Мордовиянь митрополиянь Прявтось, Саранскоень ды Мордовиянь Митрополитэсь Зиновий ловнынзе Московонь ды весе Русень Иневанькс Патриархонть поздоровонь валонзо: «Мельвановикс Владимир Дмитриевич!

Ёвтан Тенк седейшкавань поздоровт Мордовия Республикань Прявтокс официальной аравтоманть кувалма!

Виев изнямось, конань Тынь саинк кочкамотнесэ, невти эрицятнень покш кемемаст тенк, конань удалась саемс Тенк тиринь республикасонть важодемань меельце иетнестэ, региононь социальной ды экономикань стакачитнень витемасо Тынк изнявкстнэде.

Ёвтан Тенк сюкпря местной властень Мордовиянь митрополиянь епархиятнень ды Рузонь православиянь церьковатнень марто вейсэнь важодеманть кисэ.

Кеман, те вейсэнь важодеманть седе тов виевгавтомась канды вадря тевть, кемекстасы обществасонть нравственной питнейчитнень.

Арсян Тенк шумбрачи ды сэтьме эрямо, Пазонь лезкс, уцяска Тынк важодемасонть.

Покш мель марто, Кирилл – Московонь ды весе Русень Патриархось».

Мордовиянь Прявтонтень поздоровт истя жо ёвтасть Николай Меркушкин, Иван Белозерцев, «Евроцемент груп» прявттнэнь советэнь председателесь Филарет Гальчев, Мордовия Республикань Почётонь гражданинтнэ Эвир Боксимер, Иван Андин, Владимир Ипатенко, Валентина Самарова, раськеютконь олимпиадатнесэ ламоксть изницясь Иван Утешев.

Эсензэ пельде, Владимир Волков ёвтась поздоровт Эвир Аврамович Боксимернэнь 80 иень юбилеенть кувалма, конань сон тешксты сентябрянь 19-це чистэ.

Залонтень пурнавозь инжетнень икеле кортамсто, Мордовиянь Прявтось ёвтась сюкпря республикань весе эрицятненень кемеманть ды лезксэнть кисэ, истя жо масторонь руководствантень республиканть виевгавтомасо кевкстематнень витемасо чарькодеманть кисэ.

«Мон пшкадян те залонтень пурнавозь доверенной лицятненень, минек весе активентень, Мордовия Республикань Государственной Собраниянь депутаттнэнень. Сюкпря вейсэнь важодеманть кисэ, кочкамотнесэ минек вейсэнь изнямонть кисэ, – мерсь В.Д.Волков. – Миненек вейсэ удалась ламо теемс. Весе изнявкстнэнь юрсо – масторонь прявттнэнь лезксэст ды башка Владимир Владимирович Путинэнь.

Сюкпрянь башка валт ёвтан Россиянь Федерациянь Президентэнтень минек республикантень свалшкань мелень явоманть кисэ!

Сюкпря Россиянь Федерациянь Правительствантень, «Единая Россия» партиянтень, Федерациянь Советэнь члентнэнень ды председателентень Валентина Ивановна Матвиенконень, Государственной Думань депутаттнэнень ды председателентень Вячеслав Викторович Володинэнь».

Владимир Волков тешкстызе, ламо проекттнэнь топавтомась удалась Равчирень федеральной округсо Россиянь Федерациянь Президентэнть Полномочной Представителенть Михаил Викторович Бабичень лезксэнзэ вельде.

«Монень мельспаро неемс те залсонть Равчирень федеральной округсо РФ-нь Президентэнь полномочной представителень полавтыцянть Алексей Петрович Суховонь, эсень ялган ды коллеган – Самарань областень губернаторонть Николай Иванович Меркушкинэнь, Пензань областень губернаторонть Иван Александрович Белозерцевень, Татарстанонь, Чувашиянь, Саратовань областень руководствань представительтнень. Сюкпря тенк ламо иень перть лезэв важодеманть кисэ, – мерсь МР-нь Прявтось. – Ёвтан сюкпря те залонтень пурнавозь весе покш инжетненень, конат састь минек тердемантень. Покш сюкпря весенень поздоровтнень ды монь лемс ёвтазь лембе валтнэнь кисэ!»

В.Д.Волковонь валонзо коряс, Мордовиясь сайсь покш изнявкст экономикасо ды социальной сферасо. «Созидательной покш важодемась эштё икеле. Мон тешкстынь эсень ды команданть туртов прявт тевтнень, конатнень лангсо важодема маласо вете иетнень перть. Анокстазь важодемань аравтлув, – тешкстызе сон. – Мордовиянть эрязасто касоманть-виевгавтоманть юрокс ашти виев экономикась, конась нежеди од содамочитнень, инновациянь промышленностенть, икеле молиця технологиятнень тевс нолдамонть лангс.

Республиканть седе тов виевгавтомась ашти минек конкурентоспособностенть эйстэ, эряви кастомс экспортонь ды инвестициянь потенциалонть, покшолгавтомс важодемань производительностенть».

Владимир Волков истя жо тешкстызе, эряви топавтомс покш технологиянь зярыя проектт промышленностьсэ, строительствасо, велень хозяйствасо. Теемс виев эскелькс наукоёмкой, цифровой экономиканть теемасо.

«Мон кеман, видеть сеть тевтне, конат топавтовить ломантнень мелест-арсемаст ванстозь. Мордовиянть виевгавтомась – те эрьва семиянть, эрьва ломаненть паро эрямось. Минь седе тов карматано вадрялгавтомо ломантнень эрямост, кастомо зарплататнень, тееме важодемань од таркат, виевгавтомо здравоохранениянть, образованиянть, явомо мель культурантень ды спортонтень. Башка мель явови ломантнень пшкадемаст топавтомантень: рамавиця эрямотаркатнень строямось, од китнень теемась, ЖКХ-нть вадрялгавтомась».