Декабрянь 24-це чистэ Мордовиянь Прявтось В.Д.Волков вастневсь ёроков эйкакштнень марто, конат лиссть изницякс раськеютконь ды мирэнь олимпиадатнесэ. Вастовомантень сакшность Ёроков эйкакштнень туртов лицеень тонавтницятне, сынст тонавтыцяст ды тетяст-аваст.
«Пек мельспаро течи вастовомс масторлангонь олимпиадатнесэ изницятнень марто. Ёвтатано поздоровт эйкакштненень, сынст тетяст-аваст ды тонавтыцяст туртов неть покш изнявкстнэнь коряс. Тынк кисэ каштанчи кирди аволь ансяк Мордовиясь, весе масторось! Тынь пек вадрясто невтядо, маштомачитне ды эрьва чинь важодемась лездыть саемс покш изнявкст», - мерсь В.Д.Волков.
МР-нь Прявтось тешкстызе, минек регионсонть эряви кепедемс образованиянь качестванть. Республикань райононь школатнесэ тонавтомань лувось илязо явово ошонь сехте вадря школатнень эйстэ. Республикань правительствась теи тень туртов весе эрявиксэнть: кастовить тонавтыцятнень зарплатаст, мезесь лезды кепедемс те ёнкссо важодицятнень престижест.
- Эряви покш мель явомс школасо тонатвницятнень юткссо профориентациянь важодемантень, педагогической вузтнэс тонавтнеме молест превей эйкакшт, конат шкань ютазь велявтыть важодеме школав, - мерсь Владимир Дмитриевич.
Вастовомасонть тешкстазель, кото иетнень перть лицейсэнть анокстазь Весероссиянь школасо тонавтницянь олимпиадатнесэ 26 изницят ды 95 призёрт, раськеютконь олимпиадатнесэ ды турниртнэсэ саезь 28 сырнень, 43 сиянь ды 34 бронзань медальть, мирэнь олимпиадатнесэ ды турниртнэсэ 15 сырнень, 5 сиянь ды 2 бронзань медальть. Лицеень 73 тонавтницятненень максозь Россиянь Президентэнть грантт, 28 тонавтницятненень - Мордовия Республикань Прявтонть премият.
Поздоровонь валтнэнь ёвтамодост мейле МР-нь Прявтось В.Д.Волков олимпиадасо изницятненень, сынст тетяст-аваст ды тонавтыцяст туртов явшесь Благодарность ды ярмаконь казнеть. Ёроков эйкакштнень туртов республикань лицеень прявтонтень Е.А.Вдовиннэнь максозь Мордовия Республикань Почётонь Грамота.
Олимпиадатне:
Физикань коряс раськеютконь XLVII олимпиадасонть (IPhO-2016), конась 2016 иень июлень 11-17-це читнестэютавтовсь Швейцариянь Цюрих ошсонть, сырнень медаль сайсь Иван Утешев, сиянь - Максим Елисеев. Медальть сайсть Россиянь сборноень весе члентнэ, весемезэ ниле «сырнеть» ды вейке «сия».
Физикань олимпиадатнень юткссто IPhO явови кезэрень койтнесэ, виев судямосонть, истя жо пек ламо участниктнесэ.
Июлень 11-17-це читнестэ ютавтозь пелькстамотнесэ содамочист невтизь 450 тонавтницят ды школань прядыцят мирэнь 90 мастортнэстэ: Австралия, Азербайджан, Бельгия, Венгрия, Германия, Израиль, Индия, Индонезия, Испания, Казахстан, Канада, Китай, Кыргызстан, Латвия, Малайзия, Монголия, Непал, Польша, Россия, Румыния, Саудовская Аравия, Сингапур, США, Таиланд, Украина, Финляндия, Франция, Эстония, Южной Корея, Япония ды лият
Россиянь сборноентень совасть вете сехте вадря физиктне, юткссост ульнесть Ёроков эйкакштнень туртов лицеень прядыцятне Утешев Иван (Мордовия Республика, Саранск ош) ды Елисеев Максим (Мордовия Республика, Саранск ош).
Октябрянь 12-це чистэ Болгариянь Смолян-Пампорово ошсонть ютавтовсь Астрономиянь раськеютконь XXIолимпиадась (IAO-2016). Тосо сырнень медаль сайсь Дамир Гасымов, бронзань - Станислав Цапаев.
Весемезэ Россиянь сборноенть кавто сырнень, колмо сиянь ды кавто бронзань медалензэ.
