Владимир Волков кортась «Т Плюс» ПАО-нь Генеральной прявтонть Андрей Вагнер марто теплосетень хозяйствань одкстомтомань кевкстематнеде

Владимир Волков кортась «Т Плюс» ПАО-нь Генеральной прявтонть Андрей Вагнер марто теплосетень хозяйствань одкстомтомань кевкстематнеде

Таштамковонь 15-це чистэ Мордовиянь Прявтось Владимир Волков ютавтсь важодемань вастовома «Т Плюс» ПАО-нь Генеральной прявтонть Андрей Вагнер марто. Кортавсть вейсэнь важодемань кевкстематне ды региононь прявтошонь теплосетень хозяйствань одкстомтомань коряс арсематне.

Телентень анокстамодо кортамсто, «Т Плюс» Мордовиянь филиалонь прявтонь тевтнень топавтыцясь Сергей Мишанин пачтясь, Саранскойсэ компаниянь объекттнэсэ топавтозь оборудованиянь витнема 340 млн. целковоень питнесэ. Теде башка, витнезь 29 вайгельбень кувалмсо теплосеть, ютавтозь 380 млн. целковойть.

Одкстомтомань программанть лувсо одс ветязь 11 вайгельбень кувалмсо трубат Лихачевонь, Косаревень, Т.Бибинань, Пуркаевень, Гожувской, Веселовскоень куротнева, Ст.Эрьзянь бульварга ды Октябрянь 60 иень проспектканть.

Кизэнь перть витнезь лембень пачтямонь магистральть Васенконь, Коммунистической, Войновонь, Семашконь, Б.Хмельницкоень, Ботевградской куротнева, Октябрянь 70 иень проспектканть.

Владимир Волков тешкстызе, эряви шкастонзо топавтомс витнемань тевтнень. «Ломантне пек пштистэ редить неть тевтнень – зярдо теплосетень витнемань коряс важодемась топавтови домка сёксня, пиземе ало, мейле эштё ошонь келес кадовить чувнозь таркат. Весементь эряви теемс шкастонзо», – мерсь Мордовиянь Прявтось.

Промкссонть истя жо мольсь кортамо республикасонть теплоснабжениянть кастомадонзо-кепетемадонзо. Тешкстазель, сонзэ эряви одкстомтомс. Пшти кевкстематнень витемань ды отраслянтень инвестициятнень тердемань прявт ёнксокс ашти Саранскоенть теплоснабжениянь питнень зонантень ютамось ды седе тов концессионной вейсладямотнень тешкстамось.

Альтернативной котельноень лувонть коряс лембень рынкань од моделеньтень ютамонть пингстэ арсеви топавтомс зярыя тевть, конат кандыть социальной смусть. Истя, покш ярмакт (150 млн целковойде ламо) явовить ошонь муниципальной сеттнень витнемс. Истя жо компаниясь арсеви педе пев витнемс Саранскоень пси ведень пачтямонь сетенть, неть тевтнес эрявить 658 млн целковойть. Те вадрялгавтсы пси веденть.

Владимир Воклов ёвтась мель проектэнь топавтомань коряс важодемань группанть теемадонзо. «Бути питнень од зонантень ошонть ютамось лезды витемс псинть ды веденть пачтямонь стакачитнень, сестэ тень эряви топавтомс», – тешкстызе региононь руководителесь.

Андрей Вагнер тешкстызе те кевкстемань социальной покш смустенть.

Неень шкантень теплоснабжениянь питнень зонантень ютамодо меленть кемекстызь Ульяновскойсэ, Оренбургсо, Владимирсэ ды Самарасо.

Мордовия Республикань Прявтонть пресс-службась