Пецясто, апрелень 13-це чистэ, Мордовиянь Прявтось Владимир Волков ульнесь Мордовия Республикань Светотехникень чинтень алтазь кенярксчинь промкссонть.
МР-нь Государственной рузонь драмань театрань залонтень пурнавсть республикань светотехникань комплексэнь важодемань весе коллективтнень представительтне, премиянь лауреаттнэ, Россиянь Федерациянь ды Мордовия Республикань Заслуженной важодицятне, производствасо икеле молицятне ды од лувонь совавтыцятне, ды отраслянь ветерантнэ.
«Течи башка кенярксчи, конась тешкстави ансяк минек республикасо. Ламо кементь иетнень перть светотехниканть марто сюлмавозь Мордовиянь кементь тёжат эрицятнень уцяскаст, – тешкстызе В.Д.Волков. – Светотехникась – те промышленной се потенциалось, конань кисэ республикась свал кирдсь каштанчи».
Россиянь Президентэсь Владимир Путин РФ-нь Федеральной Собраниянтень Кучомасонть путсь покштояк покш тев – Россиянь виев касомась-кемекстамось. Владимир Волков тешкстызе, самай республикань светотехникань отраслясь васенцетнестэ вейкекс топавтоволинзе путозь тевтнень, тевель технологиянь ды инновациянь виев эскелькс.
«Тень туртов минек ули весемесь. Мордовиясь масторонь келес васенце промышленной производствань вейсэнь покшолмасонть инновациянь продукциянь пельксэнть коряс, конась саи малав 30 процентт, светотехниктнень те невтевксэсь саи 60 проценттэ ламо, – тешкстызе В.Д.Волков. – Течи минек предприятиятне нолдыть неень шкань ламо продукция. Те валдонь энергоэффективной источникть ды сынст юрсо валдомтомань приборт, электронной компонентной база ды валдомтомань управлениянь система. Истя жо республикасо теезь кадратнень анокстамонь вадря юр, Ёроков эйкакштнень туртов республикань лицейстэнть саезь масторонь келес вейкине Электроникань ды светотехникань институтонть видьс.
Мордовиянь Прявтонть валонзо коряс, масторлангонь рынкасонть молиця тевтне лездыть сенень, светотехникань ды оптоэлектроникань кластерэсь лезэвстэ виевгадоволь минек регионсо. «Технологиянь ёроков виевгавтомась панжи од возможность светотехникань отраслянь седе тов кастоманть туртов. Электроэнергиянть лангс касыця питнетне, экологиянь стакачись ды климатонь полавтомась – весе неть ёнкстнэ кармавтыть масторлангонь обществанть ёроковтсо совавтомс эрямос энергиянь ванстыця валдомтоманть», – мерсь сон.
Респубиканть туртов прявтокс ашти предприятиянь конкурентноспособностенть кастоманть коряс, региононь ды раськеютконь рынкатнень саеманть коряс важодемась.
«Те тевенть топавтомга республикасонть теезь «Светотехника и оптоэлектронное приборостроение» инновациянь кластерэсь. Течи сон вейсэнди пель сядо компаният, конатнень производствань покшолмаст 31 млрд целковойде ламо, 1 важодицянть лангс выработкась 2,8 млн целковойть. Башка тешкстаса, 2012 иенть коряс, зярдо минь теинек светотехникань кластерэнть, те невтевксэсь кассь котодо ламоксть!" – тешкстызе Владимир Волков.
Мордовиянь Прявтось кармавтсь кластерэнь участниктненень сехте аламо нилеце пельксэс саемс отечественной светотехникань рынканть, истя жо кастомс продукциянь экспортонть, саемс миемань од рынкат.