Тедеде пелькстамосонть примасть участия 76 тонавтницят мирэнь 15 мастортнэстэ: Армениясто, Болгариясто, Литвасто, Румыниясто, Россиясто Индиясто, Китайстэ, Таиландсто, Италиясто, Украинасто, Швециясто, Киргизиясто, Кореясто, Чехиясто, Македониясто.
Россиянь тонавтницятне коень коряс невтезельть кавто командасо: Россиянь командась ды Московонь региононь командась. Кавто недлянь перть олимпиадасо пелькстыцятне варчасть эсест виест теориянь ды практикань задачатнень решамосо, невтизь содамочист менеленть содамонть ды астрономиянь ванкшномань коряс. Россиянь сборноентень совасть школасо 7 тонавтницят, юткссот кавто минек лицеистнэ: Дамир Гасымов Фариз оглы ( 10А класс, Нижегородской ёнкс, Нижний Новгород ош) - вишка пелькстыцятнень юткссо ды Станислав Сергеевич Цапаев (10А класс, Мордовия Республика, Саранск ош) - покш пелькстыцятнень группасонть.
Декабрянь 10-це чистэ Индонезиянь Бали усиясонть прядовсь Раськеютконь естественнонаучной XII олимпиадась. Тосо содамочист невтизь 50 ламо масторонь эйкакштне: Австрия, Нидерланды, Германия, Тайвань, Индия, Корея, Таиланд, Китай, Бразилия, Аргентина, Сербия, Венгрия, Румыния, Эстония ды лият.
Россиянь командантень совасть 6 эйкакшт, юткссот ульнесь Ёроков эйкакштнень туртов республикань лицеень тонавтницясь Алексей Шишкин.
Олимпиадань программась аштесь колсо пельксстэ: тестэнь, теориянь ды экспериментэнь, косо пелькстыцятне невтизь домка содамочист физикань, химиянь ды биологиянь коряс, истямо жо экспериментэнь ютавтомань маштомачист.
Ёроков эйкакштнень туртов республикань лицеень тонавтницясь Алексей Шишкин сайсь сырнень медаль, невтсь сехте вадря содамочить Россиянь эйкакштнень юткссо.
Теде башка, экспериментэнь турсонть командань пелькстамотнень коряс Алексей вейсэ Павел Супрун ды Ярослав Поздняков марто сайсть эштё вейке сырнень медаль Россиянть туртов.
Эряви тешкстамс, Россиянь сборноень котонест участниктне велявтсь Индонезиясто медаль марто: 2 сырнень (А.Шишкин, П.Супрун) ды 4 сиянь медальть (С.Крымский, Я. Поздняк, Е. Коренков, М. Давыдов).
Декабрянь 18-це чистэ Индиянь Бхубанешвар ошсонть прядовсь Астрономиянь ды астрофизикань коряс раськеюконь X олимпиадась. Тосо примасть участия 230 од астрономт мирэнь 42 мастортнэстэ (Китай, Канада, США, Швеция, Таиланд, Сингапур, Бразилия, Португалия, Греция, Польша, Чехия, Хорватия ды лият).
Россиянь командантень совасть школасо 10 тонавтницят ды вузонь васенце курссонь студентт. Мордовиянть пельде тов совасть Станислав Цапаев - Ёроков эйкакштнень туртов лицеень кеменце классонь тонавтницясь ды Иван Утешев - Ёроков эйкакштнень туртов лицеень прядыцясь, конась ней полады тонавтнеманзо МФТИ-сэ. Инжень командантень совась лицеень прядыцясь, неень шкане М.В.Ломоносовонь лемсэ МГУ-нь тонавтницясь Анастасия Автаева.
Недлянь перть участниктне невтсть содамочист колмо пельксстнэсэ: теориянь, ванкшномань ды практикань. «Пси» пелькстамосонть Россиянь сборноентень малав весе совицятненень удалась изнямс медальть, Иван Утешев сайсь сырнень медаль, Станислав Цапаев - бронзань. Теде башка Иван Утешев казезь башка казнесэ практикань турсонть сехте вадря результатонь невтеманть кисэ. Аволь официальной командань первенствасонть Россиянь сборноесь саизе 1 тарканть медалень зачётсонть.
Справканть туртов:
2010 иестэ Мордовия Республикань Распоряжениянть коряс (11.05.2010ие №277-Р) теезь «Ёроков эйкакштнень туртов республикань лицей» Мордовия Республикань Государственной бюджетной общеобразовательной учреждениясь (седе тов Республикань лицеесь).
