Владимир Волков: «Минек прявт тевенек – республикань весе эрицятненень медицинань лезксэнь явоманть туртов условиятнень теемась»

 Владимир Волков: «Минек прявт тевенек – республикань весе эрицятненень медицинань лезксэнь явоманть туртов условиятнень теемась»

Медьковонь 13-це чистэ Саранскойсэ Изнямонь площадьсэнть максовсть медицинань таркасто таркас шаштневиця комплекстнэнь ды медицинань куроксто лезксэнь явомань машинатнень пельде ключт республикань больницятненень. Весемезэ Мордовияв «Здравоохранение» нацпроектэнть лувсо пачтязь таркасто таркас шаштневиця 33 комплекст (17 фельдшерэнь-акушерэнь пункт, 9 маммографт, 7 стоматологиянь комплекст, 3 флюорографт), истя жо куроксто лезксэнь явомань 10 машинат.

Республикань Прявтось тешкстызе, специализированной неть машинатнень максомаст вельде касы медицинань лезксэнь доступностесь.

- Истямо тев икеленек путсь Россиянь Президентэсь В.В.Путин, ды минь сонзэ топавтанок, - мерсь Владимир Волков. – Россиясо нолдазь од техникась пачтяви республикань 16 ёнкстнэс ды Саранскоев. Мобильной комплекстнэнь тевс нолдамось лезды явомс медицинань васенце лезкс республикань 245 тёжат эрицятненень. Ламот велетнесэ арасть медицинань васенце звенань организацият. Неть комплекстнэ кармить важодеме сеть васоло велетнесэ, косо эрить 100 аламо ломанть.

Од техникасонть путозь неень шкань весе оборудованиясь. Мобильной ФАП-сь – те чары лангсо поликлиника. Тесэ ули орматнень диагностикань, куроксто лезксэнь явоманть туртов оборудования. Медицинань комплекстнэ кармить ардтнеме велетнес диспансеризациянь, профоосмотрань ютамо, ливксэнь путомо, пешксетнень, ансяк чачозь эйкакштнень, сыре ды сеедьстэ сэредиця ломантнень мельга ванномо. Таркасто таркас шаштневиця поликлиникатнесэ медицинань лезкс чизэнзэ явови малав 50 ломантненень.

- Прием кармить ветямо аволь ансяк терапевтт, истя жо лия специалистт: офтальмологт, Лор-врачт, акушер-гинекологт, бути карми эрявомо, педиатрат ды хирургт, - тешкстызе Владимир Волков. – Истя жо ванкшнотано се кевкстеманть, мобильной ФАП-сэ улезэ аптека. Те лезды васоло велень эрицятненень получамс рецепт ды сеске саемс лекарстват.

Кода мерсь Мордовиянь Прявтось, питневтеме здравоохранениясь, медицинань доступностесь лездыть коронавирусонь крашо бороцямосонть. Тень вельде удалась а нолдамс зыянов сценариенть, цидярдомс ды ванстомс тёжат эрямотнень. Ней республикань медучреждениятне аламо аламо ливтевить ковидэнь госпиталень режимстэнть.

Республикань Прявтось ёвтась сюкпря медицинань важодицятненень коронавирусонь инфекциянь ламолгадомань шкасто стака важодемаст кисэ ды башка тешкстызе, здравоохранениянь первичной звенань виевгавтомась поладови. Тедеде республикасонть панжовить стационарной 70 ФАП-т ды врачонь амбулаторият. Поладови «Бережливая поликлиника» проектэсь. Рамавить медицинань техника, ИВЛ-нь аппарат, лекарстват, медицинань куроксто лезксэнь явомань машинат.

- Тедеде минь панжинек эйкакшонь од поликлиника Химмашсо, «Юбилейнойсэ» кармась важодеме покштнень туртов поликлиникась, ковдо икеде минь кундынек покш проектэнтень – Юго-Западсо Эйкакшонь больницянь хирургиянь комплексэнь строямонтень, - мерсь Владимир Волков. – Те больницясонть карми сехте од оборудования, тень туртов минь тонавтнинек Россиянь ды масторлангонь икеле молиця медицинань куншкакуротнень опытэнть. Теде башка, тедеде строяви онкодиспансерэнь поликлиникась ды ушодтано сонзэ ташто корпустнэнь витнеманть. Истя жо минь ушодтанок строямо эйкакшонь поликлиника Рузаевкасо».

Мордовиянь Прявтось макссь медицинань од машинатнень пельде ключт республикань лецямонь учреждениянь прявт врачтненень.

Таркасто таркас шаштневиця ФАП-т максозь:

– Орданьбуень райононь больницянтень;

         – Отяжбуень райононь больницянтень;

         – Дубенкань райононь больницянтень;

         – Зубово-Полянань райононь больницянтень;

         – Инсаронь райононь больницянтень;

         – Ицялкань райононь больницянтень;

         – Ковылкинань райононь больницянтень;

         – Комсомольскоень райононь больницянтень;

         – Кочкуровань поликлиникантень;

         – Краснослободскоень центральной райононь больницянтень;

         – Ромодановань поликлиникантень;

         – Рузаевкань центральной райононь больницянтень;

         – Ташто Шайговань райононь больницянтень;

         – А.И. Рудявскоень лемсэ Темниковонь райононь больницянтень;

         – Теньгушевань райононь больницянтень;

         – Торбеевань центральной райононь больницянтень;

         – 3№ Эйкакшонь поликлиникантень.

Таркасто таркас шаштневиця маммографт максозь:

         – Отяжбуень райононь больницянтень;

         – Ицялкань райононь больницянтень;

         – Ковылкинань райононь больницянтень;

         – Комсомольскоень центральной райононь больницянтень;

         – Краснослободскоень центральной райононь больницянтень;

         – Рузаевкань центральной райононь больницянтень;

         – А.И. Рудявскоень лемсэ Темниковонь райононь больницянтень;;

         – Теньгушевань райононь больницянтень;

– 2№ поликлиникантень.

Таркасто таркас шаштневиця флюорографт максозь:

– Ицялкань райононь больницянтень;

– Кочкуровань поликлиникантень;

– Республикань противотуберкулезной диспансерэнтень.

Мобильной стоматологической комплекст максозь:

– Ковылкинань райононь больницянтень;

– Комсомольскоень центральной райононь больницянтень

– Рузаевкань центральной райононь больницянтень;

– МР-нь стоматологиянь поликлиникантень.

Скорой помощень 10 автомобильть максозь Медицинань лезксэнь куроксто явомань станциянтень, Республикань клинической больницянтень, Зубово-Полянань, Краснослободскоень, Комсомольскоень ды Рузаевкань больницятненень.

Мордовиянь Прявтось ваннызе од техниканть ды макссь покш питне сонзэ возможностнень туртов. Республикань здравоохранениянь министрантень Олег Маркиннэнь кармавтсь, медицинань неть комплекстнэ нолдавост тевс весе вийсэсь, тень туртов эряви ладямс эрицятнень пельде яволявтоматнень саемань коряс важодеманть.

Мордовия Республикань Прявтонть пресс-службась