Апрелень 18-це чистэ Мордовиянь Прявтось Владимир Волков ютавтсь промкс, конась алтазель Саранскоень «Мордовия-Арена» од стадионсонть варчамонь васенце матчонть ютавтомантень анокстамонь кевкстематненень. Вастовомасонть ульнесть министерствань ды ведомствань, стадиононь строямонь заказчикень ды подрядчикень, федеральной структуратнень, волонтёронь ды лия организациятнень представительтне, конат важодить Футболонь коряс масторлангонь чемпионатонть ютавтомасонть.
Шумбракстнемань валсонть Владимир Волков башка тешкстызе, варчамонь васенце матчось ютавтови сень туртов, практикасо ванномс весе службатнень, конат ответственнойть Саранскойсэ матчтнень ютавтоманть коряс, важодемаст ды анокчист. «Эряви явомс васень мель ламо ломанень улема марто стадионсонть ютавтовиця мероприятиятнень кода смустень, истя жо практикань кевкстематненень. Сехте прявтокс ютксост аштить сэтьмечинь ванстомань тевтне ды весе стадиононть перька навигациянь анокстамось. Эряви, штобу варчамонь матчонь весе участниктне – ваныцятне, СМИ-нь представительтне, организатортнэ, обслуживающей персоналось – вадрясто содавлизь стадионганть якамонь схематнень ды маштовольть куроксто муемс ки. Тень эйстэ ашти тёжат ломантнень сэтьмечист», – тешкстызе Республикань Прявтось.
Арсеви, «Мордовия-Аренасо» васенце матчонть ютавтома шкасто истя жо варчавить транспортонь схематне, конат анокстазь стадиононтень чемпионатонть шкасто ваныцятнень ускомаст туртов, истя жо – башка автобустнэсэ-шатлатнесэ. Анокставить матченть шкасто волонтёртнэнь, медицинань службань сотрудниктнень, контролертнэнь-распределительтнень, бозопасностень ды топавтомань службатнень важодемань схемаст.
Промкссонть башка мель явозель варчамонь матчонть шкасто кенряксчинь программанть анокстамонь кевкстематненень. Учови, матчонть ушодовомадо икеле ды оймсема шкатнестэ стадиононть маласо кармить важодеме шкинемань коллективть, зярыя фан-площадкат, теевить оймсема таркат эйкакштнень туртов ды микшнема таркат.
Владимир Волков тешкстызе: «Чемпионатонь прявт объектэнть – «Мордовия-Арена» стадиононть панжомась – пек покш тев аволь ансяк ошонть ды республиканть туртов. Минек эрицятне кармить улеме спортонь масторлангонь первенствань объектсэнть, ды прявтось, минек стадионсонть те васенце покш мероприятиясь кармазо весень туртов редявиксэкс ды мельс кадовицякс!»
Теде башка, республикань Прявтось кармавтсь анокстыцятненень, варчамонь васенце матчонтень понгост Мордовиянь футболонь ветерантнэ, алкуксонь ваныцятне, те налксеманть вечкицятне, конатнень туртов 45 тёжат таркас футболонь стадиононть панжомась ашти алкуксокс редявикс тевекс.
Ледстясынек, варчамонь васенце матчось ютавтови «Мордовия-Арена» стадионсонть апрелень 21-це чистэ 17 чассто. Футболонь коряс Россиянь Первенстванть лувсо Профессиональной футболонь лигань командатнень-клубтнень ютксто «Мордовия» футболонь клубось вастови Удмуртиясто инжетнень марто – «Зенит-Ижевск» командась.
Матчонтень билеттнэ микшневить «Старт» стадиононь кассатнесэ (адресэсь: Московской курось, 12). Билетэнть питнезэ – 100 целковойть. «Мордовия-Арена» стадиононтень совамось панжови налксеманть ушодовомадонть 2 чассто икеле.
Мордовия Республикань Прявтонть пресс-службась