Апрелень 24-це чистэ Мордовиянь Прявтонь тевтнень нурька шкас топавтыцясь Владимир Волков ютавтсь республикань терроризмань а нолдамонь ды оперативной штабонь планонь коряс вейсэнь промкс.
Оперативной обстановкадонть ды малавгалиця кенярксчитнес анокстамодонть пачтясть МВД-нь, МЧС-нь, Росгвардиянь представительтне.
Кода тешкстазель, кенярксчитнестэ правань ванстомань ды идемань службатне ютыть важодемань виевгавтозь режимс. Башка ванновт алов саевить ламо ломанень пурнавома таркатне. Республикань МВД-нь невтевкстнэнь коряс, правопорядоконть мельга ваномо кармить кавто тёжадо ламо полицейскойть, истя жо Росгвардиянь, ванстомань башка организациянь, общественной вейсэндявксонь представительть.
«Коень коряс маень кенярксчитнень тешкстамосо примить участия республикань ламо эрицят. Васень майстэнть минь чествоватано трудонь ломантнень, ютавтови профсоюзонь важодицятнень молемась. Изнямонь Чись - минек прявт кенярксчинек, сехте вечкевикс ды мелень явовтыця. Те чистэнть республикасонть ютавтовить ламо ломань марто сядот мероприятият. Истя, ютазь иестэ «Бессмертный полк» ютамосонть примасть участия республикань 25 тёжат эрицят. Секскак энялдан, те шкастонть весе ведомстватне ды службатне важодест весе вийсэст. Эряви теемс весементь, ютавтовиця эрьва мероприятиясонть ломнатнень сэтьмечист ванстомга», - тешкстызе Владимир Волков.
Промкссонть ваннозельть республикань объекттнэнь терроризмадо ванстомань, общественной сэтьмечинь топавтомань, кирваземань а нолдамонь, миграциянь контролень уровнянть кастомань кевкстематне.
Мордовия Республикань Прявтонть пресс-службась