Маень 4-це чистэ Мордовия Республикань Прявтонь тевень нурька шкас топавтыцясь Владимир Волков Кремлясо ульнесь Россиянь социально-экономической касомань-кепетемань невтевкстнэнь топавтомань мониторингень коряс Президентэнь юрсо Комиссиянь ды Государственной советэнь вейсэнь промкссонть. Ветясь сонзэ РФ-нь Президентэсь Владимир Путин. Вастовоманть лувсо ванновсть колмо кевкстемат: ташто кудосо эрицятненень од эрямо таркатнень максомась, МФЦ-нть вельде государственной ды муниципальной услугатнень максомась ды социальной сферасо услугатнень вадрячинть ванномась.
Ташто кудотнень таркас одтнэнь теемань кевкстеманть государствань прявтось ёвтызе пек эрявиксэкс миллионт ломантнень туртов. Президентэсь тешкстызе, течинь стакачитнень лангс апак вано Россиянь ламот регионтнэ те кевкстеманть топавтыть.
Мордовиясь те программанть топавтоманзо коряс лия субъекттнэнь ютксо саи 23-це тарканть Россиясо ды 6-це тарканть Равчирень федеральной округсо. Программанть тевс нолдамонь шканть перть 94 тёжат кавонзазь метрат покшолмасо ташто кудосо 5700 ломантненень максозь од эрямо таркат, те малав 80 % весе аварийной фондонть эйстэ, конась совавтозь Программантень. 2017 иентень В.Д.Волков макссь кармавтома сентябрянь 1-це чис яжамс эштё 23,2 тёжат кавонзазь метрат каладозь кудот ды явомс од квартират эштё 1600 ломаннень.
МФЦ-нть вельде государственной ды муниципальной услугатнень максомань коряс кевстеманть ванномсто Владимир Путин мерсь теемс эрявикс условиятнень, весе ломантненень госуслугатнень максовольть МФЦ-сэ, косо бу сон аволь эря. Целанек масторсонть роботыть колмо тёжат МФЦ-т, теке марто Президентэсь мерсь а лоткамс тень лангс ды роботамс седе тов.
Мордовиясо роботыть 23 МФЦ-ть (221 вальма), теке башка
дополнительной офист улить 67 муниципальной образованиясо (74 вальмат). Владимир Волков Государственной Собраниянтень Кучомасонть тешкстызе электронной видсэ услугатнень ламолгавтомс 60%, 2018 иентень жо Россиянь Президентэнь маень Указтнэнь топавтомга – 70 %.
Мордовия Республикань Прявтонть пресс-службась