Понедельникстэ, ноябрянь 27-це чистэ, Республикань Кудосонть Мордовиянь Прявтось Владимир Волков примась участия ламо эйкакшонь кастыця семиятнень марто вастовомасонть, конась алтазель Весероссиянь кенярксчинтень – Авань чинтень.
Покш Залсонть В.Д.Волков казсь «За заслуги в воспитании детей» Мордовия Республикань Прявтонь I, II ды III степенень Почётонь дипломт ды ярмаконь премият ламо эйкакшонь триця аватненень. Истя жо сыненст казевсть павлопосадской мазый пацят.
Тешкстасынек, те казнесь максови 2011 иестэ саезь сеть тетятненень-аватненень, конат трить-кастыть ниле ды седе ламо эйкакшт. Сон максовсь уш 125 семиятненень.
«Кемень иеде икеле кармась максовомо лиятнень ёнов а молиця казнесь – Ламо эйкакшонь авань Почётонь дипломось, конань марто максовить ярмакт ды башка льготат, – тешкстызе Владимир Волков. – Истямо диплом максозь республикань 470 ламо аванень. Ды течи эщтё 20 ламо аватне казевить истямо дипломсо».
Семиятненень лезксэнь явомань, демографиянь тевтнень вадрялгавтомань, одтнэнь кастомань-кепетемань кевкстематненень Мордовиясо явови покш мель.
«Минь виевгавтано социальной инфраструктуранть, строятано ипотекань коряс кудот, школат, эйдень кужот, ков седе ламо эйкакшт ды од ломанть явить мель наукантень, творчествантень, спортонтень. Меельце иетнестэ ламо теезь авань ды эйкакшонь институтонть кемекстамга. Седеяк виевгавтови ламо эйкакшонь трицятнень ды нужасо эрицятнень туртов социальной лезксэнь максомась», – мерсь Мордовиянь Прявтось.
Республикасонть ёроковсто нолдавить тевс репродуктивной технологиятне. Эрьва иестэ касыть ЭКО-нь ютавтомань покшолматне, касы сонзэ лезэвчизэ. Те важодеманть вельде кемень иетнень перть лецямонь лезкс мельга пшкадсть 2,5 тежат семиянь парат. Те лувонть тевс нолдазь чачсть 700 шумбра эйкакшт. Тень пингстэ киртяви ансяк чачозетнень ды аватнень куломась, целанек эрицятнень киртявомась. Меельце 5 иетнень перть малав кавксть киртявсть эйкакшонь таргавтоматне, седе аламот кармасть кадомо ансяк чачозь эйкакшост. Те шканть перть кавксть киртявсть уроз эйкакштне. Ламотнень кармасть од тетяст-аваст, сынь саезь семияс.
«Минь келейгавтано эйкакш марто семиятненень лезксэнь явомань системанть. Вейкесь эйстэст – республикань авань (материнской) капиталонь явомась. Мордовиясо истят сертификатт макссть 5 тёжадо ламо семиятненень, ютксост 98 процентт семият неть ярмактнень нолдызь эрямо таркаст паролгавтомс, – мерсь Владимир Волков. – Эрямонь программатнень покш путовксост демографиянь ситуациянть витемасо. Ансяк «Молодая семья» программанть коряс од эрямо таркас совасть 11 тежадо ламо семия. Тедеде сонзэ коряс эште 700 од семият вадряглавтызь эрямо таркань условияст».
Мордовиясо, сеть семиятненень, косо колмо ды седе ламо эйкакшт, поладови питневтеме кудонь путомс ды эсь хозяйствань ветямс модань участкатнень явомась.
«Ней кадовить неть участкатнес коммунальной инфраструктурань ветямонь кевкстематне. Минь карматано эскельксэнь эскелькс витеме неть стакачитнень», – толковизе МР-нь Прявтось.
Ламо эйкакшонь триця семиятнесэ вишкинетнень мельга якамонть кисэ пособиятне пандовить колмо иетнень топодемас, дополнительной пособият явовить студентэнь семиятненень. Эрьва иестэ Тонавтнемань иенть ушодовомсто ды Инечинь кенярксчинтень явови ярмаконь лезкс.
Башка мель явови эйкакштнень кизэнь оймсемантень. Тедеде оймсесть ды витизь шумбрачист малав 40 тёжат эйкакшт, сынст ютксо 15 тёжат питневтеме путевкат максозь стакасто сэредицят, урозт ды нужасо эриця семиясто эйкакштненень.
«Чарькодеви, прявт решения эйкакшонь чачтомадо семиясонть прими авась. Секскак демографиянь тевтнень вадрялгавтоманть коряс мы, васняяк, минь ёвтатано сюкпря минек тейтерь-аватненень! – мерсь В.Д.Волков. – Аволь виде кортамс ансяк аватнень таликадост семиясо кастомасонть-трямосонть. Ули мелем башка тешкстамс тетятнень ответственностест вельмевтемадонть. Тей пурнавозь семиянь прявттнэ тешкстыть тень эсест примерсэст. А стяко кортыть – сехте прявтось, мезе теить тетятне-аватне эсест эйкакшост туртов, те алкуксокс вечкить ды мелявтыть вейкест-вейкест кисэ».
Мордовиясо иестэ иес касыть ламо эйкакшонь триця семиятне. Вете иетнень перть сынь ламолгадсть 1600 ламо эйкакшонь семияс, весемезэ эйстэст 5,5 тёжат.
«Ули мелем ёвтамс конкретной примерт. Тедеде Саранскоень эрицянть Светлана Николаевна Серовань ды Дубёнкань ёнксонь Сайнино велень эрицянть Ирина Владимировна Ишуткинань семиятнесэ чачсть вейксэце эйкакшт! – ёвтнесь Владимир Волков. – Теде башка эштё сисем семиятнесэ чачозетне кармасть кавксоце эйкакшокс. Теде башка, иенть ушодовомсто 57 семиятнесэ чачсть ветецеть, котоцеть, сисемецеть эйкакшт. 163 семиясо нилеце эйкакш. Вана сынь – минек шкань алкуксонь геройть! Геройтне – те весе тынь, минек мельвановикст ламо эйкакшонь кастыця ават ды тетят.
Республикань руководствась эсь ёндо алты икелепелевгак теемс весементь тыненк лездамга, весе семиятненень эйкакшонь кастомасонть, теемс паро условият шумбрачист ванстомга, образованиянть получамга, культурань ды физической ёнкстнэнь кемекстамга».