Мордовиянь Прявтось Владимир Волков сентябрянь 22-це чистэ примась участия МР-нь Государственной Собраниянь котоце тердемань кемготовоце сессиясонть.
Прмксонь прявт кевкстемакс кармасть МР-нь Правительствань Председателенть таркас, МР-нь Правительствань Председателень васенце полавтыцятнень ды полавтыцятнень таркас кандидатуратнень кемекстамост, Мордовия республикасо Ломантнень праваст коряс Уполномоченноенть аравтомась.
Владимир Волков, депутаттнэнь икеле кортамсто тешкстызе, меельце иетнестэ ламо теезь сень туртов, республикань властесь улезэ седеяк лезэвекс ды панжадокс.
«Те ёнкссонть минек изнявкстнэ тешкстазь Россиянь Правительствасо, Экономикань развитиянь министерствасонть. Исполнительной властень региононь органтнэнь тевдеемань лезэвчинтень питнень максоманть коряс Мордовиясь кавто иень перть совась масторонь икеле молиця регионтнэнь юткс, – мерсь Мордовиянь Прявтось. – Течи минь муйтяно чарькодема федеральной центранть пельде республикань виевгавтоманть коряс кевкстематнень витемасо. Те республикань весе сообществанть изнявксозо. Сонзэ юрсо ашти ломантнень пельде властень тевдеемантень покш питнень максомась. Ансяк шкась а ашти таркасонзо. Минек икелев путовить од, седеяк стака тевть. Сынст лезэвстэ топавтомась ашти сень эйстэ, кода куроксто, видестэ ды превейстэ кармить важодеме министерстватнень ды исполнительной властень государственной лия органтнэнь прявттнэ ды должностной лицятне».
Ёвтасынек, тешкстазь Мордовия Республикань государственной властень исполнительной органтнэнь структурасо полавтоматнень совавтомадо Указось. Сонзэ коряс сынь киртявить 21-с (ульнесть – 30).
Кадовить 16 министерстват, кавто госкомитет ды кавто республикань службат, истя жо Россиянь Федерациянь Президентэнть пингстэ республикань Свалшкань представительствась.
Киртязь министерстватнень ды ведомстватнень тевест кармить топавтомо властень лия органтнэ. Истя, сисем министерстватне одкстомтовить, лиятненень максовить од лемть. Те:
– Мордовия Республикань Жилищно-коммунальной хозяйствань, энергетикань ды эрицятнень гражданской защитань министерствась,
– Экономикань, торговлянь ды предпринимательствань министерствась,
– Эрицятнень социальной защитань, важодемань ды занятостень министерствась,
– Культурань, национальной политикань, туризмань ды архивень тевень министерствась,
– Мордовия Республикань Строительствань, транспортонь ды ки лангонь хозяйствань министерствась,
– Велень хозяйствань ды продовольствиянь министерствась,
– Мордовия Республикань Юстициянь министерствась.
Теде башка, Республикасонть тееви Тарифтнень коряс республикань од службась.
Государствань рамамотнень ды микшнемтанень коряс тевтнень карми топавтомо «Региональный центр торгов» государственной казённой учреждениясь.
Исполнительной властень 13 органтнэсэ полавтомат а улить. Те:
– Финансонь министерствась,
– Образованиянь министерствась,
– Здравоохранениянь министерствась,
– Целевой программатнень министерствась,
– Промышленностень, наукань ды од технологиятненнь министерствась,
– Вирень, охотничьей хозяйствань ды природопользованиянь министерствась,
– Информатизациянь ды связень министерствась,
– Печатень ды кулянь министерствась,
– Спортонь ды физической культурань министерствась,
– Од ломантнень тевест коряс госкомитетэсь,
– Мордовия Республикань ули-паронь ды модань отношениятнень Государственной комитетэсь,
– Республикань ветеринарной службась,
– Истя жо Московсо Постпредствась.
Весе министерстватнесэ ды ведомстватнесэ тееви од стуруктура, од лувсо ладявить прявт тевтне ды функциятне.
«Эряви полавтомс отраслянь министерстватнень прявт тевест сень лувсо, эрьвась эйстэст вадрясто содавлинзе сынст ответственностень ёнкссо молиця тевтнень ды сы шкань виевгавтомань аравтлувонть, – тешкстызе Владимир Волков. – Нама, ули кастозь прявттнэнь ды должностной лицятнень ответственностест. Тедеде Кучомасонть мон кармавтынь Правительствантень властень органтнэсэ ютавтомс 10% киртямот. Те одкстомтоманть вельде тевесь ули топавтозь. Те миненек топавтовсь аволь шождасто».
Весемезэ арсеви киртямс 80 должность (сынст ютксо 6 госдолжность ды исполнительной властень органтнэнь прявтонь 5 должность, сынь а кандовить Правительствань члентнэнень).
«Кеман, тень вельде вадрялгавтови управлениянь сферасонть кадрань политикась. Тень туртов республикасонть тееви система, конась касты-кепети сы шкань государственной служащейть, виев управленецт, – мерсь Мордовиянь Прявтось. – Кавто чиде икеле одс кочказь губернатортнэнь марто теде кортась Россиянь Президентэсь В.В.Путин».
В.Д.Волковонь валонзо коряс, республикань руководстванть, правительстванть туртов тешкстазь прявт тевтне, конатнень лангсо эряви важодемс маласо вете иетнень перть. Анокстазь Важодемань программа. «Весенень миненек эряви путомс талика сонзэ топавтомантень. Эрьвантень эсензэ таркасо эряви важодемс видестэ ды лезэвстэ, кода эряви. Ды сестэ минь сайтяно покш изнявкст», – тешкстызе сон.
