Мордовиянь Прявтонь тевтнень нурька шкас топавтыцясь Владимир Волков недлясто, августонь 13-це чистэ, ульнесь Дубенкань ды Отяжелень районтнэсэ. Васенце объектэкс, конань ванызе республикань лидерэсь, кармась Дубенкань районсо Орданьбуе велесэ строявиця 6400 скалс ловсонь комплексэсь. Россиясо инвестициянь покштояк покш проектэнть топавтомась ушодовсь 2016 иестэ, сонзэ питнезэ 5,5 млрд целковойть.
Комплексэнть панжомадонзо мейле тесэ кармить роботамо 136 ломанть, средней зарплатась ули 24,5 тёжат целковойть. Сонзэ тевс нолдамодонзо мейле Дубёнкань райононь бюджетэнть кармить пачтямо1,6 миллионт целковойть.
«Сфера» ООО-нь генеральной директорось Сергей Сиушов домкасто ёвтнесь Владимир Волковнень строявиця комплексстэнть, тешкстызе, неень шкантень ветязь инженерэнь весе инфраструктурась, тов пачкодемань китне. Строямонь те шкантень аволь бюджетэнь источниктнень вельде тевс нолдазь 80 млн целковойть.
Од комплекссэнть 2019 иес ловсонть арсеви ламолгавтомс 27771 тоннас, 2023 иес – 57993 тоннас, вейке скалонть пельде бажить саемс малав 9 тёжат кг.
«Те объектэсь карми Россиянь ловсонь комплекстнэнь ютксо сехте покштнестэ вейкекс. Эрьва чистэ переработкас карми пачтявомо ловсонь 200 ламо тоннат, – мерсь В.Д.Волков. – Минек прявт тевенек – кепедемс ловсонь отраслянть республиканть келес, вейке скалонть пельде потявтомс 9 тёжат кг аволь седе аламо».
Седе тов ванозель Дубёнка ёнксонь Орданьбуе велень социальной куншкакуронь строямонь площадкась. «Устойчивое развитие сельских территорий» программанть лувсо 2017 иестэ саезь велесэнть топавтови эрямо таркань застройкатнень вадрялгавтомась. Проектэнть вельде социальной куншкакуродонть башка арсеви стявтомс эйкакшонь налксемань спортонь площадка, ламо функциянь спортонь площадка, мемориалонь комплекс, од семиятнень туртов эрямо кудот, Од ульцяванть инженерэнь инфраструктура, средней общеобразовательной школань зданиянть витнемась.
Проектэнь сметань питнесь 151,9 млн целковойть, истя жо социальной куншкакуронь строямось – 80,4 млн целковойть, конань стявтомась ушодозь тедедень майстэ, панжомс арсеви 2017 иень ноябрясто.
Тесэ карми улеме досугонь ды шкинемань кудо, ков совить киштемань ды морамонь класстнэ, музей, библиотека, велень администрациясь ды ФАП-сь. Важодицятнеде кармить улеме 15 ломанть.
Од семиятнень туртов эрямо кудотнень стявтомс явозь модань 40 участкат.
Владимир Волков кармавтсь поселениянь администрациянтень теемс эрямонь пунктонть мельстуицякс од ломантнень туртов, теемс весе условиятнень школасо тонатвницятнень ламолгавтомга.
Дубёнкань ёнкссо улемстэ республикань руководителесь ванызе Саранск – Ульяновск автомашинань кинть витнеманть. Сон пек эрявикс. Тесэ молить реконструкциянь роботатне. Владимир Волков тешкстызе трассань строямонь темпатнень виевгавтомань эрявиксчинть.
«Монь лемс аволь весть сакшность сёрмат райононь эрицятнень пельде трассань реконструкциянть эрявиксчидензэ. Теде башка, футболонь коряс масторлангонь чемпионатонть ютавтомань читнестэ минь арсетяно нолдамс тевс Ульяновской областень гостиницань объекттнэнь. Региононь руководстванть марто кортамотне уш ветязь», – тешкстызе Мордовиянь лидерэсь.
В.Д.Волков толковизе, Дубёнкань ёнксонь экономикань виевгавтомантень явозельть 120 млн целковойде ламо. Неть ярмактнень лангс стявтовсть ФАПт, социальной куншкакурот, спортонь ды эйкакшонь площадкат, школат, кить ды ламо мезе лия. Маласо шкастонть арсеви строямс ды витнемс ведень сетенть, ветямс газ од микрорайонтнэс.
«Минек прявт тевенек – вадрялгавтомс ломантнень эрямост ды кастомс алкуксонь доходтнэнь, теемс вадря условият важодеманть ды оймсеманть туртов, од ломантнень улест возможностест рамамс эли строямс эсест эрямо тарка», – толковизе Мордовиянь руководителесь.
Дубенкань ды Отяжелень районтнэнь границясонть Владимир Волков примась участия 1000 скалс ловсонь од комплексэнть строямс капсуланть путомасо. Сонзэ стявты «Агро-Атяшево» ЗАО-сь.
Отяжелесэ Мордовиянь лидерэсь кортась эрицятнень мартояк, конат пшкадсть Владимир Волковнень талновтыця кевкстематнень марто, истя жо ёвтасть сюкпрянь валт строязь эрямо таркатнень, китнень, социальной ды спортонь инфраструктурань объектнэнь кисэ, велень эрицятнень талномаст марямонть кисэ.
«Отяжелень ёнксось сови Мордовиянь икеле молиця районтнэнь юткс. Экономикантень путовить покш ярмакт республикань ды федеральной бюджетнэстэ, тевс нолдавить финансированиянь аволь бюджетэнь источниктне», – тешкстызе Владимир Волков.
Региононь лидерэсь тешкстызе, районсонть поладови китнень ды эрямо таркатнень строямось, витнезь коммунальной сеттне, витеви ТБО-нь усксемань, аволь санкционированной шукшпрятнень ванськавтомань кевкстематне. «Республикань руководствась бажи теемс вадря условият ломантнень эрямост туртов. Минь поладсынек образованиянь системанть виевгавтмоанть, медицинань услугатнень качестваст кастоманть», – толковизе сон.
МР-нь Прявтонь тевтнень нурька шкас топавтыцясь ёвтнесь, Отяжелень больницясонть панжови диализэнь центра, конасонть те ды шабра райононь эрицятненень максови покш технологиянь лезкс, а сави ардомс Саранскоев. Истя жо Владимир Волков тешкстызе, 2017 иестэ ушодови лецямонь корпусонть капитальной витнемась.