«Ютазь иестэ кластерэнть ансяк покш ды средней преприятиятнень экспортс пачтямонь покшолматне кассть 86 проценттс ды кармасть 52 млн США-нь долларт. Целанек миемань покшолматне ладязь питнетнень коряс кассть малав 24 проценттс ютазь иенть коряс, – тешкстызе В.Д.Волков. – Вадрят невтевксэнзэ те ёнкссонть кластерэнь прявт предприятиятнестэ вейкенть – «Лисмань». Заводонь продуктонь линейкась совавты 300 ламо лемть. Ютазь иестэ омбо мастортнэс пачтязь продукция 4,6 млн США-нь долларонь питнесэ, пачтямонь географиясь келейгадсь 14 масторс».
Тешкстасынек, ютазь иестэ «Лисмасо» анокстазь зярыя од продукт, конатнень вадря перспективаст рынкасо. Истя, теевтезь сертификатт Т8 светодиодонь линейной лампатнень ды офисэнь светильниктнень лангс, конат эрявить люминисцентной лампатнес ограничениятнень пингстэ. Анокстазь ды уш нолдави «Мегаполис» лия ёнов а молиця металлогалогенэнь лампась, конась вейсэнди натриень лампатнень покш энергоэффективностенть ды вишка питненть, истя жо валдонь характеристикатнень. Истя жо нолдазь ушонь светодиодонь светильниктнень ды прожектортнэнь производствась.
Анокстазь-арсезь бактерицидной лампат од поколениянь светодиодонь чиптнень лангсо. Сынст вельде киртяви эрексия марто валдонь источниктнень тевс нолдамось больницятнесэ, ведень ванськавтомань систематнесэ ды лия объекттнэсэ. «Лисмась» ёроковсто келейгавты стеклополуфабрикатонь номенклатуранть. Суликань пидемань каштомонть одкстомтомадонзо мейле те продукциянть мереви кучомс экспортс. Ней кортавить Китаев суликань васенце пачтямонь лувтне.
Предприятиясь истя жо анокстась-арсесь чипаень батарея марто светильникть. Те продукциясь анокстазь африкань рынканть туртов ды карми нолдавомо, васняяк, «TLLINNO» дочерней предприятиясонть. Светотехникань вейсэнь те предпритиясь панжовсь мартонь 29-це чистэ Бурундинь прявтошсо.
«Арсян, тынь чарькодтядо, те ансяк васенце эскелькс. Миненек а эряви улемс васенцетнень ютксо ансяк Россиясо ды СНГ-сэ, эли шкань ютазь минек а сатыть виенек кирдемс конкуренция транснациональной компаниятнень марто. Прявт тевенек – кемекставомс африкань рынкасонть, ладямс экспортонть «Восточной Африкань мастортнэс, – мерсь Мордовиянь Прявтось. – «Лисма» марто вейсэнь важодемантень уш явсть мель Нигериянь представительтне. Майстэ тов кучови «Лисмань» продукциянь васенце партиясь. Кортави Бурундинь кондя Нигериясо лампань вейсэнь нолдамось. Сехте эрявиксэкс африкань рынкасонть кармить светодиодонь филаментэнь ды линиянь газозарядонь лампатне, чипаень панель марто светильникте. Секскак минь кемтяно, африкань континентсэ минек покш перспективанок!
Течи миненек весенень эряви путомс покш вийть, республикань светотехникань предприятиятнень ламолгавтомга, конатне маштыть важодеме масторлангонь рынкасонть. Те ёнов эскельдямо ули».
«Орданьбуень светотехникань заводсонть» нолдавить светильникень кавто тёжадо ламо модификацият. Ютазь иестэ предприятиянть технической одкстомтоманть лувсо нолдазь литейной эсест производства ды валдомтомань прибортнэнь нолдамост туртов светодиодонь плататнень ды модультнень нолдамось. Вейке важодицянть лангс выработкась кассь колмоце пельксэс.
«Кадошкинань электротехнической заводось» ловови газоразрядонь лампа марто светильникень икеле молиця нолдыцякс. Васенце кварталонь невтевкстнэнь коряс продукциянь миемань покшолматне тесэ кассть 40 ламо проценттс.