Республикань лицеесь ашти прявт сюлмокс «Школа-ВУЗ-Производство» кадрань анокстамонь инновациянь структурасонть. Те лия ёнов а молиця тонавтомань учреждения, конань прявт тевекс ашти покш технологиянь сферасо сы шкань кадратнень, покш классонь специалисттнэнь анокстамось, конат маштыть важодеме «превей» экономиканть марто.
Неень шкастонть Республикань лицейсэнть тонавтнить 318 лицеист, юткссост 50 тонавтницят Россиянь лия регионтнэстэ (Москов ош, Амуронь, Воронежень, Ивановань Иркутскоень, Московонь, Нижегородскоень, Пензань, Самарань, Саратовань, Сахалинэнь, Ульяновскоень, Челябинскоень областне; Пермень, Красноярскоень, Приморскоень, Хабаровскоень ёнксстнэ; Башкортостан, Дагестан, Коми, Крым, Северная Осетия (Алания), Хакасия, Чувашия Республикатне).
Анокстамось моли тонавтомань колмо профильтнень коряс: физикань (анокстамонь ёнксстнэ - физика ды астрономия), химиянь-биологиянь (анокстамонь ёнксстнэ - химия, биология ды экология) ды математикань (анокстамонь ёнксстнэ - математика ды информатика).
Неть ёнксстнэс явоманть вельде лицейсэнть тонавтомась ашти башка-башкас явозь, лезэвекс ды нежеди предметнэнь коряс домка содамочитнень максоманть лангс. Лицеистнэ тонатвнить аволь ансяк общеобразовательной стандартнэнь лувсо, истя жо эрьва чистэ яксить профилень предметнэнь коряс башка занятияс, конатнень коряс максовить домка содамочить (практикань ды лабораториянь занятият).
Республикань лицейсэнть домка содамочитнень максыть республикань сехте вадря тонавтыцятне, сынст юткссо 29 кандидатт ды наукань 3 докторт. Лицеесь кирди кеме сюлмот Россиянь икелев молиця вузтнэнь марто.
2015 иестэ панжозь тонавтнемань од корпусось, тосо ули неень шкань оборудования, лабораторият ды спортонь блок. Лия ошонь эйкакштне эрить школань интернатсонть.
Тонавтнемань 2015 - 2016 иень невтевкстнэнь коряс Республикань лицеесь саи:
- 2 тарка "Топ-25" Россиянь сехте вадря школатнень юткссо. Рейтингенть анокстызь «Россия сегодня» МИА-нь «Социальной навигаторонть» кулянь лезксэнзэ вельде матемактикань свалшкань образованиянь Московонь куншкакурось ды «Учительской газетась» РФ-нь Образованиянь ды наукань Министерстванть лезксэнзэ вельде;
- сови «ТОП-500» Россиянь сехте вадря тонатвнемань организациятнень ютксс;
- сови «ТОП-200» тонавтнень организациятнень ютксс, косо покш мель явить тонатвницятнень маштомачист кастомантень;
-1тарка «ТОП-10 физикань-математикань профилень общеобразовательной организациятнень юткссо»;
-1тарка «ТОП-10 индустриянь-технологиянь профилень общеобразовательной организациятнень юткссо»;
-2 тарка «ТОП-10 физикань-математикань профилень общеобразовательной организациятнень юткссо»;
-2 тарка «ТОП-10 географиянь профилень общеобразовательной организациятнень юткссо»;
-2 тарка «ТОП-10 химиянь-биологиянь профилень общеобразовательной организациятнень юткссо»;
-сови «ТОП-100 математикань профилень общеобразовательной организациятнень ютксс»;
-сови «ТОП-100 оборонно-спортонь профилень общеобразовательной организациятнень ютксс».
Истя, Республикань лицеесь совась Россиянь сехте вадря колмо школатнень ютксс, косо максовить пек вадря содамочить профилень 6 ёнксстнэнь коряс.
Тонавтнемань 2012-2013 иестэнть - 6 тарка "Топ-25" Россиянь сехте вадря школатнень юткссо;
Тонавтнемань 2013-2014 иестэнть - 9 тарка "Топ-25" Россиянь сехте вадря 25 школатнень юткссо;
Тонавтнемань 2014-2015 иестэнть - 2 тарка "Топ-25" Россиянь сехте вадря школатнень юткссо.