Аштемковонь 19-це чистэ Республикань Кудосо ютавтвось кенярксчинь промкс, конась алтазель Медицинань важодицянтень чинтень. Тедеде сон ютавтовсь коронавирусонь од инфекциянть марто сюлмавозь весе органичениятнень топавтозь. Весе тердезетне ды инжетне ютасть тест Ковид-19 коряс.
Видеосвязенть вельде кенярксчинь вастовомантень вейсэндявсть ниле больницят, 50 ламо медицинань учреждениянь важодицятне кунсолость поздоровтнень онлайн лувсо.
Мордовиянь Прявтось, поздоровонь ёвтамсто, тешкстызе, тедеде те кенякрсчинть седеяк покш смустезэ.
«Монь туртов покш кенряксчи вастовомс мартонк – минек шкань алкуксонь геройть, - мерсь Владимир Волков. – Ютасть 12 недлят, кода республикасонть тешкстазельть коронавируссо васенце кавто сэредицятне. Неть колмо ковтнень перть врачтненень савсь топавтомс пек покш важодема».
Эпидемиянть ушодовомантень Мордовиясо ульнесь ансяк вейке инфекционной больниця. Ней ковидэнь госпиталекс ютавтозь лецямонь 17 учрежденият. Теезь малав 2 тёжат инфекционной таркат. Пурназь домка содамочить инфекциянь лецямонть коряс, улить эрявикс весе лекарстватне.
«Ней минек здравоохранениянь маштомачитне-виевчитне лездыть бороцямс эрьва эрямонть кисэ, сехте стака сэредицятнень кисэ, - тешкстызе Владимир Волков. – Секскак, апак вано весе стакачитнень лангс, минек здравоохранениянь системась цидярдынзе те варчамонть. Цидярдынзе минек врачтнень, медсестратнень, медицинань лезксэнь куроксто явомань службань важодицятнень, больницянь, лабораториянь, поликлиникань, ФАП-нь весе сотрудниктнень, аволь штатной специалисттнэнь профессионализмаст ды кочказь тевентень весе виест максоманть вельде. Покш сюкпря тенк! Минь сеске чарькодинек: бути а лездатанок, а ванстасынек медицинань важодицятнень, сестэ ёмавтсынек весементь. Ды аволь стяко Россиянь Преидентэсь В.В. Путин кемекстась пандомс башка ярмакт медицинань важодицятненень».
Федеральной ды республикань стимулирующей пандоматне уш явозь 47—медработниктненень, тень лангс ютавтозь пель миллиард целковойть. Рамсезь индивидуальной ванстомань средстват: ванстомань костюмт, респираторт, маскат, перчаткат, очкат.
«Эряви видестэ ладямс медучреждениятнесэ важодеманть. Секскак мон пшкадян прявт врачтнэнень: ванстодо эсь сотрудниктнень, уледе мартост вейсэ, лездадо витемс весе стакачист, - мерсь республикань Прявтось. – Течинь чинтень минек кавто сядодо ламо медицинань важодицятне сэредить коронавирусонь инфекциясо. Покш ризксэс, 6 специалисттнэ, лиятне идемстэ, «палсть» сынсь. Те покш ёмавкс весень минек туртов. Минек тевенек - ванстомс сынст лемест ды тевест, лездамс семияст туртов. Ды аволь ансяк ней, седе товгак. Сюконян медицинань весе важодицятнень икеле».
«Врачтнэнь-реаниматологтнень виест вельде топавтозь алкуксонь дивань тевть, зярдо, марявсь, мезеяк уш а лезды, - тешкстызе Владимир Волков. – Истя, невтемакс, Катковонь лемсэ больницясонть сэредицясь цела ков ульнесь ИВЛ-нь аппаратсонть (токшезельть пеледест ламо тевелявонзо). Стационарсо 42 чинь перть лецямодо мейле сон пичкась ды нолдазь кудов!»
Пандемяинть шкасто коронавируссо сэредицятненень теезь 48 экстренной операцият, сынст ютксо эйкакшткак.
