Владимир Волков ульнесь ПФО-со РФ-нь Президентэнь полномочной представителенть юрсо Советэнь промкссонть

Владимир Волков ульнесь ПФО-со РФ-нь Президентэнь полномочной представителенть юрсо Советэнь промкссонть

Сентябрянь 29-це чистэ Пензасо Мордовия Республикань Прявтось Владимир Волков ульнесь Равчирень федеральной округсо РФ-нь Президентэнь полномочной представителенть юрсо Советэнь промкссонть, сонзэ ветясь Михаил Бабич. Промксонь участниктне – федеральной ды региональной структурань руководительтне, ПФО-с совиця РФ-нь субъекттэнь прявттнэ, общественной организациянь представительтне – ваннызь округонь регионтнэнь экономикань касомань, налогонь потенциалонь покшолгавтомань ды межбюджетной отношениятнень вадрялгавтомань кевкстематнень.

Промкссонть ульнесть Россиянь Федерациянь Финансонь министрась Антон Силуанов, РФ-нь Промышленностень ды торговлянь министрань полавтыцясь Василий Осьмаков.

Промксонть панжомсто Равчирень федеральной округсо РФ-нь Президентэнь полпредэсь Михаил Бабич ёвтась поздоровт сентябрянь 10-це чистэ кочказь региононь прявттнэнень, сынст ютксо Владимир Волков Мордовиянь Прявтоськак, арсесь губернатортнэнень лезэв важодема ответственной таркатнесэ.

Чинь повесткань прявт кевкстеманть коряс кортамсто, Равчирень федеральной округсо РФ-нь Президентэнь полномочной представителесь тешкстызе федеральной ды региононь уровнятнесэ бюджетэнь пештемань ды экономикасо касоманть туртов условиятнень теемань важодемань виевчинть ды эрявиксчинть.

"Тевенть стакалгавты се, федеральной законодательствань башка полавтоматне эли федеральной уровнясо кемекстазь решениятне ветить регионтнэнь расходонь обязательставтнень зярыяксть касомантень. Текень марто неть решениятне эрявить ломантнень эрямост вадрялгавтомантень, ды, нама, вешить финансонь ресурстнэнь мобилизациянть, региононь ды муниципалитетэнь бюджеттнэнь ванкшноманть, тень вельде редявить неть решениятнень топавтомаст туртов средстватнень покшолматне ды тешкставить федеральной бюджетстэ явовиця лезксэнь эрявикс ёнкстнэ", – мерсь ПФО-со РФ-нь Президентэнь полпредэсь.

Михаил Бабичень валонзо коряс, кемекстазь эрявикс решеният нужасо эриця категориятнень эрямост вадрлягавтомга, те – важодемань кисэ пандомань сехте вишкине размерэнть кастомась.

"Меельце кавто иетнень перть МРОТ-сь кастовсь колмоксть. Тень топавтомс регионтнэнень явови лезкс. Тедеде государствань Прявтось кармавтсь Россиянь Федерациянь Правительствантень 2019 иенть самс

кастомс МРОТ-нть прожиточной минимумонть видьс: 2018 иень январень 1-це чистэнть саезь – 85% прожиточной минимумонть эйстэ, 2019 иень январень 1-це чиденть аволь седе позда – вейкендямс МРОТ-нть ды прожиточной минимумонть", – толковизе ПФО-со Россиянь Президентэнь полномочной представителесь.

Межбюджетной отношениятнень одкстомтомадост ды Россиянь Федерациянь бюджетэнь системань бюджеттнэнь пештемадост пачтясь Россиянь Финансонь министрась Антон Силуанов. Сон ледстизе, неень шкане РФ-нь Госдумас ванкшномс максови 2018-2020 иетнес бюджетэнь проектэсь ды тешкстынзе прявт тевтнень: «Кирдемс эрицятнень алкуксонь доходост кастоманть, виевгавтомс экономикань касомань лувонть. Минь учотано тедеде ды сы иестэнть эрьва иестэ кавто процентэнь касома», – пачтясь Финансонь министрась.

Промкссонть невтезель округонь виевгавтомань институттнэнь тевдеемань анализэсь, максозь питне экономикань касомань изнявкстнэсэ сынст таликантень. Те кевкстеманть коряс Пензань областень Губернаторонть, Советэнь важодемань группань прявтонть Иван Белозерцевень пачтямосонть Мордовиясь ёвтазь ПФО-нь регионтнэнь ютксо, косо редязь региононь валовой продуктонь касомась.

Теде башка, Советэнь итогонь пачтямосонть Мордовия Республикась тешкстазь, кода регион, конась 2017 иень васенце кото ковтнестэ невти виев касома промышленной производствасонть (112,9% ютазь иень теке шканть коряс), округсонть сехте вадря динамика велень хозяйствасонть (104,2%) ды строямонь тевтнень покшолмаст касоманть (117%).

Сехте редявиксэкс ашти се, Мордовиясь совась округонь васенце вете регионтнэнь юткс, косо ванкшнозь шканть перть редязь эрицятнень алкуксонь доходтнэнь касомась, истя жо ПФО-нь васенце ниле регионтнэнь юткс, косо тешкстави инвестициянь покшолматнень касомась (124,1% 2016 иень кото ковтнень коряс).

Ютавтозь анализэсь, Советэнь участниктнень мелест коряс, невти, Равчирень федеральной округонь регионтнэнь экономикась лиси кризисстэнть ды велявты касомантень-кепетемантень. Теке шкане эряви кемекстамс курок шкань виде решеният экономикань касомань стимулированиянь, налогонь потенциалонь кастомань, межбюджетной отношенитянень вадрялгавтомань ды бюджетэнь расходтнэнь оптимизациянь коряс.

Кортамонь итогтнень коряс промксонь участниктне анокстасть пачтямот Россиянь Федерациянь Правительствантень, Россиянь Федерациянь Экономической развитиянь министерствантень, Россиянь Федерациянь Финансонь министерствантень, истя жо Равчирень федеральной округонь регионтнэнь исполнительной властень органтнэнень.

Мордовия Республикань Прявтонть пресс-службась