Лямбирьсэ ютавтовсь «Сабантуй» республикань раськень-фольклоронь XIII кенярксчись. Тосо ульнесь Мордовиянь руководителесь Владимир Волков. Кенярксчинть панжомсто сон пшкадсь пурнавозетненень рузонь ды татаронь кельтнесэ: «Вечкевикс ялгат! Кадерле дуслар!» Сон тешкстызе, Сабантуйсэнть чествовавить велень хозяйствасо важодицятне, кинь виест вельде пурнави сюпав урожай. Кинь важодемаст вельде вадрясто эри республикась. Владимир Волков пшкадсь сюкпрянь вал марто весенень, кить кепедизь ды виевгавтызь Лямбирень ёнксонть, кить течи невтить покш результатт велень хозяйствань ды промышленной производствасо.
«Мон кенярдан неемс тынк Сабантуйсэ – сокань ды модань, важодеме вечкицятнень керяксчисэнть! Ёвтан тенк седейшкавань поздоровт раськень кенярксчинть кувалма!
Сабантуесь ульнесь ды карми пек эрявикс свал. Ансяк важодеманть марто сюлмавозь минек изнямотне, икелев эскелямотне!
Пек мельспаро, те кенярксчинтень састь ламо од ломанть. Весемесь, мезе минек ёнкссо тееви меельце иетнестэ – ошотнень ды велетнень вадрялгавтомась, эрямо таркатнень, китнень, культурань ды оймсемань куншкакуротнень, неень шкань предприятиятнень строямось – весемесь тееви одтнэнь туртов!
Течи минь кецнетяно татаронь раськень сюпав культурасонть, историясонть ды койтнесэ-кирдатнесэ. Весенень миненек кувать шкас кармить ледстневеме мазый мортне, киштематне, спортсментнэнь виест ды маштомачист.
Кенярдовты, кенярксчинтень пурнавсть эрьва кодамо иень, раськень ды вероисповеданиянь ломанть.
Течи Лямбирень моданть лангс састь инжеть минек республикань весе ёнкстнэстэ, истя жо Татарстанонь, Нижегородской ды Пензань областень делегациятне. Минек сюлмить ламо иень ялгаксчись ды вейсэнь лезэв важодемась Вадря коенть коряс тынк делешациятнень участяись максы кенярксчинтень башка тюст.
Миненек пек питней ламо раськень кудосонть вейкень-вейкень чарькодемась. Минь кирдтяно каштанчи сень кувалма, Мордовиясь ашти ламо раськень кеме ялгаксчинь вадря невтевксэкс. Рузтнэ, эрзятне, мокшотне, татартнэ вейсэ важодить республиканть социально-экономической виевгавтоманть коряс, вейсэ печтить кеняркстнэнь ды ризкстнэнь, вейсэ ютавтыть раськень кенярксчитнень. Самай тенень минек кармавты историясь, истя минек тонавтсть покштянок.
Зярдо мартонок историянь койтне-кирдатне, зярдо мартонок раськень кенярксчитне, минь седе кеместэ аштетяно моданть лангсо, седе вадрясто важодтяно, пштистэ вантано вандынь чинтень», – мерсь Владимир Волков. Велень хозяйствань виевгавтоманть коряс Мордовиясь сови масторонь сехте вадря регионтнэнь ютксс. Ютазь иестэ вейке ломаненть лангс нолдазь 359 кг сывель, 425 кг ловсо, 1700 алт. Лямбирень ёнксось невтсь республикадо покш результатт: нолдазь 2300 тоннат ловсо, 696 кг сывель, региононь пелест алтнэнь.
Кенярксчинтень пурнавозетненень поздоровт ёвтасть Татарстанонь инжетне. Лямбирьсэ Сабантуйсэ ульнесть Татарстанонь Кайбицкой райононь делегациясь. Татарстан Республикань Госсоветэнь депутатось тешкстызе, Россиянь кавто регионтнэнь ютксо экономикань ды культурань сюлмотне свалшкане одкстомтовить ды виевгавтовить. Братской кавто респубикатнень вейсэнь важодемань покш потенциалост, ды сынь ламос тонавтнить вейкест-вейкест пельде эрьва кодат сфератнесэ.
МР-нь Госсобраниянь депутатось, «Якташлар» Мордовиянь татаронь раськень-культурань автономиянь прявтось Рафаиль Аширов тешкстызе, арась мезеяк седе питней ламо раськетнень ютксо ялгаксчинь кеме сюлмотнеде башка. Республикасонть явови покш мель тесэ эриця раськетнень культураст, келест, коест ванстомантень ды сюпалгавтомантень. Ды республикань татартнэ свал марясть лезксэнть, конань яви тенст региононь руководствась целанек ды Владимир Волков башка.
Лямбирь ёнксонь прявтось Шамиль Давыдов эрицятнень пельде ёвтась сюкпрянь валт Мордовиянь руководителентень Владимир Волковнень мелень явоманть кисэ, конанть эрьва чистэ редить районсонть, экономикань ды социальной сферанть виевгавтоманть кисэ. Неть кенярксчитне виевгавтыть шкань сюлмотнень, раськетнень ялгаксчинть ды раськень койтнень
Творческой коллективтне невтизь кенярксчинь инжетненень эсест морамонь ды киштемань композициятнень. Сабантуень прявт участникекс кармасть производствасо икелев молицятне, конатненень максозь республикань покш казнетне.