«Ёвтан сюкпря алкуксонь, профессиональнйо важодеманть кисэ Республикань клинической больницянь, Катковонь лемсэ больницянь ды Республикань эйкакшонь больницянь врачтненень-хирургтненень, - мерсь Мордовиянь Прявтось. – Башка тевть путозь Рузаевкань больницянь специалисттнэнь лангс. Тосо чачтыть коронавируссо сэредиця аватне. Кеняркс марто ёвтаса, те шканть перть тосо чачсть 6 эйкакшт (2 цёрынькат ды 4 тейтерькат). Сюкпря Пазонтень, весе эйдетне шумбрат. Аватнеяк вадрясто марить пряст ды ёвтыть сюкпря лецицятненень».
Сюкпрянь башка валт Владимир Волков ёвтась васенце звенань ды медицинань лезксэнь куроксто явомань службань важодицятненень, участковой врачтнэнень, фельдшертнэнень, медсестратненень, машинань ветницятненень. Сынст важодемаст кассь зярыяксть.
«Нама, республикань медицинань организациятненень эряви улемс анококс коронавирусонь омбоце «коволонтень». Ансяк ней минь вантанок эпидситуциянть мельга покш учома марто, - мерсь республикань Прявтось. – Эряви эскельксэнь эскелькс вельмевтемс аравтлувонть коряс медицинань лезксэнь явомань покшолматнень, велявтомс «Здравоохранение» нацпроектэнь тевтненень, одкстомтомс инфраструктутарнть. Тедеде минь панжинек эйкакшонь од поликлиника Химмашсо, «Юбилейный» микрорайонсонть поликлиника. Панжиковсто эрязасто кундынек Республикань эйкакшонь больницянь хирургиянь од корупсонь строямонтень. Оснащениянть коряс сон карми ладямо Московсо Морозовской эйкакшонь больницятнень. Сы иестэ панжови онкодиспансерэнь од поликлиникась. Те объектэсь пек учовиця. Истя жо арсеви витнемс онкологиянь диспансерэнь зданиянть. Теде башка, строяви эйкакшонь поликлиника Рузаевкасо, покштнень туртов поликлиника Саранскойсэ, стационар ды поликлиника Краснослободскойсэ ды зярыя лия объектт. Тешкстаса, нацпроектэнть вельде тедеде республикав пачтязь медицинань од техника.
Здравоохранениянь материально-технической юронь кемекстамось поладови. Аштемковонть прядовомс КТ-нь кавто од аппарат путовить Катковонь лемсэ больницянтень ды Рузаевкань больницяс. Эштё вейке од КТ путозь Республикань инфекционной больницянтень. Истя жо учовить ЭКМО-нь аппарат, 21 ИВЛ. Велетнеесэ важодеманть туртов рамазь мобильной 9 маммографт ды таркасто таркас шатневиця стоматологиянь зярыя кабинетт.
Кенярксчинь промксонтень пурнавозетненень видеоконференциянть вельде сюлмавсть Республикань инфекционной больницясь, Рузаевкань больницясь, С.В.Катковонь лемсэ республикань больницясь, Теорбеевань больницясь.
Мордовиянь Прявтось ёвтась поздоронь лембе валт медицинань весе важодицятненень алкуксонь тевдееманть кисэ.
«Покш сюкпря тенк! – мерсь Владимир Волков. – Содадо: тынь аволь ськамонк, мартонк весе Мордовиясь! Ды минь карматанок тееме весементь тыненк лездамга».
Медицинань важодицятненень поздоровт истя жо ёвтась республикань здравоохранениянь министрась Олег Маркин.
Кенярксчинь промксонть лувсо медицинань ламот важодицятненень максозь покш казнеть. Профессионализманть, кочказь твевентень видечинть ды коронависрусонь од инфекциянть каршо бороцямонть шкасто весе вийтнень путоманть кисэ.
Мордовия Республикань Прявтонть пресс-службась