Цетвергстэ, июлень 12-це чистэ, Республикань Кудосо ютавтовсь МР-нь Прявтонть Владимир Волковонь «Мордовия» футболонь клубонь представительтнень ды сонзэ тренертнэнь марто коень вастовомась, конась ютась ФНЛ-нь 2018-2019 сезононть каршо, сон ушодови те иень июлень 17-це чистэ.
Мордовиянь Прявтось ёвтась поздоровт командантень сезононть ушодовоманть коряс ды арсесь спортсментнэнень изнявкст. Сон ёвтась кемема футболонь Премьер-лигасонть минек налксицятнень изнямотнес, истя жо вадря ды мельстуиця налксематнес.
«Региононь руководствась яви лезкс клубонтень ды икелепелев те важодемась карми ветявомо. Од сезононть минь ушодтано икеле лисезь финансонь стакачитнень печтязь. Теезь вадря условият анокстамонть туртов, истя жо тренировкань площадкат. Минь кортатано республикань промышленной покш предприятиятнень марто «Мордовия» ФК-нь уцяскасо сынст участиядост, – мерсь Владимир Волков. – Тынк составось одкстомтовсь. Тыненк эряви кармамс вейкине, виев командакс. Налксицятненень эряви бажамс кемекстамс эсь тарканть, налксемс весе эсь вийтнень максозь. Эряви ветямс седе ламо тренировкат, кемекстамс маштомачитнень, од ломантне кастост профессионализмаст».
Республикань Прявтось тешкстызе, Футболонь коряс масторлангонь чемпионатось кармась спортонь те видэнть катализаторокс, истя жо эйкакштнень ютксо. Редявиксстэ кассь масторонь эрицятнень мелест футболонтень, истя жо Саранскоенсетнень. Минек клубонь васенце налксемантень, конась ютавтови «Мордовия Аренасо», учовить 28 тёжат ваныцят.
«Эряви кирдемс мельсэ, ломантне тонадсть ваномо мельстуиця матчт, ды тыненк эряви путомс ламо вийть аудиториянть а ёмавтомга. Тынк эйстэ ашти, сыть эли арась ваныцятне лия налксематнес. Стадиононтень сакшновольть 15-20 тёжадо аволь седе аламо ваныцят. Зярдо бути ломантне семиянек яксесть футболонь матчтнес, эряви одкстомтомс те коенть», – мерсь В.Д.Волков.
Мордовиянь Прявтонть валонзо коряс, 2018 иень Масторлангонь чемпионатонть вельде Россиянтень кадовсть наследиянь пек ламо объектт, омбо масторонь болельщиктне кемевтевсть, кода мельспаросо тесэ эйсэст вастыть. Инжетнень лембестэ вастомась ды пек паро организациясь эзть кадо тарка кармавтозь негативентень. Омбо масторонь эрицятне эсест сельмсэ неизь, кодат паронь арсиця ломанть эрить минек масторсо. Теде башка, минек масторонь ды томбалень эрицятне, кить сакшность Мордовияв, макссть покш питне Саранскойсэ мундиалень анокстамонтень.