Августонь 11-це чистэ Пензасо Россиянь Правительствань Председателесь Дмитрий Медведев ютавтсь эрямо таркань строямонь виевгавтомань кевкстематнень коряс промкс. Тосо ульнесть Правительствань Председателень васенце полавтыцясь Игорь Шувалов, Равчирень федеральной округсо Россиянь Федерациянь Президентэнть полномочной представителесь Михаил Бабич, Строительствань ды жилищно-коммунальной хозяйствань министрась Михаил Мень, региононь прявттнэ.
Промксонть панжомсто премьер-министрась тешкстызе, отраслясонть ней тевтне молить вадрясто, ансяк эряви шка вешематнень ламолгавтомга, строямонь темпатнень одов кепедемга. «Целанек кудотнень максомань темпатнень аламодо валгтсомась а ловови зыяновокс индустриянть туртов. Теде башка государствась максы лезкс стандартонь эрямо таркатнень строямонть туртов, эли, кода сынст лемдясть икеле – «эконом-классонь эрямо таркат», ды сонзэ пельксэсь рынкасонть касы омбоце ие, те, паряк, сехте прявтось», – мерсь РФ-нь Правительствань прявтось.
Дмитрий Медведев истя жо тешкстызе, Правительствась полады важодеме дольщиктнень туртов финансонь рисктнень киртямонть коряс – невтемга, аволь умок РФ-нь Президентэсь тешкстась закон Долевой строительствань эрицятнень-участниктнень праваст ванстомань фондонть коряс. «Седе тов финансонь прозрачностень коряс вешематне седеяк пштилгавтовить: натой а мереви башка предпринимательтненень нолдамс тевс эрицятнень ярмакост, ансяк сеть ёнкстнэнь коряс, конат тешкстазь законсонть», – тешкстызе Правительствань Председателесь.
Строительствань ды жилищно-коммунальной хозяйствань министрась Михаил Мень пачтясь, неень шкане моли важодема 2018 иестэ «Стимулирование программ развития жилищного строительства субъектов РФ» подпрограммасонть участиянть туртов субъекттнэнь кочкамонть коряс. Икелепелев ярмактне явовить 32 регионтнэсэ 100 проекттнэнь топавтомаст туртов. Неть проекттнэнь коряс эрямотаркань максомань покшолматне – кавксо миллиондо ламо кавонзазь метрат – те седе ламо 2017 иенть коряс.
Мордовиянь Прявтонь тевтнень нурька шкас топавтыцясь пшкадсь промкссонть республикасонть эрямо таркань строямонь программанть тевс нолдамодо докладонть марто. Владимир Волков тешкстызе, региононь правительстванть туртов прявт тевекс кармась федеральной жилищной весе программатнесэ участиясь: «Молодая семья», «Устойчивое развитие сельских территорий», «Жилье для российской семьи».
Республикань лидерэсь башка тешкстызе «Молодая семья» программанть эрявикчинть ды социальной лезэнть. «Сонзэ тевс нолдамонть шкасто Мордовиясо од кудос совасть 11 тёжадо ламо семият. Тедеде максовить эштё 700 сертификатт. Те важодеманть вельде вадрялгавтовить демографиянь тевтне, ды минь арсетяно, те программанть коряс
финансированиянть эряви зярыяксть покшолгавтомс весе масторонть келес», – тешкстызе Владимир Волков.
Мордовиянь руководителесь истя жо тешкстызе каладозь кудосто одс эрицятнень ютавтомань программанть ды «Жилье для российской семьи» программанть поладомадост.
Эштё вейке тевесь, конанть вельде Мордовиянтень удалась ванстомс эрямо таркань строямонь покшолматнень, те льготань ипотекань программанть (5 процентт иезэнзэ) тевс нолдамось. Программась топавтови омбоце ие, сонзэ участникекс кармасть 3 тёжадо ламо ломанть. «Строямонь отраслянтень башка явозь инвестицият 5 млрд целковоень покшолмасо. Васенце пель иень невтевкстнэнь коряс республикасонть строямонь покшолматне кассть 15 процентс. Удалась кастомс строямонь материалтнэнь производствань покшолматнень, ванстомс отраслясонть важодемань кавто тёжадо ламо таркатнень», – тешкстызе Владимир Волков.
Мордовиянь руководителесь тешкстызе, республикась бажи икелепелевгак кастомс эрямо таркань строямонь покшолматнень, виевгавтомс льготань ипотеканть ды государствань лезксэнь лия ёнкстнэнь. Маласо вете иетнень перть Мордовиясо арсеви строямс эрямо таркань эштё 2 млн кавонзазь метрат.
Мордовия Республикань Прявтонть пресс-службась