Мартонь 18-це чистэ Мордовиянь Прявтось Владимир Волков примась участия Россиянь Федерациянь Президентэнть кочкамотнесэ. Обед шкане региононь руководителесь нинзэ ды цёранзо марто сась 557 № кочкамонь участкантень, конась панжозель Рузонь драмань театрасонть.
Кочкицятнень ды участковой кочкамонь комиссиянь представительтнень марто шумбракстнемадонть мейле, Владимир Волков невтизе паспортонзо ды, бюллетененть саемадонть мейле, тусь вайгелень максомань кабинкантень. Теде мейле, кода бюллетенесь нолдазель кочкамонь урнантень, Владимир Волков макссь каршо валт региононь журналисттнэнь кевкстемаст лангс.
«Васняяк, мон бу меревлинь республикань весе эрицятненень, сетненень, кить зярс эзизь максо вайгелест, молемс кочкамонь участкатнес ды топавтомс гражданской долгост. Тешкстаса, Мордовиясь свал макссь вайгелензэ виевгавтоманть, сэтьмечинть ды минек масторонь эрицятнень вадря эрямонть кисэ. Минек покш меленек, эрязасто виевгадоволь минек республикась, вадрялгадоволь Саранскоесь ды Мордовиянь велетне, касоволь промышленностесь, велень хозяйствась, строительствась. Минек ломантне улест шумбрат, тень туртов ламо тееви масторсонть ды республикасонть. Минек вийсэ ванстомс те лувонть, тень туртов течи питней эрьва вайгелесь!» – тешкстызе сон.
Теке чистэнть Владимир Волков примась участия рейтингень вайгелень максомасонть ошонь территориянь вадрялгавтомань-мазылгавтомань проекттэнть кисэ, конась мартонь 18-це чистэ истя жо ютась кочкамонь участкатнесэ. Кевкстнемась анокстазь «Формирование комфортной городской среды» приоритетэнь проектэнть юрсо. Васенце туронть коряс 24 проекттнэнь эйстэ рейтингень кочкамонь васенце колмо таркатнень саизь неть общественной таркатне: Ярославской куросонть Изнямонь 70 иень Паркось, Веденяпинтнэнь лемсэ бульварось ды Ленинской райононь паркось. Владимир Волков тешкстызе, неть проекттнэнь эйстэ эрьвантень сон путызе таликанзо важодемань тевдеемань башка шкатнестэ ды лови эрьванть эйстэст пек эрявиксэкс Саранскоенть вадрялгавтомга.
Мордовия Республикань Прявтонть пресс-службась