Депутаттнэ кирдизь кандидаттнэнь, конатнень ёвтынзе МР-нь Прявтось. Мордовия Республикань Правительствань Председателекс кемекстызь Владимир Федорович Сушковонь кандидатуранть. В.Д.Волков тешкстызе сонзэ, кода виев управленецэнть. Ёвтызе, В.Ф.Сушковонь прявтсо Правительствась аволь вейке ие лезэвстэ важоди путозь тевтнень топавтомаст лангсо.
Мордовия Республикань Правительствань Председателень Васенце полавтыцякс – Экономикань, торговлянь ды предпринимательствань министракс – Владимир Николаевич Мазовонь, Мордовия Республикань Правительствань Председателень Васенце полавтыцякс – Велень хозяйствань ды продовольствиянь министракс – Владимир Николаевич Сидоровонь.
Истя жо Мордовия Республикань Правительствань Председателень полавтыцякс аравтозь Геннадий Петрович Комусов ды Галина Алексеевна Лотванова.
Мордовия Республикань Правительствань Председателень полавтыцякс – Целевой программатнень министракс Алексей Николаевич Меркушкин, Мордовия Республикань Правительствань Председателень полавтыцякс – Промышленностень, наукань ды од технологиятнень министракс Александр Иванович Седов, Мордовия Республикань Правительствань Председателень полавтыцякс – Финансонь министракс Алексей Юрьевич Симонов, Мордовия Республикань Правительствань Председателень полавтыцякс –Строительствань, транспортонь ды ки лангонь хозяйствань министракс Виктор Владимирович Цыганов, Мордовия Республикань Правительствань Председателень полавтыцякс – Жилищно-коммунальной хозяйствань, энергетикань ды эрицятнень гражданской защитань министракс Игорь Анатольевич Чадов.
МР-со Ломантнень праваст коряс Уполномоченноекс депутаттнэ аравтызь Валерий Лёвинэнь, те таркасонть сон полавтызе Юрий Ястребцевень. Сессиянть лувсо омбудсменэсь примась присяга, теде мейле сонензэ максозь удостоверения.
Сессиянь участниктне ваннызь «2017 иес ды аравтлувонть мельс саезь 2018 ды 2019 иетнес Мордовия Республикань бюджетс» полавтоматнень совавтомадо МР-нь законопроектэнть.
Алескей Симоновонь валонзо коряс, республикань бюджетс полавтоматнень совавтомась сюлмавозь федеральной бюджетстэ ярмактнень явомаст марто.
«Финансонь лезксэсь покшолгавтовсь 89 млн целковойс, сынст эйстэ 77 млн целковойтне – Россиянь Федерациянь Президентэнь резервань фондстонть. 50 млн целковойть максовить республикань инфекционной больницянь корпусонть, 27 млн целковойть – Саранскойсэ 2№ эйкакшонь поликлиниканть педе-пев витнемантень, 10 млн целковойть – инвалид-эйкакштненень лекарстватнень ды лецямонь ярсамопелень рамамонтень», – толковизе А.Ю.Симонов.
Законопроектэнть вельде покшолгавтозь государтвенной политикань прявт ёнкстнэнь финансированиясь. Те топавтови алкоголень продукциянть лангс акцизтнэнь кемекстазь аравтлувдонть седе ламо пурнамонть вельде – 408,6 млн целковойть.
Покшолгавтозь государственной учреждениятнень кирдемаст лангс расходтнэ 218 млн целковойс, истя жо важодемань кисэ пандомась – 66 млн целковойть, госдолгонь обслуживаниясь – 31 млн целковойть, эрицятнень социальной обеспечениясь – 54 млн целковойть, муниципальной образованиятненень финансонь лезксэнь явомась – 106 млн целковойть.
Полавтоматнень мельс саезь республикань бюджетэнь доходонь пельксэсь ули 43 млрд 294 млн целковойть, расходонь – 45 млрд 495 млн целковойть. Бюджетэнь дефицитэсь эзь полавтово ды кадовсь 2 млрд 201 млн целковойть.
Исят жо депутаттнэ ванкшнызь «О внесении изменения в статью 11 Закона Республики Мордовия «О межбюджетных отношениях в Республике Мордовия» закононь проектэнть, конань коряс васенцеде карми топавтовомо местной инициативатнень республикань бюджетстэ софинасированиясь.
«Арсеви паритетной лувсо софинансированиянь топавтомась – финансонь лезксэнь вейке целковоесь самооблажениянь вейке целковоень лангс.
Максозь ярмактнень мереви ютавтомс муниципальной образованиятнень вадрялгавтомс, историянь ды культурань памятниктнень ванстомантень, эрицятнень туртов ведень ветямс, автомобилень китнень строямс ды витнемс, лия тевтнес», – толковизе Алексей Симонов.
Тешкстасынек, эрьва башка тевсэнть самооблажениянь кевкстематнень муниципальной образованиятнень эрицятне кармить ванкшномо сынсь.
«Те тевесь топавтови Оренбургонь, Кировонь, Самарань областнесэ, Пермень крайсэнть. Татарстан Республикасонть ютазь иестэнть самооблажениянь механизманть лувсо максозь 183 млн целковойть», – мерсь А.Ю.Симонов.
МР-нь Счётной палатань аудиторокс депутаттнэ кирдизь Игорь Сафоновонь кандидатуранть, те таркасонть тевтнень сон карми топавтомо 5 иеть.
Весемезэ сессиясонть ваншкновсть 13 кевкстемат, промкссонть ветясь МР-нь Госсобраниянь Председателесь Владимир Чибиркин.