Субутасто, февралень 11-це чистэ, Мордовиянь Прявтось Владимир Волков ванкшнынзе «Птицефабрика «Октябрьская» АО-нь важодиця площадкатнень строявиця производствань вийтнень. Предприятиянь прявтонть Иван Андинэнь марто региононь прявтось кортынзе 2016 иестэ важодемань итогтнень ды сы шкань тевтнень. Вастовомасонть ульнесть МР-нь Правительствань Председателенть васенце полавтыцясь – Велень хозяйствань ды продовольствиянь министрась Владимир Сидоров.
Ванкшнозь «Болотниково» бройлерэнь кастомань коряс од комплексэсь, ве шкасто тосо кирдевить 800 тёжат прят. Проектэнь вийтнес лисемстэ иезэнзэ тосо кармить нолдавомо 11 тёжат тоннат саразонь сывель. Комплексэнь строямось, конась ашти производствань 10 корпуссто, ушодозь ютазь иень майстэ, течинь чинтень весе сынь стявтозь ды уш моли покш технологиянь оборудованиянь ладямось, сень туртов, штобу тедедень 2 кварталстонть комплексэсь кармазо важодеме весе вийсэнзэ. Мордовиянь Прявтось тешкстызе, кода пек вадря невтевкс, птицеводческой од площадкань стявтомань весе тевтне топавтовить эсест ёнксонь подрядчиктнень вийсэ. Велень хозяйствань од объектэсь максы важодемань 83 од таркат.
Елховкасо Мордовиянь Прявтось ванкшнызе ловсонь переработкань цехенть, косо ютазь иень ноябрясто нолдазь ды важоди ловсонь ды ловсонь продукциянь пештемань од линиясь (вейке часос – 3 тёжат бутулкат). Истя жо ванкшнозь строявиця инкубаторось, конань покшолмазо 4 тежат кавонзазь метрат, инкубациянь проектэнть мощностезэ – 46 млн. алт иезэнзэ. Производствань нупальтне уш стявтозь, ней ветявить отделкань важодематне, мартсто арсеви ушодомс покш технологиянь оборудованиянть путоманть.
«Октябрьская» агрофирмань производствань эштё вейке проектэсь – коромонь нолдамонь коряс од цехесь, строямонтень путозь инвестициянь покшолматне 338 млн.целковойть. Истя, кавто цехтнень производительсностесь карми улеме 650 тоннат сменазонзо.
Эряви тешкстамс, 2016 иестэ производствань пошолгавтомань коряс инвестициянь проектэнтень агрофирмань прятвнэ ютавтсть 1,2 млрд. целковойть. Владимир Волков, неезьденть кортамсто, тешкстызе: «Вийтнень кастомантень инвестициянь покш путовкстнэ кандыть ламо лезэ Васенцесь, редявикстэ кастовить производствань невтевкстнэ, конат путыть тешкс республикань весе аграрийтнень важодемантень – алонь, сывелень, саразонь, ловсонь нолдамонь коряс. Ютазь иестэ «Октябрьская» агрофирмасонть пурназь 98,8 тёжат тоннат сюро, сонзэ юткссо 50 тёжат тоннат кукуруза, саезь 103 центнерт гектарсто. Омбоцесь: од технологиятнес, производствань неень шкань линиятнес путовкстнэ лездыть ливтемс важодеманть технологиянь од уровняс. Колмоцесь, сехте прявтось: производствань од вийтне – те республикань районтнэнь эрицятнень туртов важодемань од таркат, прявт тев, конань эряви топавтомс».
Мордовия Республикань Прявтонть пресс-службась