Декабрянь 15-це чистэ Саранскойсэ панжовсь «АШАН» компаниянь «Наша Радуга» гипермаркетэсь. Теке жо чистэнть Мордовиянь Прявтось Владимир Волков вастовкшнось Россиянь АШАН Ритейл Гипермаркетнэнь генеральной прявтонть Олег Альмахов марто.
Микшнемань содавикс сетень прявтось евтнесь региононь Прявтонтень топавтовиця проекттэнть: Саранскойсэ «Наша Радугась» кармась юбилейной, кеменце, гипермаркетэкс Россиясо, тов путозь инвестицият 400 млн целковоень покшолмасо, микшнемань площадесь - 3 тёжат кавонзазь метрадо ламо. Тесэ микшневить 13 800 эрьва кодат товарт, сынст юткссо 6500 - ярсамопелень ды 7300 - аволь ярсамопелень». Олег Альмахов истя жо тешкстызе, од гипермаркетсэнть уш улить региононь производительтнень товарост, сынст юткссо «Ламзурь» ОАО-сь, «Чамзинская» птицефабрикась, «Атяшевский» МПК» ООО-сь, те ёнкссо важодемась поладови.
Башка тешкстазель од магазинэнть инновациянь ёнксось. Сон сюмавозь сень марто, весе кассатнесэ путозь пандомань лезксэнь а вешиця системат, тов совавтозь сканированиянь 12 станцият ды пандомань 14 терминалт. Те системась лезды киртямс очередтнэнь.
Владимир Волков тешкстызе, республикань потребителень рынкасонть содавикс лем марто покш налксицянть появамось - вадря динамика региононь экономикнать туртов, бизнесэнь виевгавтоманть ды важодемань од таркатнень тееманть туртов.
«Минек туртов пек эрявикс, эсь важодемасонк тынь нежедеде минек производительтнень, сынст ютксо фермерэнь хозяйстватнеяк, нолдавксост лангс. Арсян, мордовиянь ярсамопелень вадрячист ды ассортиментэсь достойноть саемс свалшкань таркат «АШАН» бренд марто лавкатнень полкатнесэ, - мерсь Республикань Прявтось. - Теде башка, зярыя позициятнень коряс - алт, сывельть, саразонь сывельть, ловсонь продукцият, ламбамопельть - мордовиянь товаронь нолдыцятне топавтсызь лия регионтнэсэ важодиця «АШАН» супермаркетнэнь эрявиксчист».
Мордовиянь Прявтось максь мель аламодо полавтомс Саранскоень «АШАНонь» дизайнэнть, мазылгавтомс ушоёнксонть эрзянь-мокшонь тешкссэ: «Саранскойсэ улезэ Мордовиянь АШАН - содавиця ды лиятнень ёнов а молиця, раськень тешкс марто!»
Вастовоманть шкасто мольсь кортамо Саранскойсэ «АШАН» гипермаркетнэнь строямонь коряс вейсэнь важодемадонть. Ванкшнозельть сынст стявтомань таркатне, сынст юткссо - од микрорайонтнэ, конат строявить республикань прявтошсонть Футболонь коряс мирэнь чемпионатонтень анокстамонть лувсо.
Мордовия Республикань Прявтонть пресс-службась