Мордовиянь Прявтось Владимир Волков 2018 иень ацамковонь 7-це чистэ ульнесь кенярксчинь вастовомасонть, конась алтазель Россиянь Федерациянь Конституциянтень 25 иетнень топодемантень ды ютавтовсь Республикань Кудонь Покш залсонть.
Кенярксчинтень пурнавозетненень поздоровонь ёвтамсто МР-нь Прявтось тешкстызе, Россиянь Федерациянь Конституциянть примамось – те покш тев, конась панжизе масторонь эрямосо од лопанть. «Комсьветее иетнеде икеле Россиянь эрицятне теизь прявт кочкамост – государствань вейкетьксчинть, закононть ды видечинть, икелев молеманть ды олясто касомань-кепетемань лезэс кочкамонть, – мерсь сон. – Конституциянь чачомась мольсь масторонь туртов стака шкасто. СССР-нь каладомась ветясь мельганзо домка кризис, ачарькодема ды нужасо эрямо».
Владимир Волков тешкстызе, 1990-це иетнень ушодовомсто Мордовиясь ламот невтевкстнэнь коряс сайсь меельце таркат Россиянь Федерациясо. Ансяк 1994 иестэнть региононь валовой продуктось киртявсь 40%. Промышленной ламот предприятиятне стясть. Ломантненень зярыя ковонь перть эзть пандово зарплатат ды пенсият.
«Ломантнень эрямонь уровнясь пачкодекшнэсь критической тешксэнтень. Зыянонь кандыця политической бороцямось чаракавтызе властенть весе уровнятнесэ, саевтизе мелензэ социально-политической прявт стакачитнень витемаст эйстэ, лездась преступностенть ламолгадомантень. Обществасонть ульнесь пелемань ёжо, ломантне эзть сода, мезе теемс. Арсян, малав весе, кие течи те залсонть, тандадома марто ледстнить неть республиканть ды весе масторонть туртов «чопода» шкатнень, – мерсь В.Д.Волков. – Сонсь эрямось вешсь курок шкань ды алкуксонь полавтомат. Эрявсь вельмевтемс властентень кемеманть, одкстомтомс ломантнень вадря эрямонь учомаст».
Мордовиянь Прявтось тешкстызе, Россиянь од Конституциянть примамось ветясь мельганзо регионтнэнь законодательной систематнень одкстомтоманть. Малав сеске ушодовсь Мордовиянь Конституциянть лангсо важодемась, конась кемекстазь 1995 иень таштамковонь 21-це чистэ. Сонзэ юрс путозь минек масторонь прявт закононтень ладямось, прявт тевтнень вейкетьксчинтень лувось.
«Васняяк, Мордовиясо теезь властень виев ды лезэнь кандыця вертикаль, ладязь федеральной центранть марто лезэнь кандыця важодемань сюлмот, теезь ёроков ды виде кортамо обществанть марто, – тешкстызе Владимир Волков. – Правань ванстомань органтнэнь марто вейсэ удалась изнямс организованной преступностенть, кастомс сэтьмечинть целанек. Ансяк, нама, неть кевкстематнень коряс ванноманть а эряви лавшомгавтомс течияк. А эряви нолдамс 90-це иетнень велявтоманть, зярдо кевкстематнень бажасть витемс вийсэ, ломантне жо пельсть лисемс ушов».
Покш вийть эрявсть, предприятиятнень идемс, максомс ломантненень важодемань таркат ды свалшкань зарплата, одкстомтомс промышленностенть ды велень хозяйстванть, путомс эйзэст од эрямо.
«Тень вельде удалась лоткавтомс каладомань тевтнень, лисемс экономикасо свалшкань касомантень, теемс покш эскелькст социальной сферасонть. Невтемакс, течи социальной политиканть лангс бюджетэнь ютавкстнэнь пельксэсь саи 60% ламо, малав кавксть седе ламо 1993 иень невтевкстнэнь коряс, – толковизе МР-нь Прявтось. – Весе те лездась теемс республикасонть вейкень-вейкень чарькодемань ёжо. Мордовиясь невти прянзо, кода политической кеме лув марто ды инвестициянь коряс пек вадря регион. Минек обществанть вейкетьксчись пек вадрясто невтеви весе уровнянь кочкамотнесэ вайгелень максомань итогтнесэ».
В.Д.Волков ледстизе, меельце иетнестэ минек регионсо ютасть весероссиянь ды раськеютконь смустень ламо мероприятият. Мордовиянь историясо од лопакс кармась футболонь коряс масторлангонь чемпионатось. Сонензэ анокстамось макссь эскелькс республикань эрямонь весе ёнкстнэнь виевгавтомантень.
«Минек весе арсематнень-бажамотнень топавтомань прявт лувокс кармась масторонь руководствань лезксэсь. Сюкпрянь башка валт ёвтан Россиянь Федерациянь Президентэнтень Владимир Владимирович Путиннэнь! Тенек явови минек весе бажмотнесэ алкуксонь лезксэсь, миненек пек питней Президентэнть пельде республикантень истямо мелень явомась, – мерсь Владимир Волков. – Минь макстано покш питне Россиянь Президентэнь Администрациянть ды Правительстванть, Равчирень федеральной округсо Президентэнь Полномочной Представителенть, Федерациянь Советэнь ды Государственной Думанть марто лезэнь кандыця важодемантень».
