Августонь 16-це чистэ ютавтовсь Россиянь Правительствань Председателенть Дмитрий Медведевень Мордовия Республикань Прявтонь тевтнень нурька шкас топавтыцянть Владимир Волков марто вастовомась. Ванкшновсть республикань социально-экономической виевгавтомань кевкстематне.
Кортамось ушодовсь социальной ёнксонь кевкстематнестэ. Владимир Волков ёвтнесь Дмитрий Медеведевнень сень коряс, кода республикась топавты дошкольной тонавтомань учреждениятнесэ таркатнень теемань программанть. 5 иетнень перть Мордовиясо витнезь ды строязь 54 эйдень кужот, ней республикасонть витезь 3-7 иесэ эйкакштненень таркань асатоманть коряс стакачись. Федеральной программась прядовсь, тень лангс апак вано, кода тешкстызе Владимир Волков, республикась поладсы эйдень кужотнень строямонть ды од таркатнень тееманть, колмо иеде седе вишкинетнеяк якавольть дошкольной учреждениятнес. Ансяк тедеде республикасонть панжовить эштё кото эйдень кужот.
Владимир Волков истя жо пачтясь сень коряс, прядовсь «Юбилейный» эрямонь микрорайонсонть 1450 таркас од школань строямось, тонавтомань неень шкань технологиятнень ды тонавтомань лувонть коряс сон, арсематнень коряс, карми улеме эталонокс. 2020 иентень, кода тешкстызе Мордовиянь лидерэсь, республикань школасо весе тонавтницятне кармить якамо вейке сменас, истя жо республикань программанть коряс арсеви строямс одт ды витнемс уш важодиця школатнень. Невтемга, прядовома лангсо Рузаевкасо школань строямось. Неть кевкстематне республикань властнень башка ванновтост ало.
«Минек аволь ламо школанок, конат важодить омбоце сменасо. Прявт стакачись – школатне, конат строязь умок ды конатнень эряви витнемс. Тень мельс саезь анокстазьгак программась», – толковизе Владимир Волков.
«Те пек виде, теде башка, зярдо минь мартонк меельцеде ютавтынек промкс, мон тешксты: омбоце сменась аволь свал истямо покш стакачи. Бути школась вадря ды весемесь парсте теезь, седе вадря ули тонавтнемс омбоце сменасо неень шкань вешематненень ладиця школасо, косо педагогонь вадря коллектив, вейке сменанть коряс се школасонть, косо мезеяк арась. Секскак школатнень педе пев витнемань тевесь аволь седе вишкине од школатнень тееманть коряс», – тешкстызе Дмитрий Медведев.
Премьер-министрась тешкстызе, маласо иетнес те программанть коряс регионтнэнень лезксэнь явоманть туртов ярмактне путозь.
Вастовоманть шкасто истя жо кортавсть республикань экономикань тевтне. 2017 иень сисем ковонь итогне вадрят: промышленной производствань индексэсь кармась 113 процентт, прявт капиталс инвестициятне кассть 18 процентс, экспортось ламолгадсь кавтос ды пельс.
«Строятано ниле од заводт, косо карми нолдавомо неень шкань продукция, кодамо Россиясо икеле арасель», – тешкстызе Владимир Волков. Кортамось моли кабелень ды светотехникань продукциядо, медицинань препаратнэде, истя жо меельце поколениянь отечественной антибиотиктнень нолдамодост. Мордовиянь лидерэсь тешкстызе Россиянь фармацевтической промышленностенть туртов те проектэнть лиятнень ёнов а молеманть.
«Те пек паро, – мерсь Дмитрий Медведев. – Секс мекс лезды витемс те сферасонть прявт тевенть – топавтомс лекарствань безопасностенть, независимостенть. Ды те аволь ансяк лия мастортнэнь марто экономикань конкуренциянь кевкстемась (теяк канды смусть), васняяк лекарстватнень питнест. Некеть жо лекарстватне, конат теевить химической вейкине формуланть коряс, конатнень аволь патентэнь вейкине лемест, минек, нама, кармить улеме седе дешоват, секс мекс а ютавтовить ярмакт ускомаст лангс».
Лекарствань од препараттнэнь арсемаст-нолдамост туртов республикасонть «Биохоимик» заводонть ды Мордовиянь госуниверситетэнть юрсо теезь «Антибиотики» научно-производственной ды
инжиниригень куншкакуро, иенть прядовомс предприятиясь ушодсы субстанциянь ниле видтнэнь нолдамонть.
Владимир Волков тешкстызе, весе ниле од заводтнэ кармить важодеме сы иестэнть.
Мордовиянь лидерэсь пачтясь аграрной отраслянь тевтнеде. Касы велень хозяйствань продукциянь весе видтнэнь производствась, сисем ковтнень перть сывелень нолдамось кассь 8 процентс. Аграрийтне арсить пурнамс 1,5 миллионт тоннат сюро, средней урожайностесь –35 центнерт гектарсто. Поладови инвестициянь покш проекттнэнь топавтомась, конат лездыть седе тов кастомс республикасонть велень хозяйствань производстванть.
Кортамонь прявт кевкстемакс кармась футболонь коряс масторлангонь чемпионатонтень анокстамось. Владимир Волков пачтясь, важодемась моли графикенть коряс, ёвтнесь Саранскойсэ спортонь объекттнэнь строямодост, прявтокс эйстэст карми «Мордовия Арена» стадионось, региононь коммунальной ды транспортонь инфраструктуранть одкстомтомадонзо. Истя жо сень коряс, Мордовиянь прявтошсо стадиононть вакссо кепети эрямонь неень шкань пек покш комплекс, косо эрямо таркань строямонть марто тееви социально-бытовой инфраструктурась: покш школа, кавто эйдень кужот, поликлиника, микшнемань куншкакурот, оймсемань ды спортонь площадкат. «Минек прявт тевенек, чемпионатонь сюпавчись – од китне, гостиницатне, эрямо кудотне, мазылгавтозь лей чиретне, аэропортонь одкстомтозь комплексэсь – кандозо лезэ Мордовиянь эрицятненень ламо иень перть», – тешкстызе региононь Прявтонь тевтнень нурька шкас топавтыцясь.
«Пек вадря», – максь питне республикань важодемантень Дмитрий Медведев.
Россиянь Правительствань Председателесь кирдинзе Мордовиянть туртов пек эрявикст ламот проекттнэнь. Невтемга, Дмитрий Медведев кирдизе Минэкономразвитиянь комиссиянть решениязо максомс Рузаевкантень социально-экономической виевгавтомань икельдиця территориянь статусонть. Те лезды кепедемс ошонть инвестициянь
привлекательностенть, ды максы виев эскелькс весе Рузаевкань ёнксонть виевгавтоманть туртов.
Владимир Волков истя жо пшкадсь Дмитрий Медведевнень энялдома марто лездамс республикань онкологиянь диспансерэнь поликлиниканть строямосонть. Объектэнть теемась ушодозь республикань ярмактнень лангс, ней, премьер-министранть кармавтоманзо коряс, поликлиниканть совавтсызь федеральной целевой программантень.
Мордовия Республикань Прявтонть пресс-службась