Иень перть колмоце пельксэс кассь инновациянь продукциянь покшолмась «Рефлакс – С» предприятиясонть. Течи те 90 ламо процентт! Мелят компаниясь ушодызе газоразрядонь лампатнень туртов светильниктнень нолдамонть, продукциянть миеманть покшолгавтызе колмоксть.
Келейгавтови чипаень электростанциянь комонентнэнь нолдамось. «Хелиос-Ресурс» предприятиясонть производствань касомась кармась 54 проценттэ ламо, иезэнзэ экспортось кассь 76 проценттэнь видьс. Заводсонть нолдавиця весе продукциясь – инновациянь.
«Кенярдовты, Мордовиясо появить светотехниканть ёнкссо наукань од муевкст-панжовкст. Истя, Лодыгинэнь лемсэ НИИС-нть Технопарконь Энергиянь ванстомань светотехникань центранть марто вейсэ анокстазь-арсезь «Sunlight» сериянь комбинированной валдонь светильник. Сонзэ лиятнень ёнов а молемась сюлмавозь чипаень а сатыця валдонть топавтомасонть, конань вельде тееви D витаминэсь, сон пек эрявикс ломантнень шумбрачист туртов. Те Россиясо истямо ёнксонь васенце светильник! Теде башка, те иестэнть арсеви анокстамс-арсемс энергиянь ванстыцят ды экологиянть туртов безопаснойть оптической излучениянь источникть, приборт ды компонент, – ёвтнесь Владимир Волков. – Весе те корты седе, минек светотехниктнень ули наукань ды производствань покш потенциалост. Ансяк эряви маштозь нолдамс тевс неть ресурстнэнь, витемс аволь ансяк неень шкань кевкстематнень, истя жо важодемс икельдязь, неемс касомань од точкат. Масторлангонь рынкасонть прявт трендтнень ютксо – валдомтомань управлениянь комплексэнь систематнень, «Превей валдо» технологиятнень, фитоосвещениянть ды агротониканть, OLED-технологиятнень, конат эрявить мобильной устройствань рынкасонть, тевс нолдамось».
МР-нь Прявтонть валонзо коряс, «Phillips» компаниясь ковдо икеле Парижсэ ушодызь «LiFi» технологиятнень эли кода сынст эштё лемдить светодиод лангсо пек бойка Интернетэнть варчамонть. Эксперттнэ ёвтыть покш вандынь чи валдонть марто даннойтнень пачтямонь технологиятненень.
«Вейке валсо, ломантне пек эрязасто эскельдить вандынь чинтень, косо эрямонь весе систематне улить сюлмазь эсь ютковаст. Ды миненек а эряви кадовомс неть процесстнэнь эйстэ, – явсь мель В.Д.Волков. – Перспективанть улемга – эряви эрязасто эскельдямс инновациянь виевгавтоманть ёнов, совавтомс производствас наукань муевкст-панжовкст. Эряви апак пеле тердемс од ломанть, пандомс тенст вадря зарплата, лездамс эрямо таркань кевкстематнесэ. Тень туртов республикасонть течи ули весемесь».
Сюкпрянь башка валт те чистэнть ёвтавсть светотехникань комплексэнь ветерантнэнень. МР-нь Прявтось явшесь тенст казнеть ды цецят.
Светотехникань отраслянь представительтненень поздоровт истя жо ёвтасть МР-нь Правительствань Председателень полавтыцясь – МР-нь промышленностень, наукань ды од технологиятнень министрась Александр Седов, МР-нь Профсоюзтнэнь федерациянь председателесь Мария Голиченко.
Те чистэнть сехте вадря светотехниктненень явшевсть покш наградат, залонтень весе пурнавозетнень туртов вадря казнекс кармась кенярксчинь концертэсь.