Мордовиянь Прявтось тешкстызе, стакачитнень печтямосо, республиканть виевгавтомасо покш таликазо государственной ды хозяйственной прявттнэнь, весе уровнянь депутаттнэнь, прявтонь корпусонть тевтнень ответственной топавтомась. Весе неть иетнень перть властень нежедьксэкс ульнесть ды кадовить республикань оштнень, районтнэнь ды велетнень прявттнэ, кить весемеде малавикст ломантненень.
«Минь свал марясынек здравоохранениянь, образованиянь, социальной ванстомань, культурань ды спортонь учреждениятнень прявттнэнь, политической партиятнень, профсоюзтнэнь ды общественной организациятнень представительтнень пельде чарькодеманть ды лезксэнть, – тешкстызе В.Д.Волков. – Минек ванновтонть куншкасо од ломантне. Ты течи Конституцяинь кирдажтнэ – минек кадрань прявт ресурст, Мордовиянть седе тов виевгавтомасо прявт учома ды нежедькс».
Региононть виевгавтомадо кортамсто, Мордовиянь Прявтось явсь мель сень лангс, комсьветее иетнень историянть перть Россиянь Федерациянь Конституциясь ве шкане кармась государствань весе устройствань юрокс ды прякс, ламот кементь иетнень перть масторонь виевгавтомань прявт нежедьксэкс.
«Те шканть перть минь вейсэ ютынек покш ды стака ки, ламо изнязь. Икеле минек учи аволь седе шожда, виень вешиця ды лезэв важодема. Од нежедькст икеленек путы «О национальных целях и стратегических задачах развития на период до 2024 года» Россиянь Федерациянь Президентэнть В.В.Путинэнь Указозо. Сыця 6 иетнень перть миненек мартонк эряви теемс алкуксонь икелев молема экономикасо, инфраструктурасо, технологиятнесэ ды социальной сферасонть. Те, апак покшкавтне, историянть тевть, – явовтызе пурнавозетнень мелест В.Д.Волков. – Маласо иетнестэ миненек эряви ламолгавтомс Мордовиянь эрицятнень, топавтомс ломантнень зарплатаст ды доходост алкуксонь касомаст.
Миненек эряви теемс конкуренциянь кирдиця цифровой экономика, конась карми важодеме ломантнень лезэс. Теемс сонзэ истя, региононь валовой продуктонь покш пельксэсь теевезэ од содамочитнень, инновациянь ды наукоёмкой продукциянть нолдамонзо вельде.
Весе неть тевтне топавтовить вадрясто анокстазь кадратнень, неень шкань арсематнень, од технологиятнень, минек ломантнень од тевс бажамост ды ёрокчист лангс нежедезь. Миненек эряви ванстомс весементь, мезесь изнязь, поладомс икелев молеманть. А кавтолдан, минек мартонк весемесь топавтови!»
Кортамонть прядомадо мейле Владимир Волков явшесь Мордовия Республиканть икеле покш изнявкстнэнь кисэ государственной покш казнеть.
Истя, Славань IIстепенень орденсэ казезь МР-нь Госсобраниянь депутатось, Н.П.Огарёв лемсэ МГУ-нь ректорось Сергей Вдовин. Здравоохранениясо покш изнявкстнэнь кисэ Славань III степенень орденсэ казезь Республикань онкодиспансерэнь прявт врачось Геннадий Мельцаев.
Тешкстазь СССР-нь кемгавтовоце тердемань (1989 – 1991 иень) раськень депутаттнэ, кить ульнесть РФ-нь Конституциянь анокстамосо ды кемекстамосо. «За заслуги перед Республикой Мордовия» медальсэ казезь трудонь ветеранось Алексей Кондратьев ды Н.П.Огарев лемсэ МГУ-нь аналитикань кафедрань прявтось Анатолий Осипов.
Республикань социально-экономической виевгавтомантень покш путвоксонь кисэ ды законотворческой тевдеемасо улеманть кисэ «За заслуги перед Республикой Мордовия» медальсэ казезь историянь событиясо улицясь, конась 1993 иень ацамковонь 12-це чисэ максызе вайгелензэ РФ-нь Конституциянть примамонзо кисэ, – РСФСР-нь кемгавтовоце тердемань (1990 – 1993 иень) раськень депутатось, «Воля» ООО-нь Зубова-Полянань отделениянь техникесь-осеменаторось Нина Тюрькина.
Минек региононь банконь системанть виевгавтомасо покш путовксонть кисэ «Лауреат премии Главы Республики Мордовия» лем максозь трудонь ветеранонтень Александр Тренькиннэнь, конась каршо валсо ёвтась сюкпря республикань кирдийтненень ды Владимир Волковнень башка сонзэ важодемантень покш питнень максоманть кисэ, ды мерсь, неть ярмактнень пачтясынзе онкологиясо сэредиця эйкакштненень лездамонь фондс.
Покш казнетнеде башка, Владимир Волков икелень коенть коряс явшесь республикань школасо тонавтницятненень Россиянь Федерациянь гражданинэнь паспорт ды ледстнемань казнеть.